இந்திய தலைமைத் தேர்தல் ஆணையர் ஞானேஷ் குமாரைப் பதவிநீக்கம் செய்ய நடவடிக்கை எடுக்க வேண்டும் என்று வலியுறுத்தி, குடியரசுத் தலைவர் திரவுபதி முர்முவுக்கு திமுக தலைவரும் முன்னாள் முதல்வருமான மு.க.ஸ்டாலின் கடிதம் எழுதியுள்ளார். தமிழ்நாட்டில் சிறப்பு தீவிர வாக்காளர் பட்டியல் திருத்தம் (SIR) மூலம் நீக்கப்பட்ட 97.37 லட்சம் வாக்காளர்கள் விவகாரத்தை உச்சநீதிமன்றத்தின் ஆய்வுக்கு உட்படுத்த வேண்டும், நாடு முழுவதும் SIR நடவடிக்கையை ரத்து செய்ய வேண்டும், மீண்டும் வாக்குச்சீட்டு முறையைக் கொண்டுவர வேண்டும் என்பது உள்ளிட்ட 9 முக்கிய கோரிக்கைகளை அவர் முன்வைத்துள்ளார்.
இது தொடர்பாக குடியரசுத் தலைவர் திரவுபதி முர்முவுக்கு மு.க.ஸ்டாலின் எழுதிய கடிதத்தில் கூறப்பட்டுள்ளதாவது:
தலைமைத் தேர்தல் ஆணையர் ஞானேஷ் குமாரைப் பதவிநீக்கம் செய்ய வேண்டும்
தலைமைத் தேர்தல் ஆணையர் ஞானேஷ் குமார், மற்ற 2 தேர்தல் ஆணையர்களையும் மீறி, சட்டவிரோதமாகவும் அரசியலமைப்புக்கு எதிராகவும் ஒருதலைப்பட்சமாகவும் அரசியல் சார்புடனும் செயல்பட்டுள்ளார்.
இதனால் அவரைப் பதவிநீக்கம் செய்ய நடவடிக்கை எடுக்க வேண்டும். இதற்காக அரசியலமைப்பின் 86(2)-வது பிரிவின்படி நாடாளுமன்றத்தின் இரு அவைகளுக்கும் குடியரசுத் தலைவர் செய்தி அனுப்ப வேண்டும்.
ஞானேஷ் குமாருக்கு எதிராக மனுவிலும் பொதுவெளியிலும் உள்ள குற்றச்சாட்டுகளை நாடாளுமன்றம் விசாரித்து, அரசியலமைப்பின் 324(5), 124(4) ஆகிய பிரிவுகள் மற்றும் 2023-ஆம் ஆண்டு சட்டத்தின் 11-வது பிரிவின்படி பதவிநீக்க நடவடிக்கை எடுக்க வேண்டும்.
ஞானேஷ் குமார் தனியாக முடிவெடுக்கக் கூடாது
ஞானேஷ் குமாருக்கு எதிரான நாடாளுமன்ற நடவடிக்கைகளுக்கு மத்திய அரசு ஒத்துழைக்க வேண்டும். இதற்காக அரசியலமைப்பின் 78-வது பிரிவின்படி பிரதமரிடம் குடியரசுத் தலைவர் விளக்கம் கேட்க வேண்டும். நாடாளுமன்ற நடவடிக்கை முடியும் வரை ஞானேஷ் குமார் தனியாகத் தேர்தல் ஆணையத்தின் அதிகாரங்களைப் பயன்படுத்தக் கூடாது.
தேர்தல் ஆணையத்தின் அனைத்து முடிவுகளும் மற்ற ஆணையர்களுடன் கலந்து ஆலோசித்து, 2023-ஆம் ஆண்டு சட்டத்தின் 18-வது பிரிவின்படி எடுக்கப்பட வேண்டும். அந்த முடிவுகள் அனைத்தும் கூட்டக் குறிப்புகளில் பதிவு செய்யப்பட வேண்டும்.
