ஆகஸ்டை விட குறைந்த பரிவர்த்தனைகள்
இந்தியாவில் UPI மூலம் மேற்கொள்ளப்படும் பரிவர்த்தனைகளின் எண்ணிக்கை செப்டம்பர் மாதத்தில் 1.8 சதவீதம் குறைந்துள்ளது.
இந்திய ரிசர்வ் வங்கி வெளியிட்டுள்ள தரவுகளின்படி, ஆகஸ்டில் 2,450 கோடியாக இருந்த UPI பரிவர்த்தனைகள், செப்டம்பரில் 2,407 கோடியாக குறைந்துள்ளன.
அதேபோல், UPI பரிவர்த்தனைகளின் மொத்த மதிப்பும் ஆகஸ்டில் ரூ.29.82 லட்சம் கோடியில் இருந்து செப்டம்பரில் ரூ.29.37 லட்சம் கோடியாக குறைந்துள்ளது. இது சுமார் 1.5 சதவீத சரிவாகும்.
தினசரி பயன்பாடு உண்மையில் அதிகரிப்பு
மாத அளவில் எண்ணிக்கை குறைந்திருந்தாலும், தினசரி UPI பயன்பாட்டை பார்த்தால் வேறு நிலை தெரிகிறது. ஆகஸ்ட் மாதத்தில் ஒரு நாளின் சராசரி UPI பரிவர்த்தனைகள் 791 மில்லியனாக இருந்த நிலையில், செப்டம்பரில் அது 802 மில்லியனாக உயர்ந்துள்ளது.
ஆகஸ்ட் மாதத்தில் 31 நாட்களும், செப்டம்பரில் 30 நாட்களும் இருந்ததே மாதாந்திர எண்ணிக்கையில் ஏற்பட்ட சரிவுக்கு முக்கிய காரணமாக இருக்கலாம் எனத் தொழில்துறை வட்டாரங்கள் தெரிவிக்கின்றன.
புதிய MDR கட்டணம் என்ன மாற்றத்தை ஏற்படுத்தும்?
இந்த புள்ளிவிவரங்கள் வெளியாகியுள்ள நேரம் முக்கியத்துவம் பெற்றுள்ளது. அக்டோபர் 15 முதல் குறிப்பிட்ட UPI வணிகப் பரிவர்த்தனைகளுக்கு Merchant Discount Rate (MDR) அறிமுகப்படுத்தப்பட உள்ளது.
ரூ.2,000-க்கு மேல் மேற்கொள்ளப்படும் சில நபர்-வணிகர் (P2M) UPI பரிவர்த்தனைகளுக்கு 0.40 சதவீத MDR விதிக்கப்படும். அதே நேரத்தில், தனிநபர்-தனிநபர் UPI பரிவர்த்தனைகளுக்கு கட்டணம் கிடையாது. ரூ.2,000 வரையிலான வணிகப் பரிவர்த்தனைகளும் தொடர்ந்து இலவசமாக இருக்கும்.
புதிய விதிகளுக்கு முன்பே சரிவு
புதிய கட்டண விதிகள் அமலுக்கு வருவதற்கு முன்பே UPI பரிவர்த்தனைகளில் சரிவு பதிவாகியுள்ளது. இருப்பினும், செப்டம்பர் மாத சரிவுக்கு MDR விதிகளே நேரடி காரணம் என்று கூறுவதற்கு தற்போதைய தரவுகள் போதுமானதாக இல்லை.
மாறாக, மாதத்தின் நாட்களின் எண்ணிக்கை, பண்டிகைக் கால செலவுகள் உள்ளிட்ட காரணிகளையும் கருத்தில் கொள்ள வேண்டியுள்ளது. மேலும், செப்டம்பரில் தினசரி சராசரி பரிவர்த்தனைகள் 80 கோடியைத் தாண்டியிருப்பது UPI பயன்பாடு தொடர்ந்து வலுவாக இருப்பதையே காட்டுகிறது.
l
