மார்கழி, தை மாதக் குளிர்காற்று பெரியவர்களையே நடுங்க வைக்கும்போது, பூப்போல இருக்கும் பச்சிளம் குழந்தைகளின் (Infants) நிலைமை என்னவாகும்? பெரியவர்களை விடக் குழந்தைகளின் நோய் எதிர்ப்பு சக்தி குறைவாக இருக்கும் என்பதால், இந்தக் காலத்தில் அவர்களுக்குச் சளி, காய்ச்சல் மற்றும் வறண்ட சருமம் போன்ற பிரச்சனைகள் எளிதில் வரக்கூடும். இந்தக் குளிர்காலத்தில் உங்கள் மழலையின் ஆரோக்கியத்தைக் காக்க, இதோ சில எளிய மற்றும் அவசியமான பராமரிப்புக் குறிப்புகள்.
1. “லேயரிங்” (Layering) முறை அவசியம்: குழந்தைக்குக் குளிர் தாங்காது என்று ஒரேயடியாகக் கனமான ஸ்வெட்டர்களைப் போட்டு மூச்சுமுட்ட வைக்காதீர்கள். அதற்குப் பதிலாக ‘லேயரிங்’ முறையைப் பின்பற்றுங்கள். முதலில் மெல்லிய பருத்தி ஆடையை அணிவித்து, அதற்கு மேல் கம்பளி ஆடைகளை அணிவிக்கலாம். இது வெப்பத்தை உள்ளே தக்கவைக்க உதவும். குழந்தையின் தலை, உள்ளங்கை மற்றும் பாதங்களை சாக்ஸ் மற்றும் குல்லா கொண்டு மூடி வைப்பது மிக முக்கியம்.
2. மசாஜ் மற்றும் குளியல்: குளிர்காலத்தில் குழந்தையைத் தினமும் குளிப்பாட்ட வேண்டும் என்று அவசியமில்லை; ஒரு நாள் விட்டு ஒரு நாள் குளிப்பாட்டலாம். ஆனால், குளிப்பதற்கு முன் தேங்காய் எண்ணெய் அல்லது பாதாம் எண்ணெய் கொண்டு நன்கு மசாஜ் செய்வது ரத்த ஓட்டத்தை அதிகரித்து உடலுக்குச் சூட்டைத் தரும்.
- எச்சரிக்கை: குளிப்பாட்ட அதிகச் சூடான நீரைப் பயன்படுத்தாதீர்கள். அது குழந்தையின் மென்மையான சருமத்தை வறட்சியடையச் செய்யும். வெதுவெதுப்பான நீரே (Lukewarm water) போதுமானது.
3. சருமப் பராமரிப்பு: குளிர்காற்று குழந்தையின் சருமத்தை எளிதில் வறண்டு போகச் செய்யும். எனவே, குளித்த உடனேயே, ஈரம் இருக்கும்போதே மென்மையான மாய்ஸ்சரைசர் (Moisturizer) அல்லது லோஷனைத் தடவுங்கள். இது நாள் முழுவதும் சருமத்தை மென்மையாக வைக்கும்.
4. தாய்ப்பால் என்னும் அமிர்தம்: 6 மாதத்திற்குக் குறைவான குழந்தர்களுக்குத் தாய்ப்பால் மட்டுமே போதுமானது. தாய்ப்பாலில் உள்ள ஆன்டி-பாடிகள் (Antibodies), குழந்தைக்குத் தேவையான நோய் எதிர்ப்பு சக்தியை அளித்து, சளி மற்றும் தொற்றுகளில் இருந்து பாதுகாக்கிறது. எனவே, அடிக்கடி தாய்ப்பால் கொடுப்பது, குழந்தையை ‘ஹைட்ரேட்டாக’ (Hydrated) வைத்துக்கொள்ளவும் உதவும்.
5. சுத்தம் மற்றும் சுகாதாரம்: குளிர்காலத்தில் வைரஸ் தொற்றுகள் எளிதில் பரவும். எனவே, குழந்தையைத் தொடுவதற்கு முன் கைகளைச் சுத்தமாகக் கழுவுங்கள். வீட்டில் யாருக்காவது சளி, இருமல் இருந்தால், அவர்களைக் குழந்தையின் அருகில் செல்ல அனுமதிக்காதீர்கள். காலையில் சிறிது நேரம் குழந்தையை மிதமான சூரிய ஒளியில் காட்டுவது வைட்டமின்-டி கிடைக்க உதவும்.
குழந்தையின் மூச்சு விடுதலில் சிரமம் இருந்தாலோ, தொடர்ந்து அழுதுகொண்டே இருந்தாலோ அல்லது காய்ச்சல் வந்தாலோ, தாமதிக்காமல் மருத்துவரை அணுகுங்கள். சிறு சிறு கவனக்குறைவுகளைத் தவிர்த்தாலே, இந்தக் குளிர்காலத்தை உங்கள் குழந்தை ஆரோக்கியமாகக் கடந்துவிடும்!