மொபைல் சேவையில் அதிரடி மாற்றங்கள்… பொதுமக்கள் ஹேப்பி- நிறுவனங்கள் கொந்தளிப்பு – டிராய் அறிவிப்பு முழு விவரம்!

மொபைல் போனில் இண்டர்நெட் அதிகம் பயன்படுத்தாமல், போன் பேசுவதற்கும் எஸ்எம்எஸ் அனுப்புவதற்கும் மட்டும் பயன்படுத்துபவர்களுக்கு முக்கியமான மாற்றங்களை இந்திய தொலைத்தொடர்பு ஒழுங்குமுறை ஆணையமான டிராய் அறிவித்துள்ளது. இதன் முழு விவரத்தை பார்க்கலாம்.

2024-ம் ஆண்டு டிசம்பர் 23ஆம் தேதி கொண்டுவரப்பட்ட விதிமாற்றத்தின் மூலம், இண்டர்நெட் டேட்டா இல்லாமல் போன் கால் மற்றும் எஸ்எம்எஸ் மட்டும் பயன்படுத்தக்கூடிய குறைந்தபட்சம் ஒரு சிறப்பு ரீசார்ஜ் திட்டத்தை (Special Tariff Voucher) தொலைத்தொடர்பு நிறுவனங்கள் வழங்க வேண்டும் என்று டிராய் உத்தரவிட்டிருந்தது.

இதன்படி நிறுவனங்கள் போன் கால் மற்றும் எஸ்எம்எஸ் மட்டும் கொண்ட ரீசார்ஜ் திட்டங்களை அறிமுகப்படுத்தின. ஆனால் அவற்றில் பெரும்பாலானவை 80/84 நாட்கள் அல்லது 336/365 நாட்கள் போன்ற நீண்டகால திட்டங்களாகவே இருந்தன.

இதனால் குறைந்த நாட்களுக்கு மட்டும் ரீசார்ஜ் செய்ய விரும்புபவர்கள், அதிக தொகையை செலுத்தி நீண்டகால திட்டத்தை வாங்க வேண்டிய நிலை ஏற்பட்டது. குறிப்பாக குறைந்த வருமானம் கொண்டவர்கள், கிராமப்புற மக்கள், முதியவர்கள், சாதாரண பட்டன் போன் பயன்படுத்துபவர்கள் ஆகியோருக்கு குறைந்த நாட்களுக்கான திட்டங்கள் போதுமான அளவில் கிடைக்கவில்லை என்று டிராய் கண்டறிந்தது.

மேலும், இண்டர்நெட் டேட்டாவை நீக்கிவிட்டு போன் கால் மற்றும் எஸ்எம்எஸ் மட்டும் கொடுத்தபோதும், அதற்கேற்ப ரீசார்ஜ் கட்டணம் குறைக்கப்படவில்லை என்பதையும் டிராய் சுட்டிக்காட்டியது. பொதுமக்களிடமிருந்து எதிர்ப்பு எழுந்த பிறகே அந்தத் திட்டங்களின் விலைகள் கணிசமாகக் குறைக்கப்பட்டதாகவும் தெரிவித்தது.

இதையடுத்து 2026-ஆம் ஆண்டு ஏப்ரல் 7ஆம் தேதி புதிய விதிகளுக்கான வரைவை டிராய் வெளியிட்டது. பொதுமக்கள், தொலைத்தொடர்பு நிறுவனங்கள் உள்ளிட்ட பல்வேறு தரப்பினரிடம் கருத்துகள் கேட்கப்பட்டன. ஜூன் 15ஆம் தேதி கருத்துக் கேட்புக் கூட்டமும் நடத்தப்பட்டது. அதன்பிறகு புதிய விதிகள் இறுதி செய்யப்பட்டன.

28 நாள் ரீசார்ஜ் இருந்தால் என்ன நடக்கும்?

இதுதான் புதிய விதியில் பொதுமக்களுக்கு மிகவும் முக்கியமான பகுதி. ஒரு நிறுவனம் 28 நாட்களுக்கு போன் கால், எஸ்எம்எஸ், இண்டர்நெட் டேட்டா மூன்றும் சேர்ந்த ரீசார்ஜ் திட்டத்தை வைத்திருக்கிறது என்று வைத்துக்கொள்வோம்.

