ஒரு நேர்முகத் தேர்விலோ அல்லது அலுவலக மீட்டிங்கிலோ நீங்கள் எவ்வளவு அறிவாளி என்பது உங்களின் வார்த்தைகளில் தெரிவதற்கு முன்னரே, உங்கள் உடல் மொழியில் தெரிந்துவிடும். ஆய்வுகளின்படி, மனிதத் தொடர்பாடலில் 7% மட்டுமே வார்த்தைகள்; 38% குரல் தொனி, மீதமுள்ள 55% உடல் மொழிதான் ஆதிக்கம் செலுத்துகிறது.
நீங்கள் பேசாமலே உங்களைப் பற்றிப் பிறருக்கு உணர்த்தும் இந்த ‘நான்-வெர்பல்’ (Non-verbal) மொழி, உங்கள் பணி வாழ்க்கையின் வெற்றிக்கு மிக அவசியம்.
1. முதல் அபிப்ராயம் (First Impression):
அலுவலகத்திற்குள் நுழையும்போதோ அல்லது ஒருவரைக் கைகுலுக்கி வரவேற்கும்போதோ உங்கள் தோரணை (Posture) முக்கியம்.
குனிந்த தலை, சுருங்கிய தோள்கள் உங்களைப் பயந்த சுபாவம் உள்ளவராகக் காட்டும்.
நிமிர்ந்த நடை, நேரான பார்வை, உறுதியான கைகுலுக்கல் (Firm Handshake) ஆகியவை நீங்கள் தன்னம்பிக்கை மிக்கவர் என்பதைச் சொல்லாமல் சொல்லும்.
2. கண் தொடர்பு (Eye Contact):
பேசும்போது எதிரில் இருப்பவரின் கண்களைப் பார்த்துப் பேசுவது நம்பிக்கையின் அடையாளம்.
நீங்கள் கண்ணைப் பார்த்துப் பேசினால், “நான் சொல்வது உண்மை, நான் உங்களை மதிக்கிறேன்” என்று அர்த்தம்.
அதேசமயம், முறைத்துப் பார்க்காமல், இயல்பாகப் பார்ப்பது அவசியம். தரையைப் பார்த்துக் கொண்டோ அல்லது வேறு எங்கோ பார்த்துக்கொண்டோ பேசினால், உங்களுக்கு ஆர்வமில்லை அல்லது நீங்கள் எதையோ மறைக்கிறீர்கள் என்று அர்த்தமாகிவிடும்.
3. கைகளின் நிலை (Open Gestures):
மீட்டிங்கில் அமரும்போது பலரும் கைகளைக் மார்புக்கு குறுக்காகக் கட்டிக்கொண்டு (Crossed Arms) அமர்வார்கள். இது ஒரு ‘தற்காப்பு நிலை’ (Defensive). அதாவது, “நான் எதையும் கேட்கத் தயாராக இல்லை” அல்லது “எனக்கு இதில் உடன்பாடில்லை” என்பதை இது குறிக்கும்.
அதற்குப் பதிலாக, கைகளைத் திறந்து வைத்துக்கொண்டு (Open palms) பேசுவது, நீங்கள் மற்றவர் கருத்துக்களை ஏற்கத் தயாராக இருக்கிறீர்கள் என்பதைக் காட்டும்.
4. அமரும் விதம்:
நாற்காலியில் சரிந்து உட்கார்வது (Slouching) சோம்பேறித்தனத்தின் அடையாளம். அதேசமயம் நுனியில் அமர்வது பதற்றத்தின் அடையாளம். முதுகுத்தண்டு நேராக இருக்கும்படி நிமிர்ந்து அமர்வதே ‘புரொபஷனல்’ முறை.
5. புன்னகை என்னும் ஆயுதம்:
இறுக்கமான முகத்துடன் இருந்தால் யாரும் உங்களை நெருங்கத் தயங்குவார்கள். அளவான புன்னகை, உங்களை அணுகக்கூடிய நபராகவும் (Approachable), பாசிட்டிவ் ஆனவராகவும் மாற்றும்.
திறமையும், கடின உழைப்பும் உங்களுக்கு வேலையை வாங்கித் தரும்; ஆனால், சரியான உடல் மொழிதான் உங்களுக்குப் பதவி உயர்வையும், மரியாதையையும் பெற்றுத் தரும். அடுத்த முறை மீட்டிங் செல்லும்போது உங்கள் வார்த்தைகளை மட்டுமல்ல, உங்கள் தோரணையும் கவனியுங்கள்!