தொகுதி மறுவரையறை மசோதா தொடர்பாக திமுக உள்ளிட்ட 7 அரசியல் கட்சிகளின் பிரதிநிதிகளுடன் மத்திய பாஜக அரசு பேச்சுவார்த்தை நடத்தியதாக மத்திய அமைச்சர் கிரண் ரிஜிஜு தெரிவித்துள்ளார்.
இது தொடர்பாக காங்கிரஸ் கமிட்டித் தலைவர் மல்லிகார்ஜூன கார்கேவுக்கு மத்திய அமைச்சர் கிரண் ரிஜிஜூ எழுதிய கடிதம்: நாடாளுமன்றத்தில் தொகுதி மறுவரையறை தொடர்பான அரசியலமைப்பு சட்டத் திருத்தம் பரிசீலனைக்கு எடுத்துக்கொள்ளப்படுவதற்கு முன்பாக அனைத்துக் கட்சிக் கூட்டத்தைக் கூட்ட வேண்டும் என்று கோரி, அக்டோபர் 16-ந் தேதி பிரதமருக்கு நீங்கள் கடிதம் எழுதியுள்ளீர்கள்.
இந்த விவகாரத்தில் சில அம்சங்களைத் தெளிவுபடுத்தவும், எதிர்க்கட்சிகளுடன் பேச்சுவார்த்தை நடத்துவதற்கு அரசு மேற்கொண்ட முயற்சிகள் தொடர்பான உண்மைகளைப் பதிவு செய்யவும் உங்களுக்கு இந்தக் கடிதத்தை எழுதுகிறேன்.
முதலாவதாக, 2026-ம் ஆண்டு ஆகஸ்ட் 13-ந் தேதி மக்களவை காலவரையின்றி ஒத்திவைக்கப்பட்டு 64 நாட்கள் கடந்தும் நாடாளுமன்றக் கூட்டத்தொடர் முடித்து வைக்கப்படவில்லை என்று நீங்கள் குறிப்பிட்டுள்ளீர்கள்.
இது தொடர்பாக ஒரு விஷயத்தைத் தெளிவுபடுத்த விரும்புகிறேன்.
நாடாளுமன்ற அவை காலவரையின்றி ஒத்திவைக்கப்பட்ட பிறகு, குறிப்பிட்ட காலத்துக்குள் அந்த கூட்டத் தொடரை முறைப்படி முடித்து வைக்க வேண்டும் என்று அரசியலமைப்புச் சட்டத்தில் எந்தக் கட்டாயமும் இல்லை.
குறிப்பிட்ட கால இடைவெளியில் நாடாளுமன்றக் கூட்டத்தொடர் முறைப்படி முடித்து வைக்கப்படவில்லை என்ற ஒரே காரணத்தால், அது அரசியலமைப்புச் சட்டத்துக்கோ நாடாளுமன்ற நடைமுறைகளுக்கோ எதிரான செயலாகவோ, விதிமீறலாகவோ ஆகிவிடாது.
கடந்த காலங்களில் நாடாளுமன்ற அவைகள் நீண்ட நாட்களுக்கு முறைப்படி முடித்து வைக்கப்படாமல் இருந்ததற்கு ஏராளமான உதாரணங்கள் உள்ளன. அதிகபட்சமாக 87 நாட்கள் வரை அவ்வாறு இருந்துள்ளன.
2008-ம் ஆண்டு ஜூலை 21, 22 ஆகிய 2 நாட்கள் நம்பிக்கை வாக்கெடுப்புக்காக மக்களவை கூடியது. அதன் பின்னர் அந்தக் கூட்டத்தொடர் முறைப்படி முடித்து வைக்கப்படாமல் இருந்தது.
பின்னர் 2008-ம் ஆண்டு அக்டோபர் 17-ந் தேதி மக்களவை மீண்டும் கூடியது. அக்டோபர் 24-ந் தேதி அவை ஒத்திவைக்கப்பட்டு, டிசம்பர் 10-ந் தேதி மீண்டும் கூடுவதாக அறிவிக்கப்பட்டது. இதேபோன்ற பல நிகழ்வுகள் கடந்த காலங்களில் நடந்துள்ளன.
1987-ம் ஆண்டு 76 நாட்களும், 1989-ம் ஆண்டு 54 நாட்களும், 2006-ம் ஆண்டு 49 நாட்களும், 2013-ம் ஆண்டு 49 நாட்களும், 1963-ம் ஆண்டு 41 நாட்களும் நாடாளுமன்ற அவைகள் முறைப்படி முடித்து வைக்கப்படாமல் இருந்துள்ளன.
அரசியல் கட்சிகளுடன் பேச்சுவார்த்தை
இரண்டாவதாக, தொகுதி மறுவரையறை தொடர்பான அரசியலமைப்புச் சட்டத் திருத்த மசோதாவைப் பரிசீலித்து நிறைவேற்றுவதற்கு எதிர்க்கட்சிகளின் ஆதரவையும் ஒத்துழைப்பையும் அரசு தொடர்ந்து கோரி வந்துள்ளது.