இனி அதே 28 நாட்களுக்கு இண்டர்நெட் டேட்டா இல்லாமல், போன் கால் மற்றும் எஸ்எம்எஸ் மட்டும் பயன்படுத்தக்கூடிய தனி ரீசார்ஜ் திட்டத்தையும் அந்த நிறுவனம் வழங்க வேண்டும்.

28 நாட்களுக்கு மட்டுமல்ல. ஒரு நிறுவனம் 15 நாள், 20 நாள், 30 நாள் என எந்தெந்த காலத்திற்கு போன் கால், எஸ்எம்எஸ், இண்டர்நெட் டேட்டா சேர்ந்த ரீசார்ஜ் திட்டங்களை வைத்திருக்கிறதோ, அந்த நாட்களுக்கு ஏற்ப இண்டர்நெட் டேட்டா இல்லாத தனி ரீசார்ஜ் திட்டங்களையும் வழங்க வேண்டும்.

இண்டர்நெட் வேண்டாமா? கட்டணமும் குறைய வேண்டும்

இதில்தான் வாடிக்கையாளர்களுக்கு நேரடியாக பணம் மிச்சமாக வாய்ப்பு இருக்கிறது.

போன் கால், எஸ்எம்எஸ், இண்டர்நெட் டேட்டா மூன்றும் சேர்ந்த ஒரு திட்டத்தில் இருந்து இண்டர்நெட் டேட்டாவை நீக்கிவிட்டு, அதே கட்டணத்தை வசூலிக்க முடியாது.

இண்டர்நெட் டேட்டா இல்லாமல் போன் கால் மற்றும் எஸ்எம்எஸ் மட்டும் கொண்ட ரீசார்ஜ் திட்டத்தின் கட்டணத்தை அதற்கேற்ப குறைக்க வேண்டும் என்று டிராய் கூறியுள்ளது.

அதாவது, இண்டர்நெட்டையே பயன்படுத்தாத ஒருவர் தனக்குத் தேவையில்லாத டேட்டாவுக்கும் சேர்த்து பணம் கொடுக்க வேண்டிய நிலையை குறைப்பதே இதன் நோக்கம்.

ஆனால் இந்தத் திட்டம் ரூ.199-க்குத்தான் இருக்க வேண்டும் அல்லது ரூ.249-க்குத்தான் இருக்க வேண்டும் என்று டிராய் விலையை நிர்ணயிக்கவில்லை. எந்த அளவுக்கு விலை குறையும் என்பது அந்தந்த தொலைத்தொடர்பு நிறுவனங்கள் அறிவிக்கும் புதிய திட்டங்களைப் பொறுத்தே தெரியவரும்.

மாதந்தோறும் ஒரே தேதியில் ரீசார்ஜ்

இன்னொரு முக்கியமான மாற்றமும் இருக்கிறது. ஒரு மாதத்தில் எந்த தேதியில் ரீசார்ஜ் செய்கிறோமோ, அடுத்த மாதம் அதே தேதி வரை பயன்படுத்தக்கூடிய திட்டத்தையும் நிறுவனங்கள் வழங்க வேண்டும்.

உதாரணமாக அக்டோபர் 10ஆம் தேதி ரீசார்ஜ் செய்தால், அடுத்த மாதம் நவம்பர் 10ஆம் தேதி வரை பயன்படுத்தும் வகையிலான திட்டத்தை தேர்வு செய்ய முடியும்.

31ஆம் தேதி ரீசார்ஜ் செய்து, அடுத்த மாதத்தில் 31ஆம் தேதி இல்லாவிட்டால் அந்த மாதத்தின் கடைசி நாள் கணக்கில் எடுத்துக்கொள்ளப்படும்.

