வீட்டில் பிரியாணி செய்தாலும், ஹோட்டரில் சாப்பிட்டாலும் அந்த மணமும் சுவையும் தனியாகத் தெரியும். அதற்கு மசாலா மட்டுமல்ல, பயன்படுத்தும் அரிசியும் முக்கிய காரணம். குறிப்பாக தமிழ்நாட்டு பாணி பிரியாணியில் சீரக சம்பா அரிசிக்கு தனி இடம் உண்டு.
சீரக சம்பாவின் ஸ்பெஷல் என்ன?
சீரகத்தைப் போல சிறிய வடிவில் இருப்பதால் சீரக சம்பா என அழைக்கப்படும் இந்த அரிசி, சமைக்கும்போது இயற்கையான மணத்தை வெளிப்படுத்துகிறது. மேலும் பிரியாணியில் சேர்க்கப்படும் மசாலா, இறைச்சி உள்ளிட்டவற்றின் சுவையை நன்றாக உள்வாங்கும் தன்மை கொண்டது. இதனால் திண்டுக்கல், ஆம்பூர், வாணியம்பாடி உள்ளிட்ட தமிழ்நாட்டு பாணி பிரியாணிகளில் இது பரவலாகப் பயன்படுத்தப்படுகிறது.
பொன்னி அரிசியில் என்ன வித்தியாசம்?
பொன்னி அரிசி அன்றாட சமையலுக்கு மிகவும் பரவலாகப் பயன்படுத்தப்படும் வகையாகும். இதில் சமைக்கும் சாதம் மென்மையாகவும் உதிரியாகவும் இருப்பதால் சாம்பார், ரசம், குழம்பு போன்றவற்றுடன் சாப்பிட ஏற்றதாக இருக்கிறது. பொன்னி பச்சரிசி, பொன்னி புழுங்கல் என இரு வகைகளும் உள்ளன. ஆனால் சீரக சம்பாவுடன் ஒப்பிடும்போது பொன்னியில் அந்த தனித்துவமான மணம் குறைவாக இருக்கும்.
எந்த உணவுக்கு எந்த அரிசி?
மணமும் மசாலா சுவையும் நிறைந்த பிரியாணி செய்ய விரும்பினால் சீரக சம்பா நல்ல தேர்வாக இருக்கும். தினசரி சாதத்திற்கு பொன்னி பச்சரிசி அல்லது புழுங்கல் அரிசியை பயன்படுத்தலாம். இட்லி அரிசியிலும் சாதம் செய்ய முடியும் என்றாலும், அதன் பதம் பொன்னி சாதத்தைப் போல இருக்காது.
சீரக சம்பாவின் விலை சற்று அதிகமாக இருந்தாலும், பிரியாணியில் கிடைக்கும் தனித்துவமான மணம் மற்றும் சுவை காரணமாக அதற்கு தனி ரசிகர்கள் உள்ளனர். அரிசியின் வகை மட்டுமல்லாமல், ஊறவைக்கும் நேரம் மற்றும் தண்ணீரின் அளவும் இறுதி பதத்தை தீர்மானிக்கும்.