பிரதான எதிர்க்கட்சியான காங்கிரஸ் கட்சியுடன் அரசு பல்வேறு சந்தர்ப்பங்களில் தொடர்புகொண்டு பேசியுள்ளது.
இது தொடர்பாக 2026-ம் ஆண்டு மார்ச் 16-ந் தேதி, மார்ச் 26-ந் தேதி, ஏப்ரல் 12-ந் தேதி ஆகிய நாட்களில் நான் உங்களுக்குக் கடிதங்கள் எழுதியுள்ளேன்.
இந்த எழுத்துப்பூர்வமான தகவல் பரிமாற்றங்கள் மட்டுமின்றி, இந்த விவகாரம் குறித்து உங்களுடன் நேரடியாகவும் பேசி, உங்கள் ஆதரவையும் ஒத்துழைப்பையும் கோரியுள்ளேன்.
நாடாளுமன்ற மழைக்காலக் கூட்டத்தொடரின்போது, மக்களவை எதிர்க்கட்சித் தலைவர் ராகுல் காந்தியையும் நான் நேரில் சந்தித்துப் பேசினேன். இந்த விவகாரத்தில் அவரது ஒத்துழைப்பையும் கோரினேன்.
ஆனால், தொடர்ந்து பலமுறை கோரிக்கை விடுத்தும், பேச்சுவார்த்தை நடத்துவதற்கான தேதிகளை காங்கிரஸ் கட்சி தெரிவிக்கவில்லை.
இதையடுத்து, பிற அரசியல் கட்சிகளுடனும் அரசு பேச்சுவார்த்தை நடத்தும் முயற்சிகளை மேற்கொண்டது. முன்மொழியப்பட்டுள்ள சட்டத்திருத்தத்துக்கு ஆதரவாகப் பேச்சுவார்த்தையை முன்னெடுக்கவும், பரந்த அளவிலான ஒருமித்த கருத்தை உருவாக்கவும்
- திமுக
- சமாஜ்வாதி கட்சி
- ஒய்எஸ்ஆர் காங்கிரஸ் கட்சி
- தேசியவாத காங்கிரஸ் கட்சி
- சிவசேனா (உத்தவ் பாலாசாகேப் தாக்கரே)
- அகில இந்திய மஜ்லிஸ் கட்சி (AIMIM)
- பிஜு ஜனதா தளம் (BJD) உள்ளிட்ட கட்சிகளின் பிரதிநிதிகளுடன் ஆலோசனைகள் நடத்தப்பட்டன.
இத்தகைய சூழ்நிலையில், அரசு ஏற்கெனவே தொடர்ந்து பேச்சுவார்த்தை நடத்துவதற்கான முயற்சிகளை மேற்கொண்டுள்ளபோது, மீண்டும் மீண்டும் ஆலோசனைக் கூட்டம் நடத்த வேண்டும் என்ற கோரிக்கை ஏன் முன்வைக்கப்படுகிறது என்பது தெளிவாகத் தெரியவில்லை.
ஏற்கெனவே மேற்கொள்ளப்பட்ட ஆலோசனைகளை உரிய முறையில் கருத்தில் கொள்ளாமல், அதே கோரிக்கையை மீண்டும் மீண்டும் வலியுறுத்துவதற்குப் பதிலாக, எதிர்க்கட்சிகள் ஆக்கப்பூர்வமான ஒத்துழைப்பை வழங்குவதுதான் தற்போது அவசியமாகும்.
அரசு ஆலோசனைகளை நடத்துவதற்கும், நாடாளுமன்றத்தில் ஆக்கப்பூர்வமான முறையில் விவாதங்களை முன்னெடுப்பதற்கும் உறுதியான விருப்பத்துடன் இருப்பதையே இந்த முயற்சிகள் பிரதிபலிக்கின்றன.
நாடாளுமன்ற ஜனநாயகத்தின் அடிப்படைக் கொள்கைகளைப் பின்பற்றுவதிலும், நாடாளுமன்றம் திறம்படச் செயல்படுவதன் மூலம் அர்த்தமுள்ள பேச்சுவார்த்தைகளை முன்னெடுப்பதிலும் அரசு உறுதியாக உள்ளது என்பதை மீண்டும் வலியுறுத்துகிறேன்.
தேசிய முக்கியத்துவம் வாய்ந்த அனைத்துப் பிரச்சினைகள் குறித்த ஆலோசனைகளிலும் விவாதங்களிலும் அனைத்து அரசியல் கட்சிகளும் பங்கேற்பதை நாங்கள் மதிக்கிறோம். காங்கிரஸ் கட்சியும் ஆக்கப்பூர்வமான பங்கை வகிக்கும் என்றும், எதிர்காலத்தில் கொண்டுவரப்படும் முக்கியமான சட்டங்களைத் தடுக்காது என்றும் நம்புகிறேன். இவ்வாறு மத்திய அமைச்சர் கிரண் ரிஜிஜூ தெரிவித்துள்ளார்.
