ரூ.10-க்கு கேம்பா குளிர்பானத்தைக் களமிறக்கி கவனம் ஈர்த்த ரிலையன்ஸ் நிறுவனம், தற்போது பால் சார்ந்த பானங்கள் சந்தையிலும் தடம் பதித்துள்ளது.
ரிலையன்ஸ் கன்ஸ்யூமர் புராடக்ட்ஸ் நிறுவனம், ‘ஜாய்லேண்ட்’ (Joyland) என்ற பெயரில் ஃப்ளேவர்டு மில்க் பானத்தைத் தமிழகத்தில் அறிமுகப்படுத்தியுள்ளது. ரூ.20 விலையில் விற்பனைக்கு வந்துள்ள இந்தப் புதிய தயாரிப்பு, அமுல், ஐடிசி, மதர் டெய்ரி, கேவின்ஸ் உள்ளிட்ட நிறுவனங்களுடன் போட்டியிடத் தயாராகியுள்ளது.
தமிழகத்தில் அறிமுகமான ஜாய்லேண்ட்
ரிலையன்ஸ் நிறுவனத்தின் இந்தப் புதிய பால் பானம், பால் சார்ந்த பொருட்களைக் கொண்டு தயாரிக்கப்படுகிறது. தொடக்கத்தில் ஸ்ட்ராபெர்ரி, வெனிலா ஆகிய சுவைகளில் கிடைக்கிறது. எளிதாக எடுத்துச் சென்று குடிக்கும் வகையில் தயாராக விற்பனை செய்யப்படும் பானங்கள் மீதான வரவேற்பைக் கருத்தில் கொண்டு, இந்தச் சந்தையில் நிறுவனம் நுழைந்துள்ளது.
ரூ.20 விலையில் விற்பனை
ஜாய்லேண்ட் பானத்தின் விலை ரூ.20 என நிர்ணயிக்கப்பட்டுள்ளது. ஏற்கெனவே இந்தப் பிரிவில் அமுல் கூல், மதர் டெய்ரி, நந்தினி, சன்ஃபீஸ்ட் ஸ்மூத், கேவின்ஸ் உள்ளிட்ட பிராண்டுகள் விற்பனையில் உள்ளன. இவற்றின் தயாரிப்புகளும் இதேபோன்ற விலை வரம்பில் கிடைப்பதால், விலை மட்டுமே ஜாய்லேண்டுக்கு தனிப்பட்ட முன்னிலை அளிக்காது. சுவை, தரம், விற்பனை வலையமைப்பு ஆகியவை முக்கியப் பங்கு வகிக்கலாம்.
இந்தியாவில் வளர்ந்து வரும் சந்தை
யூரோமானிட்டர் அறிக்கையை மேற்கோள் காட்டி மின்ட் வெளியிட்ட தகவலின்படி, இந்தியாவின் ஃப்ளேவர்டு மில்க் சந்தை 2021-ல் ரூ.4,420 கோடியாக இருந்தது. 2025-ல் ரூ.7,600 கோடியாக உயர்ந்த இந்தச் சந்தை, 2026-ல் ரூ.8,360 கோடியை எட்டும் எனக் கணிக்கப்பட்டுள்ளது.
நாடு முழுவதும் விரிவாக்கத் திட்டம்
ரிலையன்ஸ் கன்ஸ்யூமர் புராடக்ட்ஸ் இயக்குநர் டி. கிருஷ்ணகுமார் கூறுகையில், தமிழகத்தில் தொடங்கும் இந்தப் பயணம், ஜாய்லேண்ட் பால் பானங்களின் வரிசையை விரிவுபடுத்தவும், படிப்படியாக நாடு முழுவதும் விற்பனையை அதிகரிக்கவும் உதவும் என்றார். எதிர்காலத்தில் கூடுதல் சுவைகளையும், பிற பால் சார்ந்த பானங்களையும் அறிமுகப்படுத்த நிறுவனம் திட்டமிட்டுள்ளது.
கேம்பா குளிர்பானத்தின் மூலம் ஏற்கெனவே பானங்கள் சந்தையில் கவனம் பெற்ற ரிலையன்ஸ், தற்போது பால் பானங்கள் பிரிவிலும் தனது விற்பனையை விரிவுபடுத்துகிறது. இந்தப் புதிய வரவு சந்தையில் எத்தகைய வரவேற்பைப் பெறுகிறது என்பது இனி தெரியவரும்.
