ஃபில்டர் காபி என்றாலே அதன் அடர்த்தியான சுவையும் மணமும் நினைவுக்கு வரும். அந்த சுவைக்கு பின்னால் இருக்கும் முக்கிய காரணிகளில் ஒன்று சிகரி (Chicory).
பெரும்பாலான ஃபில்டர் காபி பொடிகளில் சுமார் 20 முதல் 30 சதவீதம் வரை சிகரி கலக்கப்படுகிறது. ஆனால், காபியின் சுவைக்காக மட்டுமே இது பயன்படுத்தப்படுவதில்லை. இதில் உடலுக்கு தேவையான சில நன்மைகளும் இருப்பதாக கூறப்படுகிறது.
காபிக்கு மாற்றாக பயன்படும் சிகரி
சிகரி என்பது Cichorium intybus என்ற தாவரத்தின் வேர். இதை உலர்த்தி வறுத்து பொடியாக்கும்போது, காபியைப் போன்ற நிறமும் மணமும் கிடைக்கும். முக்கியமாக இதில் இயற்கையாகவே கஃபைன் கிடையாது. எனவே கஃபைனைத் தவிர்க்க விரும்புபவர்களுக்கு சிகரி ஒரு மாற்றாக இருக்கிறது.
குடல் ஆரோக்கியத்துக்கு உதவும் இனுலின்
சிகரி வேரில் இனுலின் என்ற கரையக்கூடிய நார்ச்சத்து உள்ளது. இது குடலில் இருக்கும் நல்ல பாக்டீரியாக்களுக்கு உணவாக செயல்படும் ப்ரீபயாடிக் தன்மை கொண்டது. இதன் மூலம் செரிமானம் சீராகவும், மலச்சிக்கல் போன்ற பிரச்னைகள் குறையவும் உதவக்கூடும்.
சர்க்கரை, கல்லீரலுக்கும் பலன்?
சிகரியில் உள்ள இனுலின் மற்றும் சில இயற்கை சேர்மங்கள் ரத்தச் சர்க்கரை கட்டுப்பாடு மற்றும் இன்சுலின் உணர்திறனுக்கு உதவக்கூடும் என ஆய்வுகள் தெரிவிக்கின்றன. கல்லீரல் செயல்பாட்டுக்கும் இது சில வகையில் துணைபுரியலாம்.
அளவுக்கு அதிகமானால் பிரச்னை
சிகரிக்கு பல நன்மைகள் இருந்தாலும், அதிகமாக எடுத்துக்கொள்வது வயிறு உப்புசம், வாயுத் தொல்லை போன்ற பிரச்னைகளை ஏற்படுத்தலாம். கர்ப்பிணிகள் அதிக அளவில் சிகரி உட்கொள்வதைத் தவிர்ப்பது நல்லது. எனவே, நன்மை இருப்பதால் அளவுக்கு அதிகமாக எடுத்துக்கொள்வதை விட, அளவோடு பயன்படுத்துவதே சரியான அணுகுமுறை.