தமிழ்நாட்டில் 97.37 லட்சம் வாக்காளர்கள் நீக்கப்பட்டது குறித்து உச்சநீதிமன்றம் விசாரிக்க வேண்டும்
தமிழ்நாட்டில் 2025-ஆம் ஆண்டு மேற்கொள்ளப்பட்ட சிறப்பு தீவிர வாக்காளர் பட்டியல் திருத்தம் (SIR) மூலம் 97,37,832 வாக்காளர்களின் பெயர்கள் நீக்கப்பட்டுள்ளன. இந்தப் பெயர் நீக்கம் சட்டப்படி நடந்ததா என்பதை உச்சநீதிமன்றம் ஆராய வேண்டும்.
2026 பிப்ரவரி 23-ந் தேதி வெளியான இறுதி வாக்காளர் பட்டியலில், எந்தெந்த தொகுதிகளில், எந்தெந்த வாக்குச்சாவடிகளில் எத்தனை வாக்காளர்கள் நீக்கப்பட்டனர் என்பதையும் ஆய்வு செய்ய வேண்டும். இந்தப் பெயர் நீக்கங்களுக்கும் 2026 சட்டமன்றத் தேர்தல் முடிவுகளுக்கும் தொடர்பு உள்ளதா என்பதையும் ஆராய வேண்டும். இதற்காக அரசியலமைப்பின் 143-வது பிரிவின்படி உச்சநீதிமன்றத்தின் கருத்தைக் குடியரசுத் தலைவர் கேட்க வேண்டும்.
SIR வாக்காளர் பட்டியலைப் பயன்படுத்தக் கூடாது
தமிழ்நாட்டில் 2026 சட்டமன்றத் தேர்தலுக்காக SIR மூலம் தயாரிக்கப்பட்ட வாக்காளர் பட்டியலை இனி எந்தத் தேர்தலிலும் பயன்படுத்தக் கூடாது. வரும் சட்டமன்ற, நாடாளுமன்றத் தேர்தல்கள் மற்றும் இடைத்தேர்தல்களிலும் இந்தப் பட்டியலைப் பயன்படுத்த வேண்டாம் என்று தேர்தல் ஆணையத்திற்கு அறிவுறுத்த வேண்டும். SIR நடவடிக்கைக்கு முன்பு இருந்த பழைய வாக்காளர் பட்டியலை மீண்டும் கொண்டுவர வேண்டும். அதன் பின்னர் சட்டப்படி தேவையான திருத்தங்களை மேற்கொள்ள வேண்டும்.
அனைத்து மாநிலங்களிலும் SIR நடவடிக்கையை ரத்து செய்ய வேண்டும்
தமிழ்நாடு மட்டுமல்லாமல் இந்தியாவின் அனைத்து மாநிலங்களிலும் SIR நடவடிக்கையை முழுமையாக ரத்து செய்ய வேண்டும். வாக்காளர் பட்டியல் திருத்தம் என்பது மக்களின் வாக்குரிமையைப் பாதுகாப்பதற்காக இருக்க வேண்டுமே தவிர, வாக்குரிமையைப் பறிப்பதற்காக இருக்கக் கூடாது. இனி வாக்காளர் பட்டியலில் திருத்தம் செய்யும்போது, 1950-ஆம் ஆண்டு மக்கள் பிரதிநிதித்துவச் சட்டம் மற்றும் 1960-ஆம் ஆண்டு வாக்காளர் பதிவு விதிகளைப் பின்பற்ற வேண்டும்.
ஒவ்வொரு வாக்காளருக்கும் போதிய கால அவகாசம் வழங்க வேண்டும். பெயரை நீக்குவதற்கு முன்பு தனிப்பட்ட முறையில் அறிவிப்பு கொடுத்து, அவர்களின் விளக்கத்தைக் கேட்க வேண்டும்.
தேர்தல் ஆணையத்தின் மென்பொருள்களைச் சோதனை செய்ய வேண்டும்
வாக்காளர் பட்டியல் தொடர்பாகப் பயன்படுத்தப்படும் ECINET, ERONET ஆகிய மென்பொருள்களைச் சுயாதீன நிபுணர்கள் மூலம் முழுமையாக ஆய்வு செய்ய வேண்டும். இந்த ஆய்வைத் தேர்தல் ஆணையத்தின் கட்டுப்பாட்டில் இல்லாத நிபுணர்கள் மேற்கொள்ள வேண்டும். இந்த மென்பொருள்களை யார் பயன்படுத்த முடியும், யார் யார் பயன்படுத்தியுள்ளனர், வாக்காளர் பட்டியலில் எப்போது, என்னென்ன மாற்றங்கள் செய்யப்பட்டுள்ளன என்பதைக் கண்டுபிடிக்க வேண்டும்.
