டாடா சன்ஸ் நிறுவனத்தின் தலைவர் என். சந்திரசேகரனை மீண்டும் இயக்குநராக நியமிப்பது தொடர்பான விவகாரம், டாடா குழுமத்தின் முக்கிய நிறுவனங்களுக்கும் புதிய சிக்கலை ஏற்படுத்தியுள்ளது.
டாடா சன்ஸ் நிறுவனத்தில் அடுத்த ஆண்டு நடைபெறவுள்ள பொதுக்குழுக் கூட்டத்தில் வாக்கெடுப்பில் எந்த நிலைப்பாட்டை எடுப்பது என்பது குறித்து பல நிறுவனங்கள் கவனமாக ஆலோசித்து வருவதாகத் தகவல் வெளியாகியுள்ளது.
வாக்கு முக்கியத்துவம் பெறும் நிறுவனங்கள்
டாடா மோட்டார்ஸ், டாடா ஸ்டீல், இந்தியன் ஹோட்டல்ஸ், டாடா கன்சூமர், டாடா பவர், டாடா கெமிக்கல்ஸ் உள்ளிட்ட சுமார் 10 செயல்பாட்டு நிறுவனங்கள் டாடா சன்ஸ் நிறுவனத்தில் கூட்டாக 12.86 சதவீத பங்குகளை வைத்துள்ளன.
இதனால், சந்திரசேகரன் மறுநியமனம் தொடர்பான வாக்கெடுப்பில் இந்நிறுவனங்களின் முடிவு கவனம் பெறுகிறது.
சந்திரசேகரன் கடந்த செப்டம்பர் 17-ம் தேதி நடைபெற்ற டாடா சன்ஸ் வாரியக் கூட்டத்தில் மேலும் ஐந்து ஆண்டுகளுக்கு செயல் தலைவராக நியமிக்கப்படுவதற்கு ஆதரவு பெற்றார். ஆனால், அவர் தொடர்ந்து தலைவராக இருக்க முதலில் இயக்குநர் பதவியில் நீடிப்பது அவசியமாகும்.
நோயல் டாடாவின் எதிர்ப்பு
டாடா டிரஸ்ட்ஸ் தலைவர் நோயல் டாடா, சந்திரசேகரனின் மறுநியமனத்திற்கு எதிர்ப்பு தெரிவித்துள்ளார். இதனால் டாடா டிரஸ்ட்ஸ் மற்றும் டாடா சன்ஸ் நிர்வாகத்துக்கு இடையிலான கருத்து வேறுபாடு வெளிப்படையாகியுள்ளது.
இந்த நிலையில், குழுமத்தின் செயல்பாட்டு நிறுவனங்கள் சந்திரசேகரனுக்கு ஆதரவாகவோ எதிராகவோ வாக்களித்தால், அது டாடா டிரஸ்ட்ஸ்–டாடா சன்ஸ் மோதலில் ஒரு தரப்பைத் தேர்ந்தெடுத்ததாக பார்க்கப்படும் என்ற கவலை எழுந்துள்ளது.
வாக்கெடுப்பை தவிர்க்குமா நிறுவனங்கள்?
சில நிறுவனங்கள் இந்த விவகாரத்தில் வாக்களிப்பதைத் தவிர்ப்பது குறித்தும் பரிசீலிக்கலாம் எனத் தகவல்கள் தெரிவிக்கின்றன. தங்களது நிறுவனத்தின் நலன் மற்றும் பங்குதாரர்களின் நலனைக் கருத்தில் கொண்டு முடிவு எடுக்க வேண்டிய சூழலில் அவை உள்ளன.
இதற்கிடையே, ஆகஸ்ட் 18-ம் தேதி நடைபெறவிருந்த டாடா சன்ஸ் பொதுக்குழுக் கூட்டம் போதிய குவாரம் இல்லாததால் ஒத்திவைக்கப்பட்டது. கூட்டத்தை நடத்துவதற்காக நிறுவனப் பதிவாளர் அலுவலகத்திடம் இருந்து மேலும் மூன்று மாத கால அவகாசமும் பெறப்பட்டுள்ளது.
டாடா சன்ஸ், கூட்டத்தை நடத்துவதற்கான வழியாக தேசிய நிறுவன சட்டத் தீர்ப்பாயத்தை (NCLT) அணுகுவது குறித்தும் பரிசீலித்து வருவதாக கூறப்படுகிறது.
