அமெரிக்க அதிபர் டொனால்ட் டிரம்ப், நிலவு அமெரிக்காவுக்குச் சொந்தமானது என்று பொருள்படும் பதிவை தனது Truth Social பக்கத்தில் பகிர்ந்தது சர்வதேச அளவில் கவனம் பெற்றுள்ளது.
நிலவின் பின்னணியில் அமெரிக்கக் கொடியுடன் உருவாக்கப்பட்ட படத்தையும் அவர் வெளியிட்டுள்ளார்.
ஞாயிற்றுக்கிழமை வெளியிட்ட பதிவில், “The Moon is ours” என்று டிரம்ப் குறிப்பிட்டுள்ளார். இதனுடன் நிலவின் படமும் அமெரிக்கக் கொடியும் இடம்பெற்றிருந்தன.
டிரம்ப் சமீப காலமாக செயற்கை நுண்ணறிவு மூலம் உருவாக்கப்பட்ட பல்வேறு படங்கள் மற்றும் பதிவுகளை சமூக வலைதளத்தில் வெளியிட்டு வருகிறார். நிலவு தொடர்பான இந்தப் பதிவும் அதே வரிசையில் வெளியாகியுள்ளது.
நியூ மெக்சிகோவுக்கும் புதிய பெயர்?
இதற்கிடையே அமெரிக்காவின் நியூ மெக்சிகோ மாகாணத்தின் பெயரை “நியூ அமெரிக்கா” என மாற்றலாம் என்றும் டிரம்ப் தெரிவித்துள்ளார்.
இந்த யோசனையை மாகாண ஆளுநர் மிஷெல் லுஜன் கிரிஷம் திட்டவட்டமாக நிராகரித்துள்ளார். நியூ மெக்சிகோ என்ற பெயர் அமெரிக்கா உருவாவதற்கு முன்பே இருந்தது என்றும் அவர் தெரிவித்துள்ளார்.
ஏற்கெனவே பல பெயர் மாற்ற சர்ச்சைகள்
புவியியல் பெயர்களை மாற்றுவது தொடர்பான டிரம்பின் கருத்துகள் இதுவே முதல் முறை அல்ல. மெக்சிகோ வளைகுடாவை “கல்ஃப் ஆஃப் அமெரிக்கா” என அழைக்கும் முயற்சியும் சர்ச்சையை ஏற்படுத்தியது.
மேலும், கனடாவுடனான வர்த்தக மோதலுக்கு மத்தியில் லேக் ஒன்டாரியோவின் பெயரை மாற்றுவது குறித்தும் அவர் பேசியிருந்தார். ஹார்முஸ் நீரிணைக்கு “டிரம்ப் ஸ்ட்ரெய்ட்” என்று பெயர் வைக்கலாம் என்றும் அவர் சமீபத்தில் கூறியிருந்தார்.
