தமிழ் சினிமாவின் சூப்பர் ஸ்டார் ரஜினிகாந்த் மற்றும் உலகநாயகன் கமல்ஹாசன்… (Rajinikanth and Kamal Haasan Combo Films) இந்த இரண்டு ஜாம்பவான்களின் பெயரைக் கேட்டாலே ரசிகர்கள் மத்தியில் ஒரு சிலிர்ப்பு ஏற்படும். திரையுலகில் ஐம்பது ஆண்டுகளுக்கும் மேலாக ஜொலிக்கும் இந்த நட்சத்திரங்கள், தங்கள் திரைப்பயணத்தின் ஆரம்ப காலகட்டங்களில் பல படங்களில் இணைந்து கலக்கியுள்ளனர்.

கே. பாலச்சந்தரின் அறிமுகம்: ‘அபூர்வ ராகங்கள்’ (1975)

1975 ஆம் ஆண்டு, தமிழ் திரையுலகின் தனித்துவம் மிக்க இயக்குநர் கே. பாலச்சந்தர் எழுதி இயக்கிய ‘அபூர்வ ராகங்கள்’ திரைப்படம், ரஜினிகாந்தின் தமிழ் திரையுலக அறிமுகத்தை உலகிற்கு அறிவித்தது. கமல்ஹாசன் ‘பிரசன்னா’ என்ற முக்கிய கதாபாத்திரத்தில் நடிக்க, ரஜினிகாந்த் ‘பாண்டியன்’ என்ற துணை கதாபாத்திரத்தில் தோன்றினார். ஸ்ரீவித்யா, மேஜர் சுந்தர்ராஜன், ஜெயசுதா போன்ற நட்சத்திரங்களும் இதில் பங்களித்தனர். வயதில் மூத்தவருடனான காதல், சமூகக் கட்டுப்பாடுகளை மீறிய உறவுகள் எனப் புதுமையான கதைகளத்துடன் வெளியான இப்படம், விமர்சன ரீதியாகவும் வணிக ரீதியாகவும் பெரும் வெற்றி பெற்றது. மூன்று தேசிய விருதுகள் மற்றும் மூன்று ஃபிலிம்பேர் விருதுகளை வென்று, கமல்ஹாசன் மற்றும் ஸ்ரீவித்யாவுக்கு ஒரு திருப்புமுனையாக அமைந்ததுடன், ரஜினிகாந்தின் அசைக்க முடியாத அஸ்திவாரத்திற்கு முதல் கல்லாகவும் அமைந்தது.

‘மூன்று முடிச்சு’ மற்றும் ‘அந்தூலேனி கதா’

1976 ஆம் ஆண்டு வெளியான ‘மூன்று முடிச்சு’ திரைப்படம், ரஜினிகாந்தின் திரைப்பயணத்தில் ஒரு முக்கியமான மைல்கல். கே. பாலச்சந்தர் இயக்கத்தில் உருவான இந்தப் படத்தில், கமல்ஹாசன் ‘பாலாஜி’ என்ற அப்பாவி கதாபாத்திரத்திலும், ரஜினிகாந்த் ‘பிரசாத்’ என்ற எதிர்மறை எண்ணம் கொண்ட கதாபாத்திரத்திலும் நடித்தனர். 13 வயதான ஸ்ரீதேவிக்கு இது முதல் முக்கிய கதாநாயகி வேடம். இரண்டு அறை நண்பர்களுக்கும், ஒரு பெண்ணுக்கும் இடையிலான சிக்கலான காதல், துரோகம், பழிவாங்கல் கதையைத் தந்தது ‘மூன்று முடிச்சு’. ரஜினியின் ஸ்டைலான எதிர்மறை நடிப்பு பரவலாகப் பாராட்டப்பட்டது.

இதே காலகட்டத்தில், தெலுங்கில் கே. பாலச்சந்தர் இயக்கிய ‘அந்தூலேனி கதா’ (1976) படத்திலும் இரு நட்சத்திரங்களும் நடித்தனர். இதில் ஜெயப்பிரதா முக்கிய வேடத்தில் நடிக்க, ரஜினிகாந்த் சாரதாவின் குடிகார சகோதரன் ‘மூர்த்தி’ வேடத்திலும், கமல்ஹாசன் சாரதாவின் முதலாளி ‘அருண் கோஷ்’ என்ற சிறப்புத் தோற்றத்திலும் வந்து சென்றனர். இந்தப் படமும் விமர்சன ரீதியாகப் பாராட்டப்பட்டதுடன், இருவரின் தெலுங்கு சினிமா அறிமுகமாகவும் அமைந்தது.

