குழந்தைகளின் உணவில் சத்தான காய்கறிகள் மற்றும் தானியங்களை சேர்ப்பது அவர்களின் உடல் வளர்ச்சிக்கு உதவியாக இருக்கும்.
அந்த வகையில், ஸ்வீட் கார்ன் மற்றும் வெள்ளைப்பூசணியை சேர்த்து தயாரிக்கப்படும் உணவுகள் சுவையாக மட்டுமல்லாமல், குழந்தைகளின் உணவுப் பழக்கத்திலும் நல்ல மாற்றத்தை ஏற்படுத்தும்.
கண் பார்வைக்கும் நோய் எதிர்ப்பு சக்திக்கும்
ஸ்வீட் கார்னில் உடலுக்கு ஆற்றல் அளிக்கும் சத்துக்கள் உள்ளன. இதில் காணப்படும் ஊட்டச்சத்துக்கள் கண் பார்வை மற்றும் நோய் எதிர்ப்பு சக்திக்கு உதவியாக இருக்கும்.
குழந்தைகள் விரும்பி சாப்பிடும் வகையில் இதை பல உணவுகளுடன் சேர்த்துத் தயாரிக்கலாம்.
உடலுக்கு குளிர்ச்சி தரும் வெள்ளைப்பூசணி
வெள்ளைப்பூசணி உடலுக்கு குளிர்ச்சியை அளிப்பதுடன், ஜீரணத்தை சீராக வைத்துக்கொள்ள உதவும் உணவாக பார்க்கப்படுகிறது. ஸ்வீட் கார்னுடன் இதை சேர்க்கும்போது சத்தும் சுவையும் கொண்ட கலவையாக மாறுகிறது.
குறிப்பாக குழந்தைகளுக்காக எண்ணெயை அதிகம் பயன்படுத்தாமல் தயாரிப்பது சிறந்தது.
அடையாக செய்து கொடுக்கலாம்
ஸ்வீட் கார்ன் மற்றும் வெள்ளைப்பூசணியை பச்சரிசி, பச்சை மிளகாய், கறிவேப்பிலை, கொத்தமல்லி, வெங்காயம், பூண்டு, சீரகம் ஆகியவற்றுடன் சேர்த்து அரைத்து அடை தயாரிக்கலாம்.
மாவை தோசைக்கல்லில் மெல்லியதாகத் தட்டி, இருபுறமும் வேகவைத்து எடுத்தால் சுவையான மாலை நேர உணவாக இருக்கும். தேங்காய் சட்னியுடன் பரிமாறலாம்.
கட்லெட்டாகவும் அசத்தலாம்!
குழந்தைகள் விரும்பும் ஸ்நாக்ஸ் வடிவில் கொடுக்க நினைத்தால், இதே கலவையை கட்லெட்டாக மாற்றலாம். ஸ்வீட் கார்ன், வெள்ளைப்பூசணி, வேகவைத்த உருளைக்கிழங்கு ஆகியவற்றுடன் வெங்காயம், மிளகாய், சீரகம், மிளகுத்தூள் சேர்த்து கலக்க வேண்டும்.
சிறிய உருண்டைகளாகப் பிடித்து தட்டி, பிரெட் தூளில் புரட்டி தவாவில் இருபுறமும் வேகவைத்தால் சுவையான கட்லெட் தயார். பள்ளி முடிந்து வரும் குழந்தைகளுக்கு மாலை நேரத்தில் கொடுக்க ஏற்ற சிற்றுண்டியாகவும் இது அமையும்.
