வருமான வரி கணக்கைத் (ITR) தாக்கல் செய்த பிறகு ஒவ்வொரு வரி செலுத்துவோரும் தங்கள் வரி திரும்பப் பெறும் தொகையை (refund) ஆவலுடன் எதிர்பார்க்கின்றனர். பொதுவாக, மின்னணு சரிபார்ப்பு (e-verification) செயல்முறை முடிந்த நான்கு முதல் ஐந்து வாரங்களுக்குள் வருமான வரித் துறை இந்தத் தொகையை வழங்குகிறது. இருப்பினும், சில சமயங்களில் வங்கிக் கணக்கில் வரவு வைக்கப்படும் தொகை, ITR-இல் காட்டப்பட்டதை விட குறைவாக இருக்கலாம். இது, ஏன் இவ்வளவு குறைவான தொகை திரும்பக் கிடைக்கிறது என்ற கேள்வியை எழுப்புகிறது.
என்ன காரணம்?
இதற்கு முக்கிய காரணம், வருமான வரித் துறை கணக்கைப் பரிசீலிக்கும்போது அனைத்துத் தகவல்களையும் ஒப்பிட்டுப் பார்த்து, அதன் அடிப்படையில் இறுதித் தொகையைத் தீர்மானிப்பதே ஆகும். கணக்கைப் பரிசீலிக்கும்போது, உங்கள் ITR-இல் உள்ள தகவல்களை Form 26AS, AIS, TIS, TDS பதிவுகள் மற்றும் பிற தரவுகளுடன் துறை ஒப்பிட்டுப் பார்க்கிறது. ஏதேனும் முரண்பாடுகள் இருந்தால், திரும்பப் பெறும் தொகை குறைக்கப்படலாம்.
நோட்டீஸ் அனுப்பப்படும்:
வங்கி வட்டி அல்லது மூலதன ஆதாயம் (capital gains) போன்ற வருமானங்களை வெளிப்படுத்தத் தவறுதல், தவறான வரி விலக்குகள் அல்லது வரிச் சலுகைகளைக் கோருதல், தவறான முன்செலுத்து வரி (advance tax) அல்லது சுய மதிப்பீட்டு வரி (self-assessment tax) விவரங்கள் மற்றும் முந்தைய ஆண்டுகளின் நிலுவை வரிகள் ஆகியவை குறைவான வரித் தொகை திரும்பக் கிடைப்பதற்கான முக்கிய காரணங்களாகும். வருமான வரித் துறை ஏதேனும் மாற்றங்களைச் செய்தால், அது குறித்து உங்களுக்குத் தெரிவிக்க பிரிவு 143(1)-ன் கீழ் நோட்டீஸ் அனுப்புகிறது.
பழைய வரி நிலுவைகள்:
வரி செலுத்துவோருக்கு முந்தைய மதிப்பீட்டு ஆண்டுகளின் வரி நிலுவை இருந்தால், வருமான வரித் துறை அந்தத் தொகையைத் தற்போதைய வரித் திரும்பப் பெறும் தொகையிலிருந்து ஈடுசெய்யலாம் (adjust). இருப்பினும், அவ்வாறு செய்வதற்கு முன், வருமான வரித் துறை ‘இ-ஃபைலிங்’ (e-filing) இணையதளம் மூலம் வரி செலுத்துவோருக்கு அறிவித்து, அவர்கள் தங்கள் தரப்பு விளக்கத்தை அளிக்க வாய்ப்பளிக்கிறது.
திரும்பப் பெறும் தொகை குறையும்:
நீங்கள் சரியான நேரத்தில் ITR-ஐத் தாக்கல் செய்யாவிட்டாலோ அல்லது முன்செலுத்து வரியைச் செலுத்தத் தவறினாலோ வருமான வரிச் சட்டத்தின் பிரிவு 234A, 234B மற்றும் 234C-ன் கீழ் வட்டி விதிக்கப்படலாம். இந்த வட்டி உங்கள் மொத்த வரிப் பொறுப்புடன் சேர்க்கப்பட்டு திரும்பப் பெறும் தொகையைக் குறைக்கிறது.
இவற்றை நினைவில் கொள்ளுங்கள்:
ITR-ஐத் தாக்கல் செய்வதற்கு முன் Form 26AS, AIS மற்றும் TIS ஆகியவற்றை கவனமாக ஒப்பிட்டுப் பார்க்குமாறு நிபுணர்கள் பரிந்துரைக்கின்றனர். அனைத்து வருமான ஆதாரங்கள், செலுத்தப்பட்ட வரிகள் மற்றும் வரி விலக்குகள் ஆகியவை துல்லியமாக உள்ளிடப்பட்டிருப்பதை உறுதி செய்ய வேண்டும்ம். சரியான ITR படிவத்தைத் தேர்ந்தெடுக்கவும், உங்கள் வங்கிக் கணக்கை முன்கூட்டியே சரிபார்க்கவும் (pre-validate), மற்றும் சரியான நேரத்தில் மின்னணு சரிபார்ப்பை (e-verification) முடிக்கவும் வேண்டும். இந்த எளிய முன்னெச்சரிக்கை நடவடிக்கைகள், பணத்தைத் திரும்பப் பெறுவதில் பிடித்தம் செய்வதற்கான அபாயத்தை கணிசமாகக் குறைப்பதோடு, பணத்தை விரைவாகப் பெறுவதையும் உறுதிசெய்யும்.
