அமெரிக்காவில் கல்வி பயிலும் இந்திய மாணவர்களின் எண்ணிக்கை கடந்த ஒரு ஆண்டில் கணிசமாக குறைந்துள்ளதாக மத்திய அரசு தகவல் வெளியிட்டுள்ளது.
அமெரிக்க உள்துறை பாதுகாப்புத் துறையின் தரவின்படி, பிப்ரவரி 2025ல் 3,78,787 மாணவர்கள் இருந்த நிலையில், பிப்ரவரி 2026ல் அது 3,52,644 ஆக குறைந்துள்ளது. இதனால், மொத்தமாக சுமார் 6.9 சதவீத சரிவு பதிவாகியுள்ளது.
விசா கட்டுப்பாடுகள் (Visa Restrictions)
இந்த சரிவிற்கு முக்கிய காரணமாக அமெரிக்காவின் புதிய விசா விதிகள் (New Visa Rules) மற்றும் அதிகரித்த கண்காணிப்பு குறிப்பிடப்பட்டுள்ளது.
மத்திய வெளிநாட்டு விவகார இணை அமைச்சர் ராஜ்யசபாவில் பேசுகையில், “மாணவர் விசா விண்ணப்பங்கள் தற்போது கடுமையான சோதனைக்கு உட்படுத்தப்படுகின்றன. சமூக ஊடக பதிவுகள் வரை பரிசோதிக்கப்படும் நடைமுறை அறிமுகப்படுத்தப்பட்டுள்ளது.” என்று கூறினார்.
மேலும், “விசா என்பது உரிமை அல்ல, அது ஒரு சலுகை” என்ற அமெரிக்க அணுகுமுறை, விண்ணப்ப செயல்முறையை மேலும் கடுமையாக்கியுள்ளது.” என்று கூறினார்.
எஃப்-1 விசாவில் (F1 Visa) கடும் சரிவு
இந்த மாற்றத்தின் நேரடி தாக்கம் எஃப்-1 மாணவர் விசாக்களில் தென்படுகிறது. 2025 ஜூன் – ஜூலை காலத்தில், முந்தைய ஆண்டுடன் ஒப்பிடும்போது சுமார் 69% குறைவு பதிவாகியுள்ளது.
இந்த காலகட்டமே அமெரிக்க பல்கலைக்கழகங்களில் சேர்க்கைக்கான முக்கியமான விண்ணப்ப நேரம் என்பதால், இந்த சரிவு கல்வி திட்டங்களையே பாதித்துள்ளது.
உலகளாவிய மாற்றத்தின் ஒரு பகுதி
அமெரிக்கா மட்டும் அல்லாமல், கனடா, இங்கிலாந்து, ஆஸ்திரேலியா போன்ற நாடுகளும் மாணவர் விசா விதிகளை கடுமையாக்கி வருகின்றன.
இதன் காரணமாக, வெளிநாட்டு கல்வி திட்டங்களில் அதிக செலவு, நீண்ட செயல்முறை, உறுதியற்ற வேலை வாய்ப்பு போன்ற சவால்கள் உருவாகியுள்ளன.
மாணவர்களின் முடிவில் மாற்றம்
இந்த சூழ்நிலையில், இந்திய மாணவர்கள் மாற்று நாடுகளை தேர்வு செய்வது, வெளிநாட்டு கல்வியை தாமதப்படுத்துவது போன்ற முடிவுகளை எடுத்து வருகின்றனர். அமெரிக்கா “default choice” என்ற நிலை மெல்ல மாறி வருவதாக கல்வி நிபுணர்கள் கூறுகின்றனர்.
அமெரிக்காவில் இந்திய மாணவர் எண்ணிக்கையில் ஏற்பட்டுள்ள இந்த சரிவு, விசா கொள்கைகளின் நேரடி தாக்கமாக பார்க்கப்படுகிறது. கடுமையான சோதனைகள் மற்றும் நிபந்தனைகள் காரணமாக, வெளிநாட்டு கல்வி திட்டங்களை மாணவர்கள் புதிய கோணத்தில் மதிப்பீடு செய்யும் நிலை உருவாகியுள்ளது.