வேலை மாறுபவர்களுக்கு ஏற்படும் வரிச் சிக்கல்
ஒரு நிதியாண்டில் ஒரு நிறுவனத்திலிருந்து மற்றொரு நிறுவனத்திற்கு வேலை மாறுபவர்கள் (Job Switchers) எதிர்கொள்ளும் மிக முக்கியமான சவால் – இரண்டு நிறுவனங்களும் தனித்தனியாக வரி விலக்குகளைக் கணக்கிட்டு, இறுதியாக வருமான வரித் தாக்கல் (ITR Filing) செய்யும்போது கூடுதல் வரி செலுத்த வேண்டிய கட்டாயம் ஏற்படுவதுதான்.
பழைய நிறுவனத்தில் பெறப்பட்ட சம்பளம் மற்றும் பிடிக்கப்பட்ட டிடிஎஸ் (TDS) விவரங்கள் புதிய நிறுவனத்திற்குச் சரியாகத் தெரிவிக்கப்படாததே இதற்குக் காரணம். இந்தச் சிக்கலுக்கு முற்றுப்புள்ளி வைக்கும் வகையில் வருமான வரித்துறை புதிய நடைமுறையைக் கொண்டுவந்துள்ளது.
ஃபார்ம் 122 மற்றும் 12BAA-ன் முக்கியத்துவம்
மத்திய நேரடி வரிகள் வாரியம் (CBDT) அறிமுகப்படுத்தியுள்ள புதிய அறிவிப்பின்படி, ஊழியர்கள் தங்கள் சம்பளம் அல்லாத பிற வருமானங்கள், பிற இடங்களில் பிடிக்கப்பட்ட டிடிஎஸ் (TDS), டிசிஎஸ் (TCS) மற்றும் முந்தைய நிறுவனத்தின் சம்பள விவரங்களை தற்போதைய நிறுவன முதலாளியிடம் (Employer) தெரிவிக்க ‘ஃபார்ம் 122’ (Form 122 / பழைய ஃபார்ம் 12B & 12BAA-ன் ஒருங்கிணைந்த வடிவம்) வழிவகை செய்கிறது.
இதன் மூலம் ஊழியர்கள் தங்களின் உண்மையான வரிப் பொறுப்பைக் கணக்கிட்டு, அதிகப்படியான வரி பிடித்தம் செய்யப்படுவதைத் தவிர்க்க முடியும்.
கைக்கு வரும் சம்பளம் (Take-Home Pay) அதிகரிக்கும்
இந்த ஃபார்ம் மூலம், பிக்ஸட் டெபாசிட் வட்டி, டிவிடெண்ட், வீடு / சொத்து மூலம் ஏற்படும் இழப்புகள் (Loss from House Property) மற்றும் வங்கிகள் அல்லது பிற அமைப்புகளால் ஏற்கனவே பிடிக்கப்பட்ட டிடிஎஸ் விவரங்களை ஊழியர்கள் புதிய நிறுவனத்தில் சமர்ப்பிக்கலாம். இதனால், முதலாளிகள் ஊழியரின் சம்பளத்தில் பிடிக்கப்படும் மாதந்திர டிடிஎஸ் தொகையைச் சரியான அளவில் குறைத்துக் கணக்கிடுவர்.
இதன் விளைவாக, ஊழியர்களின் மாதந்திர கைக்கு வரும் சம்பளம் (Disposable Income/Cash Flow) அதிகரிப்பதோடு, நிதியாண்டின் இறுதியில் வருமான வரித்துறையிடம் ரீஃபண்ட் (Refund) கேட்டு விண்ணப்பிக்கும் தேவையும் குறைகிறது.
எப்போது, எப்படிச் சமர்ப்பிக்க வேண்டும்?
வேலை மாறும் ஊழியர்கள் புதிய நிறுவனத்தில் சேரும்போதோ அல்லது நிதியாண்டின் இடையிலோ இந்த ஃபார்ம் 122-ஐப் பூர்த்தி செய்து மனிதவள மேம்பாட்டுத் துறையிடம் (HR/Payroll) அளிக்கலாம். இதனை வருமான வரி இணையதளத்தில் பதிவேற்ற வேண்டிய அவசியமில்லை.
நிறுவனத்தின் உள் பயன்பாட்டிற்கு மட்டும் அளித்தால் போதுமானது. வேலை மாறுபவர்கள் மட்டுமன்றி, பிற வழிகளில் வருமானம் ஈட்டும் அனைத்துச் சம்பளதாரர்களுக்கும் இந்த புதிய வரி அறிவிப்பு பெரும் நிம்மதியை அளித்துள்ளது.
