ஜெம் வீரமணி வழக்கில் பாதிக்கப்பட்ட சிறுமிகளுக்கு நீதி பெற்றுத் தர வேண்டும் என்று முன்னாள் முதல்வர் ஸ்டாலின் கூறியுள்ளார்.
ஜெம் கிராணைட்ஸ் தொழிலதிபர் வீரமணி பாலியல் வழக்கில் கைது செய்யப்பட்டு சிறையில் அடைக்கப்பட்டுள்ளார். இந்த வழக்கில் தோண்ட தோண்ட பூதம் வரும் கணக்காக ஜெம் வீரமணி விவகாரத்தில் தினம்தோறும் பல்வேறு தகவல்கள் வந்து கொண்டிருக்கின்றன.
இந்த வழக்கில் தவெகவினர் முந்தைய திமுக அரசு மீது குற்றச்சாட்டுகளை முன்வைத்து வருகின்றனர். குறிப்பாக அமைச்சர் சிடிஆர் நிர்மல் குமார், முன்னாள் முதல்வர் ஸ்டாலினுக்கு தெரியாமல் இந்த வழக்கு மறைக்கப்பட்டிருக்காது என்ற வகையில் பேசியிருந்தார். இதற்கு திமுக மூத்த வழக்கறிஞர் என்.ஆர்.இளங்கோ, முன்னாள் சட்டத்துறை அமைச்சர் ரகுபதி ஆகியோர் மறுப்புத் தெரிவித்து விளக்கம் அளித்தனர்.
இந்தசூழலில் ஜெம் வீரமணி வழக்கு தொடர்பாக திமுக தலைவரும் முன்னாள் முதல்வருமான ஸ்டாலின் இன்று (செப்டம்பர் 24) அறிக்கை வெளியிட்டுள்ளார்.
அதில், ”சிறுமிகளுக்கு எதிரான மனிதத்தன்மையற்ற இழிவான செயல்களில் ஈடுபட்ட குற்றச்சாட்டுகளின் அடிப்படையில் ஜெம் வீரமணி கைது செய்யப்பட்டுள்ளார்.
இதில் வீரமணியும், அவருக்கு உடந்தையாக இருந்தவர்கள், அவரைக் காப்பாற்ற முயன்றவர்கள் எவராயினும், எத்தகைய பொறுப்பில் இருந்தவர்கள் ஆயினும் தப்பிக்க கூடாது.
அனைவரும் சட்டத்தின் முன் நிறுத்தப்பட்டு, அதிகபட்ச தண்டனையைப் பெற்றுத் தர வேண்டும். இதுதான் திராவிட முன்னேற்றக் கழகத்தின் நிலைப்பாடு. இந்த வழக்கின் முடிவு, இனி இத்தகைய குற்றச்செயல்களில் ஈடுபடும் எண்ணமே எவருக்கும் வராத வகையில் அமைய வேண்டும் என்பதுதான் ஓர் அரசியல் இயக்கத்தின் தலைவனாகவும், ஒரு குடும்பத்தலைவனாகவும், மனசாட்சி உள்ள மனிதனாகவும் எனது விருப்பம்.
ஆனால், இந்த வழக்கில் தேவையே இல்லாமல், குறுகிய அரசியல் நோக்கத்துடன் தி.மு.கழகத்தின் மீது பொய்யாக அவதூறுகளைப் பரப்பி, ஒரு கூட்டம் குளிர்காய்ந்து வருவது மிகவும் அருவெறுப்பான செயலாகும். வீரமணி வழக்கில் யாரையும் காப்பாற்ற எந்த உத்தரவும் கழக ஆட்சியில் பிறப்பிக்கப்படவில்லை.
பெண்கள், சிறுமிகளுக்கு எதிரான குற்ற வழக்குகளில் பாரபட்சமின்றி குற்றவாளிகள் கைது செய்யப்பட்டு, குற்றப்பத்திரிகையும் தாக்கல் செய்யப்பட்டு, தண்டனை பெற்றுத் தரப்பட்டது. இவை அனைத்தும் பொதுவெளியில் இருக்கும், மறுக்க முடியாத உண்மைகள் ஆகும். எவரையும் காப்பாற்ற வேண்டிய தேவை கழக ஆட்சிக்கு இல்லை.
தற்போதைய த.வெ.க. ஆட்சியில் நடப்பதுபோல, சட்டமன்ற உறுப்பினர்கள், மாவட்டச் செயலாளர்கள் உள்ளிட்ட கட்சி நிர்வாகிகள் மீது அனைத்துப் பத்திரிகைகளின் முன்பும் பாதிக்கப்பட்ட பெண்கள் பாலியல் குற்றச்சாட்டுகளை முன்வைத்த பின்னரும், நடவடிக்கை எடுக்காமல், சமரசம் பேசி வழக்கை முடித்து வைக்கும் இழிசெயல்கள் கழக ஆட்சியில் நடைபெறவில்லை.
எனவே, சிறுமிகளுக்கு ஏற்பட்ட துயரத்தை இடைத்தேர்தலுக்கான கருவியாகப் பயன்படுத்தும் இழிவான செயலையும், முற்றிலும் பொய்யான அவதூறுகளை ஊடகங்கள் மூலமாக பரப்புவதையும் ஆளும்கட்சியினர் நிறுத்திக் கொள்ள வேண்டும். பாதிக்கப்பட்ட சிறுமிகளுக்கு நீதி பெற்றுத் தருவது மட்டுமே நம் அனைவரின் நோக்கமாகவும் இருக்க வேண்டும்” என்று கூறியுள்ளார்.
