முடி கொட்டுவது பலருக்கும் பெரிய கவலை. விலை அதிகமான ஷாம்பு, ஹேர் சீரம் என்று வாங்கிப் பயன்படுத்துவோரும் உண்டு. ஆனால், நாம் தலைக்குக் குளிக்கும் விதத்திலேயே சில பழக்கங்கள் முடியை வறண்டு போகவும் உடையவும் வைத்துவிடுகின்றன.
முடியை வேகமாகத் தேய்ப்பது, ரொம்பச் சூடான தண்ணீர் ஊற்றுவது, ஈரமுடியைத் துண்டால் இறுக்கிக் கட்டுவது போன்றவற்றை முதலில் நிறுத்துங்கள். அப்புறம் வேறென்னென்ன விஷயங்களில் கவனம் வேண்டும்?
ரொம்பச் சூடான தண்ணீரில் தலைக்குக் குளிக்காதீர்கள்
சுடுதண்ணீரில் குளித்தால் உடம்புக்கு இதமாக இருக்கலாம். ஆனால் அதிகச் சூடு முடியில் இருக்கும் ஈரப்பதத்தைப் பறித்து, முடியை வறட்சியாக்கி எளிதில் உடைய வைத்துவிடும். அதனால் தலைக்கு மிதமான வெதுவெதுப்பான நீரே போதும். தண்ணீரின் சூட்டைவிட, முடியையும் உச்சந்தலையையும் மென்மையாகக் கையாள்வதுதான் முக்கியம்.
ஷாம்பு போடும்போது அழுத்தித் தேய்க்காதீர்கள்
அழுக்கு போக வேண்டும் என்று சிலர் விரலால் முடியை அழுத்தி அழுத்தித் தேய்ப்பார்கள். முடி ஈரமாக இருக்கும்போது அது எளிதில் சேதமாகும், அதனால் இப்படிச் செய்யாதீர்கள். ஷாம்புவை உச்சந்தலையில் வைத்து, விரல் நுனியால் மெதுவாக மசாஜ் செய்து, நன்றாக அலசினால் போதும். முடியின் நீளப்பகுதியை வீணாகத் தேய்க்க வேண்டாம்.
ஷாம்பு, கண்டிஷனர் விஷயத்தில் கவனம்
உங்கள் முடியின் தன்மைக்குப் பொருந்தும் ஷாம்புவைத் தேர்ந்தெடுங்கள். எண்ணெய்ப் பசையும் அழுக்கும் அதிகம் இருந்தால் தேவைக்கேற்பத் தலைக்குக் குளிக்கலாம். தினமும் தலைக்குக் குளிப்பது எல்லோருக்கும் தவறு என்றும் சொல்ல முடியாது.
உங்கள் முடிக்கு எது ஒத்துவருகிறதோ அதற்கேற்ப ஷாம்பு போடும் முறையை முடிவு செய்யுங்கள். கண்டிஷனரை முடியின் நடுப்பகுதியிலிருந்து நுனி வரை தடவினால் வறட்சியும் சிக்கலும் குறையும்.
ஈரமுடியைத் துண்டால் இறுக்கிக் கட்டாதீர்கள்
குளித்ததும் துண்டை வைத்து முடியை இறுக்கிச் சுற்றிக் கட்டுவது பலரின் வழக்கம். ஈரமுடியை அழுத்தித் தேய்ப்பதும், இழுத்து முறுக்குவதும் முடி உடைவதற்கு வழிவகுக்கும். மென்மையான துண்டால் ஒற்றி ஈரத்தை எடுத்துவிட்டு, முடியை அதுவாகவே காய விடுங்கள். ஹேர் டிரையர் பயன்படுத்தினால் குறைந்த சூட்டில் வையுங்கள்.
முடி கொட்டுவது அதிகமாக இருந்தால்?
குளிக்கும் முறையை மாற்றினால் முடி உடைவது குறையலாம். ஆனால் முடி கொட்டுவதற்குக் காரணங்கள் பல. சத்துக் குறைபாடு, தைராய்டு பிரச்சினை, மன அழுத்தம், பரம்பரைத் தன்மை ஆகியவையும் இதில் பங்கு வகிக்கலாம். தொடர்ந்து அதிகமாகக் கொட்டிக்கொண்டே இருந்தால் தோல் மருத்துவரைப் பார்ப்பது நல்லது.
