மலையாள திரையுலகின் ‘கம்ப்ளீட் ஆக்டர்’ மோகன்லால் மற்றும் இயக்குனர் ஜீத்து ஜோசப் கூட்டணியில் உருவான ‘த்ரிஷ்யம்’ படத்தின் மூன்றாவது பாகம் (Drishyam 3) கடந்த மே 21 அன்று உலகம் முழுவதும் வெளியானது. உலகளவில் மிகப்பெரிய எதிர்பார்ப்புக்கு மத்தியில் வெளியான இப்படம், கலவையான விமர்சனங்களைப் பெற்றபோதிலும், வசூலில் புதிய வரலாற்றுச் சாதனைகளைப் படைத்து வருகிறது. படம் வெளியான வெறும் 5 நாட்களிலேயே உலகளவில் 150 கோடி ரூபாய் வசூலைக் கடந்து மாஸ் காட்டியுள்ளது.
Drishyam 3: 5 நாட்களில் புதிய மைல்கல்
பிரபல பாக்ஸ் ஆபீஸ் இணையதளமான ‘சாக்னில்க்’ (Sacnilk) வெளியிட்டுள்ள அதிகாரப்பூர்வ தகவலின்படி, ‘த்ரிஷ்யம் 3’ திரைப்படம் தனது முதல் 5 நாட்களிலேயே உலகளவில் தோராயமாக 156.14 கோடி ரூபாய் கிராஸ் வசூல் செய்து சாதனை படைத்துள்ளது. இதில் இந்திய அளவில் மட்டும் 71.74 கோடி ரூபாயும், வெளிநாடுகளில் (Overseas) 84.40 கோடி ரூபாயும் வசூலாகியுள்ளது. வார இறுதி நாட்களுக்குப் பிறகு வந்த திங்கட்கிழமையிலும் (Monday Test) நிலையான வசூலைப் பெற்று, இந்த மைல்கல்லை இப்படம் மிக எளிதாக எட்டியுள்ளது.
மோகன்லாலின் தனித்துவமான சாதனை
இந்த இமாலய வெற்றியின் மூலம், மலையாள திரையுலகில் உலகளவில் 150 கோடி ரூபாய் கிளப்பில் மூன்று திரைப்படங்களை இணைத்த ஒரே நடிகர் என்ற வரலாற்றுச் சாதனையை மோகன்லால் படைத்துள்ளார். இதற்கு முன்பு இவரது நடிப்பில் வெளியான ‘துடரும்’ (Thudarum) மற்றும் ‘எம்புரான்’ (L2: Empuraan) ஆகிய படங்கள் இந்த மைல்கல்லைக் கடந்திருந்த நிலையில், தற்போது ‘த்ரிஷ்யம் 3’ படமும் அந்தப் பட்டியலில் இணைந்துள்ளது. இதன் மூலம் மலையாள சினிமாவின் வசூல் சக்கரவர்த்தி தான் என்பதை மோகன்லால் மீண்டும் நிரூபித்துள்ளார்.
ஓவர்சீஸ் மார்க்கெட்டில் அசுர வேட்டை
‘த்ரிஷ்யம் 3’ திரைப்படத்தின் மொத்த உலகளாவிய வசூலில் 54 சதவீதத்திற்கும் அதிகமான பங்களிப்பை வெளிநாட்டுச் சந்தைகளே வழங்கியுள்ளன. உலகெங்கிலும் வாழும் மலையாளி ரசிகர்கள் மற்றும் ‘த்ரிஷ்யம்’ பிரான்சைஸ் ரசிகர்கள் இப்படத்திற்குத் தங்களது பேராதரவை வழங்கி வருகின்றனர். கேரளாவில் மட்டும் முதல் 5 நாட்களில் 53.30 கோடி ரூபாய் நெட் வசூல் கிடைத்துள்ளது. மலையாளம் தவிர தமிழ், தெலுங்கு மற்றும் கன்னட மொழிகளிலும் இப்படம் நல்ல வரவேற்பைப் பெற்று வருகிறது.
200 கோடி கிளப்பை நோக்கி…
திரைப்பட வர்த்தக நிபுணர்களின் கணிப்புப்படி, இந்த வார இறுதி நாட்களுக்குள் ‘த்ரிஷ்யம் 3’ திரைப்படம் மிக எளிதாக 200 கோடி ரூபாய் கிளப்பில் இணைந்துவிடும் என எதிர்பார்க்கப்படுகிறது. தற்போது மிக அதிவேகமாக அதிக வசூல் செய்த மலையாள படங்களின் பட்டியலில் 8-வது இடத்திற்கு இப்படம் முன்னேறியுள்ளது. பாக்ஸ் ஆபீஸில் ஃபகத் பாசிலின் ‘ஆவேஷம்’ படத்தின் சாதனையை முறியடித்துள்ள ஜார்ஜ்குட்டி, அடுத்ததாக பிருத்விராஜின் ‘ஆடுஜீவிதம்’ படத்தின் சாதனையை நோக்கி நகர்ந்து கொண்டிருக்கிறார்.
