இந்தியாவில் அனைத்து வாகன வகைகளின் சில்லறை விற்பனையும் இந்த நிதியாண்டில் (FY2025-26) 13.3% வளர்ச்சி கண்டு 29,671,064 அலகுகளாக உயர்ந்தது. இது, முந்தைய நிதியாண்டான 2024-25-இல் பதிவான 26,187,255 அலகுகளை விட அதிகமாகும். ஆண்டின் தொடக்கத்தில் நிலவிய மந்தநிலையைச் சமாளிக்க உதவிய புதிய ‘GST 2.0’ வரி விகிதங்களே இந்த வளர்ச்சிக்கு முக்கியக் காரணம் என்று, இந்திய வாகன விற்பனையாளர்கள் சங்கங்களின் கூட்டமைப்பு (FADA) தெரிவித்தது.
பயணிகள் வாகன விற்பனை:
2025-26 நிதியாண்டில் பயணிகள் வாகனங்களின் (கார்கள், SUV) சில்லறை விற்பனை 4,705,056 அலகுகளாகப் பதிவானது; இது 2024-25 நிதியாண்டில் பதிவான 4,163,927 அலகுகளுடன் ஒப்பிடுகையில் அதிகம். இது ஆண்டுக்கு ஆண்டு அடிப்படையில் 13% வளர்ச்சியைக் காட்டுகிறது. எதிர்கால வாகனத் தேவை குறித்து மிதமான நம்பிக்கையுடன் இருப்பதாக FADA குறிப்பிட்டாலும், மேற்கு ஆசியாவில் நிலவும் போரின் தாக்கம் அந்தத் தேவையின் மீது தாக்கத்தை ஏற்படுத்தும் என்று FADA சுட்டிக்காட்டியுள்ளது.
இருசக்கர மற்றும் மூன்று சக்கர வாகன:
2024-25 நிதியாண்டில் 18,889,595 அலகுகளாக இருந்த இருசக்கர வாகன விற்பனை, 2025-26 நிதியாண்டில் 13.4% வளர்ச்சி கண்டு 21,420,386 அலகுகளாக உயர்ந்தது. அதேபோல, மூன்று சக்கர வாகனங்களின் சில்லறை விற்பனை 2024-25 நிதியாண்டில் 12,208,34 அலகுகளாக இருந்த நிலையில், 2025-26 நிதியாண்டில் 13,634,12 அலகுகளாக உயர்ந்தது. இது 11.68% வளர்ச்சியைக் காட்டுகிறது.
வணிக வாகன விற்பனை:
வணிக வாகனங்களின் சில்லறை விற்பனை, 2024-25 நிதியாண்டில் 949,406 அலகுகளாக இருந்த நிலையில், 2025-26 நிதியாண்டில் 11.74% வளர்ச்சி கண்டு 1,060,906 அலகுகளாக அதிகரித்தது. 2025-26 நிதியாண்டு இந்திய வாகனத் துறைக்குப் ஒரு மைல்கல் ஆண்டாக அமைந்தது என்றும், மொத்த விற்பனை 29,671,064 அலகுகளை எட்டியது என்றும் FADA-வின் தலைவர் சி.எஸ். விக்னேஷ்வர் தெரிவித்தார். இது ஆண்டுக்கு ஆண்டு அடிப்படையில் 13.3% வளர்ச்சியாகும். மேலும், ஆறு வாகன வகைகளில் ஐந்து வகைகள் புதிய விற்பனை சாதனைகளைப் படைத்துள்ளன. இது வெறும் ஒரு எண்ணிக்கை மட்டுமல்ல, தொழில்துறை 30 மில்லியன் யூனிட் என்ற இலக்கை நெருங்கிக் கொண்டிருப்பதற்கான அறிகுறியாகும்.
பண்டிகைக்கால விற்பனை:
செப்டம்பர் மாதம் முதல் புத்தாண்டு மற்றும் தீபாவளி பண்டிகைகளின் போது விற்பனை புதிய சாதனைகளைப் படைத்தது. மாதாந்திர விற்பனை 4 மில்லியன் யூனிட்களைத் தாண்டியது. ஜனவரி, பிப்ரவரி மற்றும் மார்ச் 2026 மாதங்களிலும் ஆண்டுக்கு ஆண்டு இரட்டை இலக்க வளர்ச்சி பதிவாகியுள்ளது. இது இந்த வளர்ச்சி பண்டிகைக் கால வளர்ச்சி மட்டுமல்ல, கட்டமைப்பு ரீதியானது என்பதையும் காட்டுகிறது.