‘அவர்கள்’, ’16 வயதினிலே’

1977 ஆம் ஆண்டில் வெளியான ‘அவர்கள்’ திரைப்படம் மீண்டும் கே. பாலச்சந்தரின் இயக்கத்தில் சுஜாதா, கமல்ஹாசன், ரஜினிகாந்த் ஆகியோரை ஒன்றிணைத்தது. சுஜாதா ஒரு விவாகரத்துப் பெண்ணின் உணர்ச்சிப் போராட்டத்தை மையமாகக் கொண்டு நடித்த இந்தப் படத்தில், கமல்ஹாசன் அவளைக் காதலிக்கும் ‘ஜனார்த்தனன் (ஜானி)’ என்ற வேடத்திலும், ரஜினிகாந்த் அவளின் கொடுமைக்கார முன்னாள் கணவன் ‘ராமநாதன்’ வேடத்திலும் நடித்தனர். ரஜினிகாந்தின் சாடிஸ்ட் கணவன் கதாபாத்திரம் அவரது சிறந்த நடிப்புகளில் ஒன்றாகக் கருதப்படுகிறது.

அதே ஆண்டு, தமிழ் திரையுலகில் புதியதொரு அலையை ஏற்படுத்திய பாரதிராஜாவின் அறிமுகப் படமான ’16 வயதினிலே’ வெளியானது. முழுக்க முழுக்க கிராமப்புறத்தில் படமாக்கப்பட்ட முதல் தமிழ்ப் படமான இது, தமிழ் சினிமா வரலாற்றில் ஒரு புதிய சகாப்தத்தைத் தொடங்கியது. கமல்ஹாசன் அப்பாவி ‘சப்பாணி’ கதாபாத்திரத்திலும், ஸ்ரீதேவி கிராமத்துப் பெண் ‘மயிலு’வாகவும், ரஜினிகாந்த் முரட்டு வில்லன் ‘பரட்டையன்’ ஆகவும் அசத்தினர். ரஜினியின் “இது எப்பிடி இருக்கு?” என்ற வசனம் பட்டிதொட்டியெங்கும் பிரபலமானது. இளையராஜாவின் இசை, பாரதிராஜாவின் இயக்கம், மூன்று நட்சத்திரங்களின் யதார்த்தமான நடிப்பு என அனைத்தும் பாராட்டப்பட்டு, வணிக ரீதியாக மிகப்பெரிய வெற்றி பெற்றது.

‘தப்புத் தாளங்கள்’ , ‘இளமை ஊஞ்சலாடுகிறது’

1978 ஆம் ஆண்டு கே. பாலச்சந்தர் இயக்கத்தில் வெளியான ‘தப்புத் தாளங்கள்’ திரைப்படத்தில் ரஜினிகாந்த் ‘தேவு’ என்ற கதாபாத்திரத்தில் கதாநாயகனாக நடித்தார். சரிதாவுக்கு இது முதல் திரைப்படம். கமல்ஹாசன் இப்படத்தில் ‘அமிர்ட் லால்’ என்ற சிறப்புத் தோற்றத்தில் நடித்தார். ஒரு தாதாவுக்கும், பாலியல் தொழிலாளிக்கும் இடையேயான வாழ்வியலையும், அவர்கள் நேர்மையான வாழ்க்கை வாழ முயற்சிப்பதில் சமூகத்தின் ‘தவறான தாளங்கள்’ எப்படித் தடைகளை உருவாக்குகின்றன என்பதையும் இப்படம் எடுத்துரைத்தது. ரஜினிகாந்தின் உணர்வுபூர்வமான நடிப்பு பாராட்டப்பட்டாலும், பாக்ஸ் ஆபிஸில் பெரிய வெற்றி பெறவில்லை.

