டாடா மோட்டார்ஸ் (TATA Motors) பேசஞ்சர் வெஹிக்கிள்ஸ் (TMPV) நிறுவனத்தின் பங்குகள் புதன்கிழமையன்று கடும் சரிவைச் சந்தித்தன. வர்த்தகத்தின்போது நிறுவனத்தின் பங்குகள் கிட்டத்தட்ட 10 சதவீதம் வரை சரிந்து, இறுதியில் 8.27 சதவீத வீழ்ச்சியுடன் வர்த்தகத்தை நிறைவு செய்தன. BSE-யில் நிறுவனத்தின் பங்குகள் 8.27 சதவீதம் (ரூ. 32.55) சரிந்து ரூ. 361.05-ல் முடிவடைந்தன. அதேவேளையில், NSE-யில் டாடா மோட்டார்ஸ் பேசஞ்சர் வெஹிக்கிள்ஸ் பங்குகள் 8.10 சதவீதம் (ரூ. 31.90) சரிந்து ரூ. 361.70-ல் முடிவடைந்தன.
2027 நிதியாண்டுக்கான எதிர்பார்ப்புகள்:
‘முதலீட்டாளர் தின’ (Investor Day) நிகழ்வில் தெரிவிக்கப்பட்ட கருத்துகள் மற்றும் 2027 நிதியாண்டுக்கான எதிர்பார்ப்புகளுக்கு முதலீட்டாளர்கள் பெருமளவில் பங்குகளை விற்பனை செய்தனர். இது நிறுவனத்தின் பங்குகள் கடும் சரிவைச் சந்திக்கக் காரணமாக அமைந்தது. 2027 நிதியாண்டில் வருவாய் 13 சதவீதம் வளர்ச்சியடையும் என்று ஜாகுவார் லேண்ட் ரோவர் (JLR) கணித்துள்ளது. அதேவேளையில், EBIT வரம்பு (EBIT margin), 2027 நிதியாண்டில் 4 சதவீதமாக இருக்கும் என்றும் கணிக்கப்பட்டுள்ளது. மேலும், 2026 நிதியாண்டில் எதிர்மறையாக (negative) இருந்த 2.3 பில்லியன் பவுண்டுகள் (GBP) அளவிலான செயல்பாட்டு பணப்புழக்கம் (operating cash flow) 2027 நிதியாண்டில் சமநிலையை (break-even) எட்டும் என்றும் நிறுவனம் எதிர்பார்க்கிறது.
நிறுவன வளர்ச்சிக்கான புதிய வழிகள்:
சொகுசு கார் தயாரிப்பு நிறுவனமான டாடா மோட்டார்ஸ் பேசஞ்சர் வெஹிக்கிள்ஸின் துணை நிறுவனமான ஜாகுவார் லேண்ட் ரோவர் (JLR), இங்கிலாந்தின் கேடனில் (Gaydon) உள்ள தனது தலைமையகத்தில் நடைபெற்ற முதலீட்டாளர் தின நிகழ்வில் பல்வேறு வாடிக்கையாளர் பிரிவுகளை இலக்காகக் கொண்டு வளர்ச்சிக்கான புதிய வழிகளை உருவாக்கவுள்ளதாக அறிவித்தது. இந்த இலக்கை அடைய பல்வேறு வகையான என்ஜின் தொழில்நுட்பங்கள் மற்றும் வட அமெரிக்க சந்தையில் கவனம் செலுத்தவுள்ளதாகவும் நிறுவனம் தெரிவித்தது.
18 பில்லியன் பவுண்டுகளை முதலீடு செய்யும் JLR:
2028-29 நிதியாண்டுக்குள் 18 பில்லியன் பவுண்டுகளை முதலீடு செய்வதில் நிறுவனம் உறுதியாக உள்ளது என்பதை டாடா குழும நிறுவனத்தின் தலைமை நிர்வாக அதிகாரி (CEO) பி.பி. பாலாஜி வலியுறுத்தினார். மேலும், 1.7 பில்லியன் பவுண்டுகள் சேமிப்பை இலக்காகக் கொண்ட செலவுக் குறைப்புத் திட்டத்தையும் நிறுவனம் வெளியிட்டது. அடுத்த இரண்டு ஆண்டுகளில் சமநிலையை (break-even) எட்டும் வகையில் 300,000 வாகனங்கள் உற்பத்தி செய்யும் திறன் இலக்காக நிர்ணயிக்கப்பட்டுள்ளது.
