திருமண வீட்டு விருந்தில் பரிமாறப்படும் கேசரிக்கு எப்போதுமே தனி மவுசு உண்டு. நெய் மணம், முந்திரி பருப்பின் மொறுமொறுப்பு, வாயில் போட்டதும் கரையும் மென்மை என அதன் சுவையே தனி. வழக்கமான ரவை கேசரிக்குப் பதிலாகப் பழங்களைச் சேர்த்துச் செய்தால் சுவையும் மணமும் இன்னும் கூடுதலாக இருக்கும்.
அந்த வகையில், வீட்டிலேயே எளிதாகச் செய்யக்கூடிய அன்னாசி, ஆப்பிள், மாம்பழ கேசரி வகைகளைப் பார்ப்போம்.
1. நறுமணம் வீசும் அன்னாசி கேசரி
தேவையான பொருட்கள்:
- ரவை – 1 கப்
- நெய் – கால் கப்
- நறுக்கிய அன்னாசிப்பழம் – அரை கப்
- பால் – அரை கப்
- சர்க்கரை – முக்கால் கப்
- தண்ணீர் – இரண்டரை கப்
- ஏலக்காய்த்தூள் – 1 டீஸ்பூன்
- முந்திரி, திராட்சை – தலா 10
செய்முறை:
அன்னாசிப்பழத்தைச் சிறிது தண்ணீர் சேர்த்து விழுதாக அரைத்துக்கொள்ளவும். ஒரு பாத்திரத்தில் தண்ணீர், பால், அன்னாசி விழுது சேர்த்து சுமார் 10 நிமிடங்கள் கொதிக்கவிடவும்.
மற்றொரு வாணலியில் சிறிது நெய் ஊற்றி முந்திரி, திராட்சையை வறுத்து எடுத்துவிட்டு, அதே வாணலியில் ரவையை வாசனை வரும் வரை வறுக்கவும். அதனுடன் கொதிக்க வைத்த அன்னாசிக் கலவையைச் சேர்த்துக் கட்டியில்லாமல் கிளறவும். ரவை வெந்ததும் சர்க்கரை, ஏலக்காய்த்தூள், மீதமுள்ள நெய் சேர்த்து நன்கு கிளறவும். பாத்திரத்தில் ஒட்டாத பதம் வந்ததும் இறக்கிப் பரிமாறலாம்.
2. குழந்தைகளுக்குப் பிடிக்கும் ஆப்பிள் கேசரி
தேவையான பொருட்கள்:
- ஆப்பிள் – 1
- சேமியா – அரை கப்
- ரவை – அரை கப்
- நெய் – 5 டேபிள்ஸ்பூன்
- சர்க்கரை – 1 கப்
- தண்ணீர் – 3 டம்ளர்
- முந்திரி, திராட்சை – தலா 10
- ஆரஞ்சு நிற உணவுச் சாயம் – சிறிதளவு
- ஏலக்காய்த்தூள் – கால் டீஸ்பூன்
செய்முறை:
ஆப்பிளின் தோலை நீக்கித் துருவிக்கொள்ளவும். வாணலியில் சிறிது நெய் சேர்த்து ஆப்பிளை இரண்டு நிமிடங்கள் வதக்கவும். பின்னர் தண்ணீர் சேர்த்துக் கொதிக்கவிடவும்.
அதில் ஏலக்காய்த்தூள், விருப்பப்பட்டால் சிறிதளவு உணவுச் சாயம் சேர்க்கவும். வறுத்த சேமியா, ரவையைச் சேர்த்து நன்கு வேகவிடவும். பின்னர் சர்க்கரை சேர்த்துக் கிளறி, மீதமுள்ள நெய் மற்றும் வறுத்த முந்திரி, திராட்சையைச் சேர்த்து இறக்கவும்.
3. இனிப்பான மாம்பழ கேசரி
தேவையான பொருட்கள்:
- பம்பாய் ரவை – அரை கப்
- மாம்பழக்கூழ் – அரை கப்
- கல்கண்டு பொடி – முக்கால் கப்
- தண்ணீர் – ஒன்றரை கப்
- நெய் – 4 டேபிள்ஸ்பூன்
- முந்திரி – 10
- ஏலக்காய்த்தூள் – கால் டீஸ்பூன்
செய்முறை:
வாணலியில் சிறிது நெய் ஊற்றி முந்திரியை வறுத்து எடுத்துக்கொள்ளவும். அதே வாணலியில் ரவையை நன்கு வறுத்து, மாம்பழக்கூழைச் சேர்த்துக் கிளறவும்.
பின்னர் கொதித்த தண்ணீரைச் சேர்த்து ரவை வேகும் வரை கிளறவும். ரவை வெந்ததும் கல்கண்டு பொடி, ஏலக்காய்த்தூள், நெய் சேர்த்துக் கிளறவும். கேசரி கெட்டியானதும் வறுத்த முந்திரியைச் சேர்த்து இறக்கினால் மணமிக்க மாம்பழ கேசரி தயார்.
கேசரி மென்மையாக வர இந்த ரகசியத்தைக் கவனியுங்கள்!
ரவை வறுக்கும்போது மிதமான தீயைப் பயன்படுத்த வேண்டும். கொதிக்கும் தண்ணீரைச் சேர்க்கும்போது தொடர்ந்து கிளறினால் கட்டிகள் உருவாவதைத் தவிர்க்கலாம். நெய்யை ஒரே நேரத்தில் ஊற்றாமல், படிப்படியாகச் சேர்ப்பதும் நல்ல பதத்தைப் பெற உதவும்.
பழங்களின் இனிப்புக்கு ஏற்ப சர்க்கரை அல்லது கல்கண்டு அளவைக் குறைத்துக்கொள்ளலாம். இப்படி மூன்று வகைகளில் ஏதேனும் ஒன்றைச் செய்து, வீட்டிலேயே கல்யாண வீட்டு இனிப்புச் சுவையை அனுபவிக்கலாம்!