அதே ஆண்டு ஸ்ரீதர் இயக்கத்தில் வெளியான ‘இளமை ஊஞ்சலாடுகிறது’ ஒரு மென்மையான காதல் காவியமாக அமைந்தது. கமல்ஹாசன் ‘பிரபு’வாகவும், ரஜினிகாந்த் ‘முரளி’யாகவும், ஸ்ரீபிரியா ‘பத்மா’வாகவும், ஜெயசித்ரா ‘ஜெயந்தி’யாகவும் நடித்தனர். இரண்டு நண்பர்களுக்கும் ஒரு பெண்ணுக்கும் இடையிலான சிக்கலான காதல் உறவுகளை ஆராய்ந்த இப்படம், 175 நாட்களுக்கு மேல் ஓடி வணிக ரீதியாக மிகப்பெரிய வெற்றியைப் பெற்றது. இளையராஜாவின் இசையில் உருவான “என்னடி மீனாட்சி”, “ஒரே நாள் உன்னை நான்” போன்ற பாடல்கள் இன்றளவும் என்றும் இளமை மாறாத கிளாசிக் பாடல்களாகத் திகழ்கின்றன.

தனித்தனிப் பாதைகளில்: பிற படங்களும், பிரிவும்

‘ஆடு புலி ஆட்டம்’, ‘அலாவுதீனும் அற்புத விளக்கும்’, ‘நினைத்தாலே இனிக்கும்’, ‘அலைகள்’, ‘அவள் அப்படித்தான்’ உள்ளிட்ட பல படங்களிலும் இந்த இருபெரும் நட்சத்திரங்கள் இணைந்து நடித்துள்ளனர். மொத்தமாக, ரஜினிகாந்த் மற்றும் கமல்ஹாசன் இருவரும் 13 படங்களில் இணைந்து நடித்துள்ளனர். இதில் ஏழு படங்கள் மிகப்பெரிய வெற்றியைப் பெற்றன.

1980-களில் இருந்து இருவரும் தனித்தனிப் பாதைகளில் பயணித்து தமிழ் சினிமாவின் உச்ச நட்சத்திரங்களாக வலம் வந்து, தங்களின் தனித்தன்மை மிக்க நடிப்பால் கோடான கோடி ரசிகர்களைக் கவர்ந்தனர்.

வரலாற்றுச் சிறப்புமிக்க மீள் சந்திப்பு: ‘தலைவர் 173’

46 ஆண்டுகளுக்கும் மேலான அவர்களின் நட்பு, சமீபத்திய நாட்களில் மீண்டும் திரையில் சங்கமிக்கப் போவதாக வெளியான செய்தி கோலிவுட்டையே குதூகலப்படுத்தியுள்ளது. உலகநாயகன் கமல்ஹாசனின் ராஜ் கமல் பிலிம்ஸ் இன்டர்நேஷனல் (RKFI) தயாரிப்பில், சூப்பர் ஸ்டார் ரஜினிகாந்த் நடிக்கவுள்ள ‘தலைவர் 173’ திரைப்படம் குறித்த அதிகாரப்பூர்வ அறிவிப்பு வெளியானது. சுந்தர் சி இயக்கத்தில், பொங்கல் 2027 அன்று இத்திரைப்படம் வெளியாகும் எனத் தெரிவிக்கப்பட்டுள்ளது. கிட்டத்தட்ட 50 ஆண்டுகால நட்பையும், சகோதரத்துவத்தையும் கொண்டாடும் இந்த வரலாற்றுச் சிறப்புமிக்க மீள் சந்திப்பு, ரசிகர்கள் மத்தியில் பெரும் எதிர்பார்ப்பை ஏற்படுத்தியுள்ளது. இரு பெரும் ஆளுமைகள் ஒரு படத்திற்காக மீண்டும் இணைவது, தமிழ் சினிமா வரலாற்றில் ஒரு பொன்னெழுத்துக்களால் பொறிக்கப்பட வேண்டிய நிகழ்வாக அமையும் என்பதில் சந்தேகமில்லை.

ரஜினிகாந்த் மற்றும் கமல்ஹாசன் இணைந்து நடித்த காலங்கள் தமிழ் திரையுலகின் பொற்காலங்களாகப் போற்றப்படுகின்றன. ஒவ்வொரு படத்திலும் வெவ்வேறு பரிமாணங்களில் தங்களின் நடிப்பை வெளிப்படுத்தி, ரசிகர்களைக் கவர்ந்த இந்த இரு பெரும் ஆளுமைகளின் புதிய கூட்டணி, தமிழ் சினிமாவின் எதிர்காலத்திற்குப் புதிய திசையைக் காட்டும் என்பதில் ஐயமில்லை. இந்தச் செய்தி, சினிமா வட்டாரத்தில் மட்டுமல்லாமல், பொதுமக்களிடையேயும் பெரும் பேசுபொருளாக மாறியுள்ளது.

• மாயோன்