2026ஆம் ஆண்டின் முதல் பாதியில் (ஜனவரி-ஜூன்) இந்திய சொகுசு கார் சந்தை புதிய வரலாற்று சாதனை படைத்துள்ளது. மெர்சிடிஸ்-பென்ஸ் (Mercedes-Benz) மற்றும் பிஎம்டபிள்யூ (BMW) குழுமம் ஆகிய முன்னணி சொகுசு கார் நிறுவனங்கள் இக்காலகட்டத்தில் இதுவரை இல்லாத அளவிலான விற்பனை (Demand for Luxury Cars) வளர்ச்சியைப் பதிவு செய்துள்ளன. மின்சார வாகனங்கள் (EVs), பிரீமியம் எஸ்யூவிகள் (SUVs) மற்றும் உயர்தர சொகுசு மாடல்களுக்கான பெரும் தேவையே சந்தையின் இந்த அபார வளர்ச்சிக்குக் காரணமாகக் கருதப்படுகிறது. சந்தையில் முன்னணியில் உள்ள மெர்சிடிஸ்-பென்ஸ் நிறுவனம், இந்த ஆண்டின் முதல் ஆறு மாதங்களில் 9,768 கார்களை விற்பனை செய்துள்ளது. இது கடந்த ஆண்டின் இதே காலத்தில் விற்கப்பட்ட 9,013 கார்களை விட 9 சதவீதம் அதிகமாகும்.
பிஎம்டபிள்யூ கார் விற்பனை
மறுபுறம், பிஎம்டபிள்யூ குழுமம் இன்னும் வலுவான விற்பனை வளர்ச்சியைப் பதிவு செய்தது. இதன் விற்பனை 17 சதவீதம் அதிகரித்து 9,075 யூனிட்களை எட்டியது. இரு நிறுவனங்களின் இந்தச் சாதனை வளர்ச்சிக்கும் மின்சார வாகனங்களே முக்கிய உந்துசக்தியாக அமைந்தன. பிஎம்டபிள்யூ இக்காலகட்டத்தில் 2,359 மின்சார கார்களை விற்பனை செய்தது. இது முந்தைய ஆண்டை ஒப்பிடுகையில் 78 சதவீத மிகப்பெரிய வளர்ச்சியாகும். தற்போது நிறுவனத்தின் மொத்த விற்பனையில் பேட்டரி மூலம் இயங்கும் மாடல்களின் பங்கு 26 சதவீதமாக உள்ளது.
மின்சார கார்களின் பங்கு அதிகரிப்பு
தற்போது மின்சார வாகனங்களுக்கான முன்பதிவுகள் மொத்த ஆர்டர்களில் 30 சதவீதத்தைத் தாண்டி வருகிறது. கடந்த சில மாதங்களாக விநியோகச் சிக்கல்கள் காரணமாக இந்த அளவை எட்ட முடியவில்லை. இருப்பினும், விநியோகம் சீராக இருந்தால் மொத்த விற்பனையில் மின்சார கார்களின் பங்கு விரைவில் 30 சதவீதத்தைத் தாண்டும். நிறுவனத்தின் சிறப்பாகச் செயல்படும் மின்சார கார்கள் மற்றும் நாட்டில் வேகமாக மேம்பட்டு வரும் சார்ஜிங் உள்கட்டமைப்பு வசதி ஆகியவையே இந்த வெற்றிக்குக் காரணம்.
பொது சார்ஜிங் நெட்வொர்க்
சாலையில் செல்லும்போது கார் சார்ஜ் தீர்ந்துவிடுமோ என்ற அச்சம் வாடிக்கையாளர்களிடம் இப்போது முழுமையாக நீங்கிவிட்டதாக அந்நிறுவனம் கூறுகிறது. விரிவடைந்து வரும் பொது சார்ஜிங் நெட்வொர்க் மற்றும் ஒரே சார்ஜில் நீண்ட தூரம் பயணிக்கும் புதிய மின்சார கார்களின் திறன் ஆகியவை வாடிக்கையாளர்களின் நம்பிக்கையை அதிகரிக்கின்றன. இதற்கிடையில், மெர்சிடிஸ்-பென்ஸ் நிறுவனத்தின் மின்சார வாகனங்களுக்கும் வாடிக்கையாளர்களிடமிருந்து நல்ல வரவேற்பு கிடைத்து வருகிறது. ஏப்ரல்-ஜூன் காலாண்டில் நிறுவனத்தின் மொத்த விற்பனையில் மின்சார வாகனங்களின் பங்கு 14 சதவீதமாக இருந்துள்ளது.
