முடி அடர்த்தியாக வளர வேண்டும், சருமம் பளபளப்பாக இருக்க வேண்டும் என்பதற்காக பலரும் பயோட்டின், கொலாஜன் சப்ளிமென்ட்களை நாடுகின்றனர்.
ஆனால் இரண்டுமே ஒரே வேலையைச் செய்வதில்லை. உடலின் தேவையைப் பொறுத்தே எதைத் தேர்வு செய்வது என்பதை முடிவு செய்ய வேண்டும்.
கொலாஜன் என்ன செய்யும்?
கொலாஜன் என்பது உடலில் காணப்படும் முக்கியமான புரதம். வயது அதிகரிக்கும்போது இயற்கையாகவே இதன் உற்பத்தி குறையத் தொடங்கும். கொலாஜன் பெப்டைட்கள் சருமத்தின் நீரேற்றம் மற்றும் நெகிழ்வுத்தன்மைக்கு உதவக்கூடும். சருமத்தின் தோற்றத்திலும், நகங்களின் ஆரோக்கியத்திலும் இதன் பங்கு இருப்பதாக ஆய்வுகள் தெரிவிக்கின்றன.
பயோட்டின் யாருக்கு தேவை?
பயோட்டின் என்பது வைட்டமின் பி வகை. முட்டை, ட்ரை ஃப்ரூட்ஸ் & நட்ஸ், மீன், விதைகள் உள்ளிட்ட உணவுகளில் இது இயற்கையாகக் கிடைக்கிறது. ஆனால் உடலில் பயோட்டின் அளவு ஏற்கெனவே இயல்பாக இருக்கும்போது, கூடுதலாக சப்ளிமென்ட் எடுத்துக்கொள்வதால் முடி அதிகமாக வளரும் என்பதற்கு வலுவான ஆதாரம் இல்லை. எனவே மருத்துவரின் ஆலோசனையின்றி அதிக அளவில் எடுத்துக்கொள்வது சரியான அணுகுமுறை அல்ல.
முடி உதிர்வுக்கு காரணம் என்ன?
முடி உதிர்வை பயோட்டின் குறைபாடு மட்டுமே ஏற்படுத்துவதில்லை. இரும்புச்சத்து குறைபாடு, தைராய்டு பிரச்னைகள், ஹார்மோன் மாற்றங்கள், மரபியல் காரணங்கள் மற்றும் சில மருந்துகளும் காரணமாக இருக்கலாம். காரணத்தை கண்டறியாமல் சப்ளிமென்ட் எடுத்துக்கொள்வது எதிர்பார்த்த பலனைத் தராமல் போகலாம்.
சருமத்துக்கு கொலாஜன்; முடிக்கு பயோட்டினா?
சருமம் வறண்டு, குறைவாக இருந்தால் கொலாஜன் பெப்டைட்கள் சிலருக்கு உதவக்கூடும். அதேநேரத்தில், பயோட்டின் குறைபாடு இல்லாதவர்களுக்கு அதை கூடுதலாக எடுத்துக்கொள்வதால் முடி வளர்ச்சியில் பெரிய மாற்றம் ஏற்படும் என்பது உறுதியானதல்ல.
முடி மற்றும் சரும ஆரோக்கியத்துக்கு போதுமான புரதம், இரும்புச்சத்து, ஜின்க் (Zinc) மற்றும் தேவையான வைட்டமின்கள் கிடைப்பது முதன்மையானது. எந்த சப்ளிமென்ட்டையும் தொடங்குவதற்கு முன் தனிப்பட்ட தேவையை மருத்துவரிடம் ஆலோசிப்பது பாதுகாப்பானது.
