பொது வருங்கால வைப்பு நிதி (PPF Scheme) என்பது மத்திய அரசின் மிகவும் பிரபலமான சேமிப்புத் திட்டங்களில் ஒன்றாகும். 1968 முதல் செயல்பட்டு வரும் இத்திட்டம், பணியில் இருப்பவர்கள் அல்லது தொழில் செய்பவர்கள் என யார் வேண்டுமானாலும் சேரக்கூடிய திட்டம் ஆகும். மேலும் இது ரிஸ்க் எடுக்க விரும்பாத முதலீட்டாளர்களுக்கு ஏற்றதாகும். இதற்கான வட்டி விகிதம் காலாண்டுக்கு ஒருமுறை நிர்ணயிக்கப்படுகிறது. தற்போது PPF வட்டி விகிதம் ஆண்டுக்கு 7.1% என நிர்ணயிக்கப்பட்டுள்ளது. கடந்த சில ஆண்டுகளாக அரசு இந்த விகிதத்தை நிலையாக வைத்துள்ளது.
இந்த வட்டி விகிதம் குறைவாகத் தோன்றினாலும், கூட்டு வட்டி (compounding interest) பலன் காரணமாக இது ஒரு லாபகரமான திட்டமாக அமைகிறது. PPF திட்டத்தில் முதலீடு செய்வதன் மூலம் வருமான வரிச் சட்டத்தின் பிரிவு 80C-இன் கீழ் ரூ.1.5 லட்சம் வரை வரி விலக்கு பெறலாம். இதிலிருந்து கிடைக்கும் வட்டி மற்றும் முதிர்வுத் தொகை ஆகியவை முற்றிலும் வரிக்கு உட்பட்டவை அல்ல. இது 15 ஆண்டு காலப்பகுதியில் நீண்ட காலச் செல்வத்தை உருவாக்க உதவுகிறது. இருப்பினும், புத்திசாலித்தனமாக முதலீடு செய்யாவிட்டால் நீங்கள் இழப்பைச் சந்திக்க நேரிடலாம்.
PPF திட்டத்தில் முதலீடு செய்வதற்கு முன் கவனத்தில் கொள்ள வேண்டிய சில முக்கியமான விஷயங்கள் உள்ளன. PPF திட்டத்தில் ஆண்டுக்குக் குறைந்தபட்சம் ரூ.500 மற்றும் அதிகபட்சம் ரூ.1.5 லட்சம் வரை முதலீடு செய்யலாம். இந்தத் தொகையை விடக் குறைவாகவோ அல்லது அதிகமாகவோ முதலீடு செய்வது சிக்கல்களை ஏற்படுத்தலாம். குறைந்தபட்சத் தொகையைச் செலுத்தத் தவறினால், கணக்கு செயலிழந்துவிடும். அதை மீண்டும் செயல்படுத்த, நீங்கள் 50 ரூபாய் அபராதம் செலுத்தி 500 ரூபாயை வைப்புத் தொகையாகச் செலுத்த வேண்டும்.
உங்கள் பெயரில் ஒரு கணக்கை மட்டுமே வைத்திருக்க வேண்டும். உங்கள் குழந்தைக்கு மற்றொரு கணக்கைத் தொடங்கலாம். இருப்பினும், இரண்டு கணக்குகளிலும் செய்யப்படும் மொத்த முதலீடு ஆண்டுக்கு ரூ.1.5 லட்சத்திற்கு மிகாமல் இருக்க வேண்டும். PPF கணக்கிற்கான வட்டியானது, ஒவ்வொரு மாதமும் 5ஆம் தேதி முதல் மாதத்தின் கடைசி நாள் வரை உள்ள குறைந்தபட்ச இருப்பின் அடிப்படையில் கணக்கிடப்பட்டு வழங்கப்படுகிறது. ஏப்ரல் மாதத்திற்கான தொகையை ஏப்ரல் 5ஆம் தேதிக்கு முன்பே செலுத்த வேண்டும். இல்லையெனில், அந்த முழு ஆண்டிற்கான வட்டியும் கிடைக்காது.
மாதந்தோறும் முதலீடு செய்பவர்கள் ஒவ்வொரு மாதமும் 5ஆம் தேதிக்கு முன்பாகவே தங்கள் PPF கணக்கில் பணத்தைச் செலுத்த வேண்டும். மொத்தமாக முதலீடு செய்பவர்களுக்கும் இதே விதி பொருந்தும். பணம் செலுத்துவதில் ஏற்படும் தாமதம் வட்டி இழப்பை ஏற்படுத்தலாம். இது நீண்ட கால அடிப்படையில் குறிப்பிடத்தக்க வித்தியாசத்தை உருவாக்கும் என்பதை நினைவில் கொள்ளவும்.
