செங்கோட்டையன் முடிவு தற்கொலைக்குச் சமமானது – செம்மலை காட்டம்

நடிகர் விஜய்யின் தமிழக வெற்றிக் கழகத்தில் இணைந்துள்ள செங்கோட்டையனின் முடிவு தற்கொலைக்குச் சமமானது என அதிமுகவின் மூத்த தலைவர்களில் ஒருவரான செம்மலை தெரிவித்துள்ளார்.

அதிமுக தலைமையுடன் ஏற்பட்ட கருத்து வேறுபாடுகளை தொடர்ந்து கட்சியிலிருந்து விலகியவர்களை ஒன்றிணைக்க வேண்டும் என்று கெடு விதித்த செங்கோட்டையனை கட்சிப்பதவிகளிலிருந்து நீக்கினார் எடப்பாடி பழனிசாமி. இதைதொடர்ந்து தேவர் குரு பூஜையில் ஓபிஎஸ், சசிகலா, டிடிவி தினகரனை சந்தித்த நிலையில் அதிமுகவில் இருந்து அதிரடியாக நீக்கப்பட்டார்.

நேற்று முன்தினம் கோவையில் செய்தியாளர்களிடம் பேசிய செங்கோட்டையன், 50 ஆண்டுகால அரசியல் வரலாற்றில் ஏற்றத்தாழ்வுகளை சந்தித்து இயக்கத்திற்காக உழைத்த எனக்கு கொடுத்திருக்கக் கூடிய பரிசு உறுப்பினராக கூட இருக்கக் கூடாது என்ற முறையில் நீக்கப்பட்டு இருக்கிறேன் என்று தனது மன வேதனையை செங்கோட்டையன் வெளிப்படுத்தி இருந்தார்.

செங்கோட்டையன் தனது எம்எல்ஏ பதவியை ராஜினாமா செய்து விட்டு தவெகவில் இணைய உள்ளதாக நமது மின்னம்பலத்தில் டிஜிட்டல் திண்ணை: விஜய் முன்னிலையில் தவெக-வில் இணையும் செங்கோட்டையன்- ஓபன் ஆகிறது ‘ஜான் டோல்கேட்’? செய்தி வெளியிட்டு இருந்தோம். அதேபோல் நேற்று செங்கோட்டையன் தனது எம்எல்ஏ பதவியை ராஜினாமா செய்தார். பிற்பகலில் தவெக அலுவலகத்தில் விஜய் உடன் ஆலோசனையில் ஈடுபட்டார்.

இந்நிலையில் இன்று (நவம்பர் 27) காலை விஜய் முன்னிலையில் செங்கோட்டையன் தவெகவில் இணைந்தார். எம்ஜிஆர் காலத்தில் இருந்து அதிமுகவில் இருந்த செங்கோட்டையன் தற்போது தவெகவில் இணைந்திருப்பது தமிழக அரசியல் வட்டாரத்தில் பேசு பொருளாகி உள்ளது.

இது குறித்து அதிமுகவின் மூத்த தலைவர் செங்கோட்டையன் கூறுகையில் நேற்று வரை எந்த கட்சியில் இணைவார் என்ற பேச்சுகள் அடிபட்டிருந்த நிலையில். இன்று தவெகவில் இணைந்து இருக்கிறார். பூனை குட்டி வெளியே வந்துவிட்டது எடப்பாடி பழனிசாமி உடனான உரசல் கட்சியிலிருந்து வெளியேற காரணம் அவ்வளவுதான். அம்மா காலத்திலேயே இவர் கட்சியில் இருந்து விலக முயற்சித்தார். எடப்பாடி பழனிசாமி இந்த விஷயத்தில் பொறுமையாக இருந்தார். செங்கோட்டையனுக்கு வாய்ப்பு கொடுத்தார்.

ஆனால் செங்கோட்டையன் வாய்ப்பை பயன்படுத்திக் கொள்ளவில்லை. எனக்கு என்ன கேள்வி என்றால், செங்கோட்டையன் விஜயிடம் அரசியல் கற்றுக் கொள்ளப் போகிறாரா? இவர் சொல்லிக் கொடுக்கப் போகிறாரா? நதி கடலில் கலக்கலாம்; கடல் நதியில் கலக்குமா? இது தற்கொலைக்குச் சமம். தற்கொலைக்கு முடிவெடுத்தவர்களை தடுத்து வைத்திருக்க முடியாது. ஏற்கனவே வளர்ந்த கட்சியில் இருந்து விட்டு இனி ஒரு கட்சியை வளர்க்க போகிறேன் என்று சொல்வது தான் வேடிக்கை.

தவெக தொண்டர்களுடன் ஒட்டவே முடியாது வேண்டுமானால் தலைவர்களுடன் ஒட்டி உரசலாம். செங்கோட்டையனின் அரசியல் வாழ்க்கை முடிந்து போனது என்று கடுமையான விமர்சனங்களை முன் வைத்துள்ளார்.