வங்கிகளுடன் இணைந்து கடன் வழங்கும் என்.பி.எப்.சி (NBFC) நிறுவனங்கள் வழங்கும் சேவைகளுக்கு 18% ஜிஎஸ்டி விதிக்க ஜிஎஸ்டி கவுன்சிலின் ஃபிட்மென்ட் கமிட்டி முடிவு செய்துள்ளதாகத் தகவல் வெளியாகியுள்ளது. இதற்கான சேவை மதிப்பு, இந்திய ரிசர்வ் வங்கி (RBI) வகுத்துள்ள முறையின் அடிப்படையில் கணக்கிடப்பட உள்ளது.
கடனுக்கான வட்டிக்கு ஜிஎஸ்டி இல்லை
இந்த மாற்றத்தில் முக்கியமான அம்சமாக, வாடிக்கையாளர் பெறும் கடனுக்கான அசல் வட்டி வருவாய்க்கு ஜிஎஸ்டி விதிக்கப்படாது என்று தெரிவிக்கப்பட்டுள்ளது. மாறாக, வங்கியும் என்.பி.எப்.சி-யும் இணைந்து கடன் வழங்கும் கோ-லெண்டிங் (Co-lending) முறையில், என்.பி.எப்.சி வங்கிக்கு வழங்கும் தனிப்பட்ட சேவையே 18% ஜிஎஸ்டிக்கு உட்படுத்தப்படும்.
என்.பி.எப்.சி-களின் சேவை எப்படி கணக்கிடப்படும்?
கோ-லெண்டிங் முறையில் கடன் வழங்கும்போது வாடிக்கையாளர்களைத் தேடுவது, கடன் தகுதியை மதிப்பிடுவது, கடன் செயல்முறையை நிர்வகிப்பது போன்ற பணிகளில் என்.பி.எப்.சி நிறுவனங்கள் முக்கியப் பங்கு வகிக்கின்றன. வங்கிகள் பொதுவாக அதிகளவிலான நிதியை வழங்குகின்றன.
இந்த சேவைக்கான வரி மதிப்பை நிர்ணயிப்பதில் ஆர்பிஐ வகுத்துள்ள கணக்கீட்டு முறையைப் பயன்படுத்த முடிவு செய்யப்பட்டுள்ளதாகத் தகவல் வெளியாகியுள்ளது. இதன் மூலம் ஒரே மாதிரியான வரி கணக்கீட்டு நடைமுறையைக் கொண்டு வர முடியும் என எதிர்பார்க்கப்படுகிறது.
ஜிஎஸ்டி கவுன்சில் கூட்டத்தில் இறுதி முடிவு?
இதுதொடர்பான பரிந்துரையை ஜிஎஸ்டி கவுன்சில் பரிசீலிக்க உள்ளது. கவுன்சில் ஒப்புதல் அளித்த பின்னர் தனியாக ஒரு சுற்றறிக்கை வெளியிடப்படும்.
கோ-லெண்டிங் முறையில் வட்டி வருவாயா அல்லது தனி சேவைக்கான கட்டணமா என்ற விவகாரத்தில் நீண்ட காலமாக குழப்பம் இருந்து வந்த நிலையில், இந்த முடிவு வரி கணக்கீட்டில் தெளிவை ஏற்படுத்தும் எனத் தெரிவிக்கப்பட்டுள்ளது.
