வாக்காளர் பட்டியல் சிறப்பு திருத்தத்துக்காக (SIR) பெறப்பட்ட விண்ணப்பங்களை பூர்த்தி செய்து ஒப்படைக்க டிசம்பர் 11-ந் தேதி வரை காலக்கெடுவை இந்திய தேர்தல் ஆணையம் நீட்டித்துள்ளது.
தமிழ்நாடு உட்பட 12 மாநிலங்களில் வாக்காளர் பட்டியல் சிறப்பு தீவிர திருத்தத்தை (SIR) இந்திய தேர்தல் ஆணையம் மேற்கொண்டு வருகிறது. தற்போது வாக்காளர்களிடம் கணக்கீட்டுப் படிவங்கள் ஒப்படைக்கப்பட்டுள்ளன. வாக்காளர்கள் பூர்த்தி செய்யப்பட்ட விண்ணப்பங்களை பெறும் வாக்குச் சாவடி அலுவலர்கள் இணையத்தில் பதிவேற்றம் செய்து வருகின்றனர்.
வாக்காளர்கள் தாங்கள் விண்ணப்ப படிவங்களை பூர்த்தி செய்து ஒப்படைக்க டிசம்பர் 4-ந் தேதி கடைசி நாள் என்றும் டிசம்பர் 9-ந் தேதி வரைவு வாக்காளர் பட்டியல் வெளியிடப்படும் என்றும் தேர்தல் ஆணையம் அறிவித்திருந்தது.
இந்நிலையில் இந்திய தேர்தல் ஆணையம் இன்று வெளியிட்ட அறிக்கையில், பூர்த்தி செய்யப்பட்ட விண்ணப்பங்களை ஒப்படைக்க டிசம்பர் 11-ந் தேதி வரை அவகாசம் அளித்துள்ளது.
மேலும் வரைவு வாக்காளர் பட்டியல் டிசம்பர் 16-ந் தேதி வெளியிடப்படும்; வாக்காளர்கள் தங்களது ஆட்சேபனைகளை ஜனவரி 15-ந் தேதி வரை தெரிவிக்கலாம் என்றும் தேர்தல் ஆணையம் தெரிவித்துள்ளது. இறுதி வாக்காளர் பட்டியல் பிப்ரவரி 14-ந் தேதி வெளியிடப்படும் எனவும் தேர்தல் ஆணையம் கூறியுள்ளது.