இந்தியாவின் விமானப் போக்குவரத்துத் துறை நடப்பு நிதியாண்டில் இன்னும் பெரிய இழப்புகளைச் சந்திக்கும் சூழல் உருவாகியுள்ளது. 2026-27 நிதியாண்டிற்கான (FY27) இந்திய விமான நிறுவனங்களின் நிகர இழப்பு மதிப்பீட்டை, தர மதிப்பீட்டு நிறுவனமான ICRA ரூ.36,000 கோடி முதல் ரூ.38,000 கோடி வரை உயர்த்தியுள்ளது. ரூபாயின் மதிப்பு சரிவு, விமான எரிபொருளின் (ATF) அதிக விலை, விமானங்களை வாடகைக்கு எடுப்பதற்கான செலவு அதிகரிப்பு மற்றும் மேற்கு ஆசியாவில் நிலவும் பதட்டத்தால் பயணிகள் தேவை குறைதல் ஆகியவை விமான நிறுவனங்கள் மீதான அழுத்தத்தை அதிகரிக்கும் என்று அந்த நிறுவனம் தெரிவித்துள்ளது.
மூன்று மடங்கு அதிக பற்றாக்குறை:
FY27 நிதியாண்டுக்கான விமான நிறுவனங்களின் இழப்பு ரூ.11,000 கோடி முதல் ரூ.12,000 கோடி வரை இருக்கும் என்று ICRA முன்பு மதிப்பிட்டிருந்தது. இருப்பினும், செலவுகள் தொடர்ந்து அதிகரித்து வருவதால் அந்த நிறுவனம் இப்போது இந்த மதிப்பீட்டை ரூ.36,000 கோடி முதல் ரூ.38,000 கோடி வரை உயர்த்தியுள்ளது. அதிகரித்து வரும் செலவுகளின் முழுச் சுமையையும் விமானக் கட்டணங்களை உயர்த்துவதன் மூலம் பயணிகளின் மீது சுமத்த விமான நிறுவனங்களால் முடியாது என்றும், இது அவற்றின் இழப்புகளை மேலும் அதிகரிக்கும் என்றும் அந்த நிறுவனம் கூறுகிறது.
மேற்கு ஆசியப் பதற்றம் ஒரு முக்கிய காரணம்:
ICRA நிறுவனத்தின் கூற்றுப்படி, 2026 பிப்ரவரி இறுதியில் தொடங்கிய மேற்கு ஆசிய மோதல் விமானப் போக்குவரத்தைப் பாதிக்கிறது. இது உள்நாட்டு மற்றும் சர்வதேச பயணிகள் போக்குவரத்தை மந்தமாக்கும் என்று எதிர்பார்க்கப்படுகிறது. அதோடு, டாலருக்கு நிகரான ரூபாயின் மதிப்பு சரிவு, விமானங்களை வாடகைக்கு எடுத்தல், பராமரிப்பு மற்றும் பிற வெளிநாட்டுப் பணப் பரிமாற்றங்களை அதிக செலவுமிக்கதாக மாற்றியுள்ளது. விமான எரிபொருளின் அதிக விலையும் விமான நிறுவனங்களின் செயல்பாட்டுச் செலவுகளை மேலும் அதிகரித்துள்ளது.
FY26 ஆண்டுக்கான பற்றாக்குறை மதிப்பீடு:
ICRA தனது FY26ஆம் ஆண்டுக்கான கணிப்பையும் திருத்தியுள்ளது. முன்பு ரூ.17,000 கோடி முதல் ரூ.18,000 கோடி வரை இழப்பு ஏற்படும் என்று கணித்திருந்த நிலையில், இப்போது அதை ரூ.32,000 கோடி முதல் ரூ.34,000 கோடி வரை உயர்த்தியுள்ளது. ரூபாயின் மதிப்பு கடும் சரிவு, கச்சா எண்ணெய் விலையில் திடீர் உயர்வு மற்றும் பயணிகள் போக்குவரத்தில் எதிர்பார்த்ததை விடக் குறைவான வளர்ச்சியே இதற்குக் காரணங்களாகக் கூறப்பட்டுள்ளன.