நீண்ட நாட்களுக்கு ரீசார்ஜ் செய்பவர்களுக்கும் வசதி

ஒரு மாதத்துக்குள் ரீசார்ஜ் செய்பவர்களுக்கு மட்டுமல்ல; பல மாதங்களுக்கு ஒரே முறையில் ரீசார்ஜ் செய்பவர்களுக்கும் புதிய விதியில் வசதி செய்யப்பட்டுள்ளது.

30 நாட்களுக்கு மேல் பயன்படுத்தக்கூடிய திட்டங்களை நிறுவனங்கள் வைத்திருந்தால், இண்டர்நெட் டேட்டா வேண்டாதவர்களுக்காக போன் கால் மற்றும் எஸ்எம்எஸ் மட்டும் கொண்ட நீண்டகால திட்டத்தையும் வழங்க வேண்டும்.

இதனால் ஒரு மாதத்திற்கு ரீசார்ஜ் செய்பவர்கள் முதல் பல மாதங்களுக்கு ஒரே முறையில் ரீசார்ஜ் செய்பவர்கள் வரை தங்களுக்குத் தேவையான திட்டத்தை தேர்வு செய்ய முடியும்.

அப்படியானால் 28 நாள் ரீசார்ஜ் இனி இருக்காதா?

இருக்கும். தற்போது இருக்கும் அனைத்து 28 நாள் ரீசார்ஜ் திட்டங்களையும் 30 நாளாக மாற்ற வேண்டும் என்று டிராய் கூறவில்லை.

ஒரு நிறுவனம் 28 நாட்களுக்கு போன் கால், எஸ்எம்எஸ், இண்டர்நெட் டேட்டா சேர்ந்த திட்டத்தை வைத்திருந்தால், அதே 28 நாட்களுக்கு இண்டர்நெட் டேட்டா இல்லாத தனித் திட்டத்தையும் வழங்க வேண்டும் என்பதுதான் புதிய விதி.

அதோடு, மாதந்தோறும் ஒரே தேதியில் ரீசார்ஜ் செய்யக்கூடிய திட்டத்தை தேர்வு செய்யும் வாய்ப்பும் வாடிக்கையாளர்களுக்கு கிடைக்கும்.

ஆண்டுக்கு 13 முறை ரீசார்ஜ் செய்ய வேண்டுமா?

28 நாள் திட்டத்தை தொடர்ந்து பயன்படுத்தினால், 28 × 13 = 364 நாட்கள். அதாவது ஓராண்டில் 13 முறை ரீசார்ஜ் செய்ய வேண்டிய நிலை ஏற்படுகிறது.
“ஓராண்டில் 12 மாதங்கள்தானே இருக்கின்றன; அப்படியிருக்க 13 முறை ஏன் ரீசார்ஜ் செய்ய வேண்டும்?” என்ற கேள்வி நீண்டகாலமாக வாடிக்கையாளர்களால் எழுப்பப்பட்டு வருகிறது.

ராஜ்யசபா எம்.பி. ராகவ் சத்தாவும் இந்த விவகாரத்தை நாடாளுமன்றத்தில் எழுப்பியிருந்தார். புதிய விதிகளின்படி மாதந்தோறும் ஒரே தேதியில் முடியும் திட்டத்தை தேர்வு செய்தால், மாதத்திற்கு ஒருமுறை என்ற கணக்கில் ரீசார்ஜ் செய்துகொள்ள முடியும்.

ஆனால் 28 நாள் திட்டங்கள் ரத்து செய்யப்படவில்லை. எனவே இனி எல்லோருமே ஆண்டுக்கு 12 முறை மட்டும்தான் ரீசார்ஜ் செய்வார்கள் என்று புரிந்துகொள்ளக் கூடாது. எந்தத் திட்டத்தை தேர்வு செய்கிறோம் என்பதைப் பொறுத்தே அது அமையும்.

யாருக்கு அதிக பயன்?

ஸ்மார்ட்போன் வைத்திருந்தாலும் இண்டர்நெட் அதிகம் பயன்படுத்தாதவர்கள், பட்டன் போன் பயன்படுத்துபவர்கள், முதியவர்கள், இரண்டாவது சிம் வைத்திருப்பவர்கள் ஆகியோருக்கு இந்த மாற்றம் அதிக பயனுள்ளதாக இருக்கும்.

