ஹேர் டிரையர், ஸ்ட்ரெயிட்டனர், கர்லிங் ஐரன் போன்ற ஹீட் ஸ்டைலிங் கருவிகள் முடிக்கு அழகான தோற்றத்தை கொடுத்தாலும், அடிக்கடி பயன்படுத்தினால் முடி வறட்சி, நுனி பிளவு, உடைதல் மற்றும் பொலிவு இழப்பு போன்ற பிரச்சினைகள் ஏற்படலாம். ஆனால் சில எளிய பராமரிப்பு முறைகளைப் பின்பற்றினால், வெப்பத்தால் ஏற்படும் சேதத்தை கணிசமாகக் குறைத்து முடியை ஆரோக்கியமாக வைத்திருக்க முடியும்.
முடிக்கு போதுமான ஈரப்பதம் கொடுங்கள்
வெப்பம் முடியின் இயற்கை ஈரப்பதத்தை குறைத்து வறட்சியை ஏற்படுத்தும். அதனால் ஈரப்பதம் தரும் ஷாம்பு மற்றும் கண்டிஷனரை பயன்படுத்துவது முக்கியம். வாரத்திற்கு ஒரு முறை டீப் கண்டிஷனிங் அல்லது ஹேர் மாஸ்க் பயன்படுத்தினால் முடி மென்மையாகவும் வலுவாகவும் இருக்கும்.
ஹீட் புரொடெக்டண்ட் பயன்படுத்தாமல் ஸ்டைலிங் செய்யாதீர்கள்
ஹேர் டிரையர் அல்லது ஸ்ட்ரெயிட்டனர் பயன்படுத்தும் முன் Heat Protectant Spray அல்லது Serum பயன்படுத்துவது அவசியம். இது முடியைச் சுற்றி ஒரு பாதுகாப்பு அடுக்கை உருவாக்கி, ஈரப்பதம் இழப்பதையும் வெப்பத்தால் ஏற்படும் சேதத்தையும் குறைக்க உதவுகிறது. கூடுதலாக, முடிக்கு மென்மை மற்றும் பொலிவையும் தருகிறது.
அதிக வெப்பநிலையைத் தவிர்க்கவும்
அதிக வெப்பத்தில் ஸ்டைலிங் செய்வதால் முடியின் புரத அமைப்பு பாதிக்கப்படலாம். எனவே, தேவையான அளவு மட்டுமே வெப்பநிலையை பயன்படுத்துங்கள். ஒரே இடத்தில் ஸ்ட்ரெயிட்டனரை நீண்ட நேரம் வைத்திருக்காமல், கர்லிங் ஐரனை 5–10 விநாடிகளுக்கு மேல் பயன்படுத்த வேண்டாம்.
ஈரமான முடியில் ஹீட் கருவிகளை பயன்படுத்தாதீர்கள்
முடி முழுமையாக உலராமல் ஹீட் கருவிகளை பயன்படுத்தினால் “சிழ்” என்ற சத்தம் கேட்கும். இது முடிக்குள் இருக்கும் ஈரப்பதம் திடீரென ஆவியாகி, முடி அமைப்பை சேதப்படுத்துவதை குறிக்கிறது. எனவே, முடி முழுமையாக உலர்ந்த பிறகே ஹீட் ஸ்டைலிங் செய்ய வேண்டும்.
தினமும் ஹீட் ஸ்டைலிங் செய்ய வேண்டாம்
தினசரி ஹேர் டிரையர் அல்லது ஸ்ட்ரெயிட்டனர் பயன்படுத்துவதைத் தவிர்த்து, வாரத்தில் சில நாட்கள் இயற்கையாக முடியை உலர விடுங்கள். இயற்கையான முடி அமைப்பை ஏற்றுக்கொள்வது அல்லது பின்னல், கொண்டை போன்ற ஹீட் இல்லாத ஸ்டைல்களைத் தேர்வு செய்வது முடிக்கு ஓய்வளிக்கும்.
ஸ்டைலிங் முடிந்த பிறகு ஹேர் ஆயில் பயன்படுத்துங்கள்
ஸ்டைலிங் முடிந்ததும் சில துளிகள் ஹேர் ஆயிலை முடியின் நுனிப்பகுதியில் தடவினால், இழந்த ஈரப்பதம் மீண்டும் கிடைத்து, முடி மென்மையாகவும் பளபளப்பாகவும் இருக்கும். அதேசமயம் நுனி பிளவு மற்றும் உலர்வையும் குறைக்க உதவும்.
