இந்த வாரம் தங்கம் விலை எப்படி இருக்கும்? முதலீட்டாளர்கள் அதிக ஆர்வம்!

அமெரிக்கா-ஈரான் ஒப்பந்தம் தொடர்பான முன்னேற்றங்கள், கச்சா எண்ணெய் (Crude Oil) விலையில் ஏற்படும் ஏற்ற இறக்கங்கள் மற்றும் முக்கிய உலகளாவிய பொருளாதாரத் தரவுகள் ஆகியவை தங்கம் மற்றும் வெள்ளி விலைகளின் (Gold Rate) போக்கை தீர்மானிக்கின்றன. அதோடு சுவிட்சர்லாந்தில் நடைபெறவுள்ள பேச்சுவார்த்தைகள் மீது சந்தை கவனம் செலுத்தும் என்று சந்தை ஆய்வாளர்கள் தெரிவித்துள்ளனர். இந்தப் பேச்சுவார்த்தைகளை அமெரிக்கத் துணை அதிபர் ஜே.டி. வான்ஸ் (JD Vance) ஈரான் அதிகாரிகளுடன் இணைந்து முன்னெடுப்பார் என்று எதிர்பார்க்கப்படுகிறது. பதற்றத்தைத் தணிப்பதை நோக்கமாகக் கொண்டு கடந்த வாரம் உருவாக்கப்பட்ட கட்டமைப்பின் அடிப்படையில் இந்தப் பேச்சுவார்த்தைகள் அமையும்.

தங்கம் மற்றும் வெள்ளி விலைகளின் போக்கு:

நிபுணர்களின் கருத்துப்படி, இந்தப் பேச்சுவார்த்தையின் விளைவுகள் முதலீட்டாளர்களின் இடர் ஏற்புத் திறன் (risk appetite) மற்றும் எரிசக்தி சந்தைகளில் தாக்கத்தை ஏற்படுத்தலாம். இது தங்கம் மற்றும் வெள்ளி விலைகளில் நேரடி தாக்கத்தை ஏற்படுத்தும். மொஹரம் பண்டிகை காரணமாக வெள்ளிக்கிழமை காலை அமர்வில் உள்நாட்டுப் பண்டச் சந்தைகள் (commodity markets) மூடப்பட்டிருக்கும். ஜேஎம் ஃபைனான்சியல் சர்வீசஸ் லிமிடெட் நிறுவனத்தின் பண்டம் மற்றும் நாணய ஆராய்ச்சிப் பிரிவு துணைத் தலைவர் பிரணவ் மீர் கூறுகையில், “அமெரிக்கா-ஈரான் பேச்சுவார்த்தைகள் மற்றும் குறிப்பாக ஹார்முஸ் நீரிணை வழியாக கச்சா எண்ணெய் மற்றும் எல்என்ஜி (LNG) விநியோகம் ஆகியவற்றைச் சந்தை உன்னிப்பாகக் கவனித்து வருவதால், தங்கம் மற்றும் வெள்ளி விலைகளின் போக்கு தற்போது ஒரு குறிப்பிட்ட வரம்பிற்குள் உள்ளது,” என்று தெரிவித்தார்.

கடந்த வாரம் விலையில் கடும் சரிவு:

ரூபாயின் மதிப்பு வலுவடைந்ததாலும் தேவை குறைந்ததாலும் கடந்த வாரம் தங்கம் மற்றும் வெள்ளி விலைகள் கடுமையாகச் சரிந்தன. எம்சிஎக்ஸ் (MCX – Multi Commodity Exchange) சந்தையில் தங்கத்தின் எதிர்கால ஒப்பந்த விலை (futures) ரூ. 3,325 அல்லது 2.2 சதவீதம் குறைந்து 10 கிராமுக்கு ரூ. 1.47 லட்சமாக முடிவடைந்தது. அதேவேளையில், வெள்ளியின் விலை ரூ. 13,001 அல்லது 5.3 சதவீதம் என்ற அளவில் பெருமளவு சரிந்து ஒரு கிலோகிராமுக்கு ரூ. 2.33 லட்சமாக இருந்தது.

வலுவான ரூபாய் மதிப்பு:

“எரிசக்தி விலைகள் சரிவு, வலுவான ரூபாய் மதிப்பு மற்றும் அமெரிக்க ஃபெடரல் வங்கியின் மென்மையான கொள்கை நிலைப்பாடு (dovish policy stance) ஆகியவை விலையில் தாக்கத்தை ஏற்படுத்தியதால், வாரம் முழுவதும் தங்கம் விலை அழுத்தத்திற்குள்ளாகி சுமார் 2.2 சதவீத சரிவுடன் முடிவடைந்தது,” என்று எல்கேபி செக்யூரிட்டீஸ் (LKP Securities) நிறுவனத்தின் துணைத் தலைவர் ஜதின் திரிவேதி கூறினார். வலுவான ரூபாய் மதிப்பு இறக்குமதி செய்யப்படும் தங்கத்தின் விலையைக் குறைப்பதாகவும், இது விலையின் மீது கூடுதல் அழுத்தத்தை ஏற்படுத்துவதாகவும் அவர் குறிப்பிட்டுள்ளார்.