அமெரிக்காவுடன் வர்த்தக ஒப்பந்தம் ஏற்படும் என்ற எதிர்பார்ப்பு இருந்த நிலையில், கடைசி நேரத்தில் முன்வைக்கப்பட்ட நிபந்தனைகளை கனடா நிராகரித்துள்ளது.
இதையடுத்து இரு நாடுகளுக்கும் இடையிலான வர்த்தக மோதல் மீண்டும் தீவிரமடைந்துள்ளது. கனடாவின் இந்த முடிவு அந்நாட்டின் பொருளாதாரத்தில் எந்த அளவுக்கு தாக்கத்தை ஏற்படுத்தும் என்ற கேள்வி எழுந்துள்ளது.
ஒப்பந்தத்தை ஏன் நிராகரித்தது கனடா?
அமெரிக்கா முன்வைத்த இறுதி நிபந்தனைகள் கனடாவின் வர்த்தக சுதந்திரம், வாகனத் துறை மற்றும் மொழி, கலாச்சார பாதுகாப்பு உள்ளிட்ட விஷயங்களில் பாதிப்பை ஏற்படுத்தும் என்று பிரதமர் மார்க் கார்னி தெரிவித்துள்ளார்.
“அதிகமாக கேட்டார்கள்; குறைவாகவே வழங்கினர்” என்ற நிலைப்பாட்டில் கனடா பேச்சுவார்த்தையை நிறுத்தியுள்ளது.
50% வரி… கனடாவுக்கு புதிய சிக்கல்
பேச்சுவார்த்தை தோல்வியடைந்ததைத் தொடர்ந்து, சுமார் 20 பில்லியன் அமெரிக்க டாலர் மதிப்பிலான கனடா பொருட்களுக்கு அமெரிக்கா 50 சதவீத வரியை விதித்துள்ளது.
மரத்தால் செய்யப்பட்ட ஹாக்கி மட்டைகள் உள்ளிட்ட பல பொருட்கள் இதன் தாக்கத்தை எதிர்கொள்கின்றன. இது கனடாவின் மொத்த அமெரிக்க ஏற்றுமதியில் ஒரு சிறிய பகுதியை மட்டுமே பாதித்தாலும், இரு நாடுகளின் வர்த்தக உறவில் ஏற்பட்டுள்ள விரிசல் கவலையை ஏற்படுத்தியுள்ளது.
பதிலடி கொடுக்க தயாராகும் கனடா
அமெரிக்காவின் நடவடிக்கைக்கு பதிலாக, அதே அளவில் வரிகளை விதிக்க கனடா முடிவு செய்துள்ளது. “டாலருக்கு டாலர்” என்ற அடிப்படையில் பதிலடி இருக்கும் என்று கார்னி தெரிவித்துள்ளார்.
இதனால் இரு நாடுகளின் நிறுவனங்களுக்கும் மூலப்பொருள் செலவு, சந்தை அணுகல் மற்றும் விநியோகச் சங்கிலியில் அழுத்தம் அதிகரிக்கும் நிலை ஏற்பட்டுள்ளது.
பொருளாதார தாக்கம் எப்படி இருக்கும்?
அமெரிக்க சந்தையை அதிகம் நம்பியிருக்கும் கனடாவுக்கு இந்த மோதல் நீண்ட காலம் நீடித்தால் வேலைவாய்ப்பு, முதலீடு மற்றும் ஏற்றுமதி துறைகளில் பாதிப்பு ஏற்படலாம்.
குறிப்பாக வாகனங்கள், எஃகு, அலுமினியம் மற்றும் விவசாயப் பொருட்கள் தொடர்பான நிறுவனங்கள் அதிக அழுத்தத்தை சந்திக்க வாய்ப்புள்ளது. மறுபுறம, அமெரிக்க நிறுவனங்களும் கனடாவிலிருந்து வரும் பொருட்களின் விலை உயர்வை எதிர்கொள்ள வேண்டியிருக்கும்.
இரு நாடுகளுக்கும் இடையிலான வர்த்தக உறவு பல ஆண்டுகளாக ஒன்றையொன்று சார்ந்த நிலையில் இருப்பதால், இந்த மோதலின் முழுமையான பொருளாதார விளைவுகள் அடுத்த சில மாதங்களில் தெளிவாகத் தெரியவரும்.
