ஒருவருடன் பழகிய பிறகு மனதில் நிம்மதிக்கு பதிலாக பயம், பதற்றம் அல்லது சோர்வு தொடர்ந்து ஏற்பட்டால், அந்த உறவை சற்று கவனித்துப் பார்க்க வேண்டிய நேரம் இது.
நம்முடைய பேச்சு, செயல்கள் அல்லது உணர்வுகளை தொடர்ந்து பாதிக்கும் எதிர்மறையான நடத்தையை ‘டாக்ஸிக்’ நடத்தை என்று குறிப்பிடலாம்.
எப்போதும் குறை சொல்வது
நாம் செய்யும் ஒவ்வொரு விஷயத்திலும் தவறை மட்டுமே தேடுவது டாக்ஸிக் நடத்தையின் ஒரு அறிகுறியாக இருக்கலாம். தொடர்ந்து தாழ்த்திப் பேசுவது, சாதனைகளை மதிக்காமல் குறைகளை மட்டும் சுட்டிக்காட்டுவது போன்ற செயல்கள் மன அழுத்தத்தை ஏற்படுத்தும்.
சுயநலமும் பொறாமையும்
தங்களுடைய தேவைகளுக்கு மட்டும் முக்கியத்துவம் கொடுத்து, எதிரில் இருப்பவர்களின் உணர்வுகளைப் பொருட்படுத்தாமல் இருப்பதும் கவனிக்க வேண்டிய விஷயம்.
அதேபோல், நம்முடைய வளர்ச்சி அல்லது வெற்றியை ஏற்றுக்கொள்ளாமல் அதை வேறு விதமாகப் பேசுவது பொறாமையின் வெளிப்பாடாக இருக்கலாம்.
கையாளுதல்… குற்ற உணர்வை ஏற்படுத்துதல்
தவறு செய்துவிட்டு அதற்கான பொறுப்பை ஏற்காமல், நம்மையே குற்றவாளியாக உணர வைப்பது ‘Manipulation’ எனப்படும் கையாளுதல் நடத்தையாகும்.
தங்களுக்கு சாதகமான முடிவை எடுக்க வைப்பதற்காக உணர்ச்சிகளைப் பயன்படுத்துவதும் இதில் அடங்கும்.
எல்லைகளை வகுப்பது அவசியம்
இத்தகைய நபர்களை எதிர்கொள்ளும்போது முதலில் நம்முடைய எல்லைகளைத் தெளிவாக வைத்துக்கொள்ள வேண்டும்.
தேவையற்ற வாக்குவாதங்களில் சிக்காமல் அமைதியாக இருப்பது, காயப்படுத்தும் பேச்சை நேரடியாகச் சுட்டிக்காட்டுவது போன்றவை உதவியாக இருக்கும்.
அவர்களின் நடத்தை மாறாமல் தொடர்ந்து மன உளைச்சலை ஏற்படுத்தினால், அவர்களுடன் செலவிடும் நேரத்தை குறைப்பதும், தேவையான இடைவெளியை ஏற்படுத்துவதும் முக்கியம்.
குடும்பம், நட்பு அல்லது பணியிடம் என எந்த சூழலாக இருந்தாலும், தனிப்பட்ட மன அமைதிக்கும் சுயமரியாதைக்கும் முக்கியத்துவம் கொடுப்பது அவசியம்.
