காலையில் தூங்கி எழுந்ததும் வாயில் கசப்புச் சுவை ஏற்படுகிறதா? பல் துலக்கிய பிறகும் அந்தச் சுவை நீடிக்கிறதா?
சிலர் இதைச் சாதாரணப் பிரச்சினையாகக் கருதி கடந்து செல்வார்கள். ஆனால், தொடர்ந்து இப்படி ஏற்படுவதற்குப் பின்னால் வாய்வழிப் பராமரிப்புக் குறைபாடு முதல் செரிமானப் பிரச்சினைகள் வரை பல காரணங்கள் இருக்கலாம்.
மருத்துவத்தில் சுவை உணர்வில் ஏற்படும் மாற்றம் ‘டிஸ்கியூசியா’ (Dysgeusia) என்று அழைக்கப்படுகிறது. காலையில் மட்டும் வாயில் கசப்பு ஏற்படுவதற்கான முக்கியமான ஆறு காரணங்களைப் பார்க்கலாம்.
1. வயிற்று அமிலம் மேலே வருவது
இரவில் தூங்கும்போது வயிற்றில் உள்ள அமிலம் உணவுக்குழாய் வழியாக மேலே வரலாம். இந்தப் பிரச்சினை ஆசிட் ரிஃப்ளக்ஸ் (Acid Reflux) என்று அழைக்கப்படுகிறது. இதனால் காலையில் வாயில் கசப்பான அல்லது புளிப்பான சுவை ஏற்படலாம்.
நெஞ்செரிச்சல், புளித்த ஏப்பம் போன்ற அறிகுறிகளும் இருந்தால் இதைக் கவனிக்க வேண்டும்.
2. பல் துலக்காமல் தூங்கும் பழக்கம்
இரவில் பல் துலக்காமல் தூங்கும்போது பற்களிலும் நாக்கிலும் உணவுத் துகள்கள் படியலாம். இதனால் பாக்டீரியாக்கள் பெருகி, காலையில் வாய் துர்நாற்றத்துடன் கசப்புச் சுவையும் ஏற்படலாம்.
பற்கள் மற்றும் ஈறுகளில் ஏற்படும் பாதிப்புகளும் சுவை மாற்றத்துக்குக் காரணமாக இருக்கலாம்.
3. உடலில் தண்ணீர் குறைவது
தூங்கும்போது இயல்பாகவே உமிழ்நீர் சுரப்பு குறைகிறது. உடலில் தண்ணீர் பற்றாக்குறை இருந்தாலோ, தூக்கத்தில் வாய் வழியாகச் சுவாசித்தாலோ வாய் மேலும் வறண்டு போகலாம்.
உமிழ்நீர் வாயைச் சுத்தமாக வைத்திருக்க உதவுவதால், அதன் அளவு குறையும்போது விரும்பத்தகாத சுவை ஏற்படலாம்.
4. மருந்துகளின் பக்கவிளைவுகள்
சில ஆன்டிபயாட்டிக் மருந்துகள், ரத்த அழுத்தத்துக்கான மருந்துகள் மற்றும் வைட்டமின் மாத்திரைகள் வாயில் கசப்பான அல்லது உலோகச் சுவையை ஏற்படுத்தக்கூடும். புதிய மருந்து எடுத்துக்கொள்ளத் தொடங்கிய பிறகு இந்தப் பிரச்சினை ஏற்பட்டால் மருத்துவரிடம் தெரிவிப்பது நல்லது.
5. சளி மற்றும் சைனஸ் பிரச்சினைகள்
மூக்கடைப்பு, சைனஸ் தொற்று, சளி போன்ற பிரச்சினைகள் சுவை உணர்வைப் பாதிக்கலாம். மூக்கிலிருந்து தொண்டைக்குள் சளி வடிவதும், வாய் வழியாகச் சுவாசிப்பதும் கசப்புச் சுவையை அதிகரிக்கலாம்.
6. ஹார்மோன் மாற்றங்கள்
கர்ப்பகாலம் போன்ற சில சூழல்களில் ஏற்படும் ஹார்மோன் மாற்றங்களால் வாயில் கசப்பான அல்லது உலோகச் சுவை தோன்றலாம். இருப்பினும், இந்த அறிகுறி மட்டும் இருப்பதால் ஹார்மோன் பிரச்சினை என்று முடிவு செய்துவிட முடியாது.
எப்போது மருத்துவரை அணுக வேண்டும்?
காலையில் ஏற்படும் கசப்புச் சுவை தண்ணீர் குடித்த பிறகும், பல் துலக்கிய பிறகும் மறையாமல் தொடர்ந்து இருந்தால் மருத்துவ ஆலோசனை பெறுவது அவசியம். நெஞ்செரிச்சல், வயிற்றுவலி, வாந்தி, விழுங்குவதில் சிரமம், ஈறுகளில் ரத்தக்கசிவு போன்ற அறிகுறிகள் இருந்தாலும் அலட்சியம் செய்ய வேண்டாம்.
காலை, இரவு என இரு வேளைகளிலும் பல் துலக்குவது, நாக்கைச் சுத்தம் செய்வது, போதுமான அளவு தண்ணீர் குடிப்பது போன்ற பழக்கங்கள் உதவலாம். இரவு உணவைச் சாப்பிட்டவுடன் படுக்காமல் இருப்பதும் அமிலம் மேலே வரும் பிரச்சினையைக் குறைக்க உதவும்.
வாயில் கசப்புச் சுவை ஏற்படுவதற்குப் பல காரணங்கள் இருப்பதால், அது தொடர்ந்து நீடித்தால் காரணத்தைக் கண்டறிந்து சிகிச்சை பெறுவதே சரியான வழி.
