அரசாங்கத்தால் வெளியிடப்பட்ட தரவுகளின்படி, சில்லறைப் பணவீக்கம் (Retail Inflation) பிப்ரவரியில் 3.21 சதவீதமாக இருந்த நிலையில் மார்ச் மாதத்தில் 3.4 சதவீதமாக சிறிதளவு உயர்ந்துள்ளது. வளைகுடா நாடுகளில் நிலவும் பதற்றம் காரணமாக விநியோகச் சங்கிலி (Supply Chain) பாதிக்கப்பட்டுள்ளதால் விலைகள் பாதிக்கப்பட்டுள்ளன. நுகர்வோர் விலைக் குறியீட்டு (CPI) தரவுகளின் அடிப்படையில், மார்ச் மாதத்தில் உணவுப் பொருட்களின் விலை உயர்வு விகிதம் 3.87 சதவீதமாக இருந்தது. இது முந்தைய மாதமான பிப்ரவரியில் இருந்த 3.47 சதவீதத்தை விட அதிகமாகும். கிராமப்புறங்களில் சில்லறைப் பணவீக்கம் 3.63 சதவீதமாகவும், நகர்ப்புறங்களில் 3.11 சதவீதமாகவும் பதிவு செய்யப்பட்டுள்ளது.
கச்சா என்ணெய், தங்கம் மற்றும் வெள்ளி விலை:
மார்ச் மாதத்தில் கச்சா எண்ணெய் விலைகளில் ஒரு பெரிய உயர்வு காணப்பட்டது. இருப்பினும், தங்கம் மற்றும் வெள்ளி விலைகளில் ஏற்பட்ட சரிவு இந்த உயர்வை கணிசமாக ஈடுசெய்தது. இந்த பணவீக்க அதிகரிப்பு இருந்தபோதிலும், திருத்தப்பட்ட கட்டமைப்பின் கீழ் தொடர்ந்து 12 மாதங்களாக இந்திய ரிசர்வ் வங்கியின் 4% (2% முதல் 6%) என்ற நடுத்தர கால இலக்கு வரம்பிற்குக் கீழே பணவீக்கம் இருந்து வருகிறது.
புள்ளிவிவரங்கள் மற்றும் திட்ட அமலாக்க அமைச்சகம் வெளியிட்ட தரவுகளின்படி, உணவுப் பணவீக்கம் பிப்ரவரியில் 3.47% ஆக இருந்த நிலையில், மார்ச் மாதத்தில் 3.87% ஆக உயர்ந்துள்ளது. நுகர்வோர் விலைக் குறியீட்டு (CPI) தொகுப்பில் உணவுப் பணவீக்கமே மிகப்பெரிய பங்கைக் கொண்டுள்ளது. மேலும், மின்சாரம், எரிவாயு மற்றும் பிற எரிபொருட்கள் பிரிவில் பணவீக்கம் 1.65% ஆக இருந்தது.
காய்கறி விலை:
சில முக்கிய சமையலறைப் பொருட்களின் விலைகள் மார்ச் மாதத்தில் தொடர்ந்து சரிந்தன. பூண்டு விலை பிப்ரவரியில் 31.10% ஆக இருந்த நிலையில், மார்ச் மாதத்தில் 10.18% சரிந்தது. வெங்காய விலை 27.76% சரிந்தது. இது முந்தைய மாதத்தின் 28.20% சரிவை விட சற்றே குறைவுதான். உருளைக்கிழங்கு விலையும் பிப்ரவரியில் -18.47% ஆக இருந்த நிலையில், மார்ச் மாதத்தில் -18.98% என்ற எதிர்மறை மண்டலத்திலேயே நீடித்தது.
வீட்டுவசதிப் பணவீக்கம் பிப்ரவரியில் 2.12% ஆக இருந்த நிலையில், மார்ச் மாதத்தில் 2.11% ஆக இருந்தது. ஆடை மற்றும் காலணிப் பணவீக்கம் பிப்ரவரியில் 2.81% ஆக இருந்த நிலையில், மார்ச் மாதத்தில் 2.75% ஆகப் பதிவு செய்யப்பட்டது.