மேற்கு வங்கம் உள்ளிட்ட மாநிலங்களில் இந்த மென்பொருள்களுக்குக் கட்டுப்பாடுகள் விதிக்கப்பட்டதா, நீக்கப்பட்ட தகுதியுள்ள வாக்காளர்களின் பெயர்களை மீண்டும் சேர்ப்பதற்கு என்ன வழிமுறைகள் உள்ளன என்பதையும் ஆய்வு செய்ய வேண்டும்.
மேலும், 2025 ஜூன் 24-ந் தேதி SIR தொடர்பாக எடுக்கப்பட்ட முடிவுக்கான கோப்புகள், கூட்ட நிகழ்ச்சி நிரல்கள், கூட்டக் குறிப்புகள், தேர்தல் ஆணையர்களின் கருத்துகள் மற்றும் எதிர்ப்புகள் உள்ளிட்ட அனைத்து ஆவணங்களையும் பாதுகாக்க வேண்டும்.
மற்ற தேர்தல் ஆணையர்களின் ஒப்புதல் இல்லாமல் எடுத்த முடிவுகள் செல்லுமா?
தேர்தல் ஆணையத்தில் பெரும்பான்மை உறுப்பினர்களின் ஒப்புதல் இல்லாமல், தலைமைத் தேர்தல் ஆணையர் தனியாக எடுத்த முடிவுகள் சட்டப்படி செல்லுமா என்பதை ஆராய வேண்டும். 2023-ஆம் ஆண்டு சட்டத்தின் 18-வது பிரிவின்படி, பெரும்பான்மை ஆணையர்களின் ஒப்புதல் இல்லாமல் தேர்தல் ஆணையத்தின் பெயரில் பிறப்பிக்கப்பட்ட உத்தரவுகள் செல்லுமா என்பது குறித்து உச்சநீதிமன்றத்தின் கருத்தைக் கேட்க வேண்டும். இதற்காக அரசியலமைப்பின் 143-வது பிரிவின்படி குடியரசுத் தலைவர் உச்சநீதிமன்றத்திற்குப் பரிந்துரை அனுப்ப வேண்டும்.
மீண்டும் வாக்குச்சீட்டு முறையைக் கொண்டுவர வேண்டும்
தேர்தல் நடைமுறையின் மீது மக்களுக்கு மீண்டும் நம்பிக்கை ஏற்பட நடவடிக்கை எடுக்க வேண்டும். இதற்காக மின்னணு வாக்குப்பதிவு இயந்திரங்களுக்குப் (EVM) பதிலாக, பழைய வாக்குச்சீட்டு முறையில் தேர்தல்களை நடத்த வேண்டும். வாக்குச்சீட்டு முறை கொண்டுவரப்படும் வரை, மின்னணு வாக்குப்பதிவு இயந்திரங்கள் பயன்படுத்தப்படும் தேர்தல்களில் VVPAT இயந்திரங்களில் பதிவாகும் ஒப்புகைச் சீட்டுகள் அனைத்தையும், அதாவது 100 சதவிகித சீட்டுகளையும் எண்ண வேண்டும். அவற்றை மின்னணு இயந்திரங்களில் பதிவான வாக்குகளுடன் ஒப்பிட்டுச் சரிபார்க்க வேண்டும்.
மக்களின் வாக்குரிமையைப் பாதுகாக்க நடவடிக்கை எடுக்க வேண்டும்
இந்தியக் குடிமக்கள் ஒவ்வொருவரின் வாக்குரிமையும் பாதுகாக்கப்பட வேண்டும். தேர்தல் நடைமுறையின் மீது மக்களுக்கு நம்பிக்கை ஏற்பட வேண்டும். இதற்காக குடியரசுத் தலைவர் தமக்கு அரசியலமைப்பு வழங்கியுள்ள அதிகாரங்களைப் பயன்படுத்தி, தேவையான மற்ற நடவடிக்கைகளையும் மேற்கொள்ள வேண்டும். இவ்வாறு மு.க.ஸ்டாலின் தெரிவித்துள்ளார்.