உதாரணமாக, வீட்டில் Wi-Fi இருப்பதால் மொபைல் டேட்டா அதிகம் தேவைப்படாதவர்களுக்கும் இந்தத் திட்டங்கள் பயன்படலாம்.

அதேபோல் போன் பேசுவதற்கும் எஸ்எம்எஸ் அனுப்புவதற்கும் மட்டும் ஒரு சிம்மை வைத்திருப்பவர்கள், தங்களுக்குத் தேவையில்லாத இண்டர்நெட் டேட்டாவுக்காக பணம் செலுத்துவதை தவிர்க்க முடியும்.

ஒரே நேரத்தில் அதிக தொகையை செலுத்தி மூன்று மாதம் அல்லது ஓராண்டுக்கான திட்டத்தை வாங்க முடியாதவர்களுக்கும் குறைந்த நாட்களுக்கான ரீசார்ஜ் திட்டங்கள் கூடுதல் வாய்ப்பை வழங்கும்.

நிறுவனங்கள் கொந்தளிப்பு

இந்த மாற்றங்களை தொலைத்தொடர்பு நிறுவனங்கள் முழுமையாக ஏற்றுக்கொள்ளவில்லை. Jio, Airtel, Vodafone Idea உள்ளிட்ட நிறுவனங்களை பிரதிநிதித்துவப்படுத்தும் இந்திய செல்லுலார் ஆபரேட்டர்கள் சங்கமான COAI இதற்கு கடும் எதிர்ப்பு தெரிவித்தது.

இந்தியாவில் பெரும்பாலான மொபைல் வாடிக்கையாளர்கள் இண்டர்நெட் டேட்டாவை பயன்படுத்தத் தொடங்கிவிட்ட நிலையில், போன் கால் மற்றும் எஸ்எம்எஸ் மட்டும் கொண்ட பல்வேறு ரீசார்ஜ் திட்டங்களை கட்டாயமாக வழங்கச் சொல்வது தேவையற்ற தலையீடு என்பது நிறுவனங்களின் வாதம்.

மேலும், ஒவ்வொரு கால அளவுக்கும் தனித்தனி ரீசார்ஜ் திட்டங்களை வழங்க வேண்டியிருப்பது, நிறுவனங்கள் தங்களது ரீசார்ஜ் திட்டங்களை முடிவு செய்யும் சுதந்திரத்தை பாதிக்கும் என்றும் COAI தெரிவித்தது.

ஆனால் இண்டர்நெட் டேட்டா தேவையில்லாதவர்கள் அதற்கும் சேர்த்து பணம் செலுத்த வேண்டிய நிலை இருக்கக்கூடாது என்ற நிலைப்பாட்டை டிராய் தொடர்ந்தது. நிறுவனங்களின் எதிர்ப்பையும் மீறி, இண்டர்நெட் டேட்டா இல்லாத குறுகிய கால ரீசார்ஜ் திட்டங்களை வழங்குவதற்கான விதியை இறுதி செய்துள்ளது.

எப்போது புதிய ரீசார்ஜ் திட்டங்கள் வரும்?

புதிய விதிகள் நடைமுறைக்கு வந்ததும் Jio, Airtel, Vodafone Idea உள்ளிட்ட நிறுவனங்கள் அதற்கேற்ப புதிய ரீசார்ஜ் திட்டங்களை வழங்க வேண்டியிருக்கும்.

அதன்பிறகுதான் இண்டர்நெட் டேட்டா இல்லாத 28 நாள் திட்டத்துக்கு எவ்வளவு கட்டணம், மாதந்தோறும் ஒரே தேதியில் முடியும் திட்டத்துக்கு எவ்வளவு கட்டணம், நீண்டகால திட்டங்களுக்கு எவ்வளவு கட்டணம் என்பது தெரியவரும். அப்போது எந்த நிறுவனம் எவ்வளவு விலையை குறைக்கிறது என்பதும் தெளிவாகும்.

டிராய் புதிய விதிகள் முழுமையாக