நம் நாட்டில் கிரெடிட் கார்டுகளின் (Credit Card) பயன்பாடு வேகமாக அதிகரித்து வருகிறது. இந்திய ரிசர்வ் வங்கி (RBI) பகிர்ந்த சமீபத்திய தரவுகளின்படி, 2021 மற்றும் 2025ஆம் ஆண்டுகளுக்கு இடையில் கிரெடிட் கார்டு பரிவர்த்தனைகள் 2.6 மடங்குக்கு மேல் அதிகரிக்கும் என்று கணிக்கப்பட்டுள்ளது. இந்திய ரிசர்வ் வங்கியின் கூற்றுப்படி, இந்தக் காலகட்டத்தில் தனியார் துறை வங்கிகள் தங்கள் சந்தைப் பங்கை அதிகரிப்பதன் மூலம் இந்தப் பிரிவில் தங்கள் ஆதிக்கத்தை வலுப்படுத்தியுள்ளன.
இந்திய ரிசர்வ் வங்கியின் ‘பணம் செலுத்தும் முறை அறிக்கை, டிசம்பர் 2025’ (Payment System Report, December 2025) இன் படி, 2021ஆம் ஆண்டில் கிரெடிட் கார்டு பரிவர்த்தனைகளின் எண்ணிக்கை 2.16 பில்லியனாக இருந்தது. இது 2025ஆம் ஆண்டில் 5.7 பில்லியனாக அதிகரிக்கும் என்று எதிர்பார்க்கப்படுகிறது. தரவுகளின்படி, 2021ஆம் ஆண்டில் மொத்த கிரெடிட் கார்டு பரிவர்த்தனைகளின் மதிப்பு ரூ. 8.9 லட்சம் கோடியாக இருந்தது. இது 2025ஆம் ஆண்டில் மூன்று மடங்குக்கு மேல் அதிகரித்து ரூ. 23.2 லட்சம் கோடியாக உயரும் என்று எதிர்பார்க்கப்படுகிறது.
மறுபுறம், டெபிட் கார்டு (ATM Card) பரிவர்த்தனைகள் குறைந்துள்ளன. டெபிட் கார்டு பரிவர்த்தனைகளின் எண்ணிக்கை 2021ஆம் ஆண்டில் 408.7 கோடியிலிருந்து 2025ஆம் ஆண்டில் 133.6 கோடியாகக் குறைந்துள்ளது. இந்தக் காலகட்டத்தில், பரிவர்த்தனைகளின் மதிப்பும் ரூ. 7.4 லட்சம் கோடியிலிருந்து ரூ. 4.5 லட்சம் கோடியாகக் குறைந்துள்ளது. யுபிஐ, டிஜிட்டல் வாலெட்டுகள் மற்றும் கிரெடிட் கார்டுகளின் பயன்பாடு அதிகரித்ததே இந்தக் குறைவுக்குக் காரணம் என ரிசர்வ் வங்கி கூறியுள்ளது. இருப்பினும், டெபிட் கார்டுகளே மிகவும் பரவலாகப் பயன்படுத்தப்படும் அட்டையாகத் தொடர்கின்றன.
தனியார் துறை வங்கிகள் கிரெடிட் கார்டு சந்தையில் தங்களின் பங்கை டிசம்பர் 2021ஆம் ஆண்டில் 67.7 சதவீதத்திலிருந்து 2025ஆம் ஆண்டின் டிசம்பர் மாதத்துக்குள் 71.1 சதவீதமாக அதிகரித்துள்ளன. பொதுத்துறை வங்கிகளின் பங்கு சிறிதளவு அதிகரித்து 23.9 சதவீதமாக உயர்ந்துள்ளது. அதே நேரத்தில் வெளிநாட்டு வங்கிகளின் பங்கு 3.8 சதவீதமாகக் குறைந்துள்ளது. 2016 முதல் 2025 வரையிலான காலகட்டத்தில், டிஜிட்டல் பரிவர்த்தனைகளின் எண்ணிக்கை 33 மடங்கு அதிகரித்தது. அதே நேரத்தில் அவற்றின் மதிப்பு கிட்டத்தட்ட மூன்று மடங்காக உயர்ந்துள்ளது.