அதிமுகவில் மூத்த தலைவராக இருந்த செங்கோட்டையன் அக்கட்சியில் இருந்து நீக்கப்பட்ட நிலையில் இன்று (நவம்பர் 27) தமிழக வெற்றிக் கழகத்தில் கட்சித் தலைவர் விஜய் முன்னிலையில் இணைந்தார்.
இதைத்தொடர்ந்து, தமிழக வெற்றிக் கழகத்தின் புதிய உறுப்பினர்களான செங்கோட்டையன் உள்ளிட்டோர் பனையூரில் செய்தியாளர்களை சந்தித்தனர்.
தவெக பொதுச் செயலாளர் என் ஆனந்த், தேர்தல் பரப்புரை மேலாண்மை பொதுச் செயலாளர் ஆதவ் அர்ஜுனா, கொள்கை பரப்புச் செயலாளர் அருண் ராஜ், துணை பொதுச்செயலாளர் சிடிஆர் நிர்மல் குமார் உள்ளிட்டோர் உடன் இருந்தனர்.
அப்போது பேசிய செங்கோட்டையன், “அனைத்திந்திய அண்ணா திராவிட முன்னேற்றக் கழகத்தில் புரட்சித்தலைவரால் நான் அடையாளம் காட்டப்பட்டவன். 1972ல் இந்த இயக்கத்தை உருவாக்கிய போது தலைவருக்கு பின்னால் நின்ற தொண்டர்களில் நானும் ஒருவன். 1975ல் கோவையிலே பொதுக்குழு நடைபெறுகிற போது அனைத்து பொறுப்பும் என்னிடம் ஒப்படைக்கப்பட்டது.
அந்தப் பணிகளை தலைவர் பாராட்டுகிற வகையில் செய்து முடித்து அவரை சத்யா ஸ்டூடியோவில் சந்தித்தோம். அப்போது அவர் என்னை கட்டிப்பிடித்து தழுவி, ஒரு இளைஞராக இருக்கக்கூடிய நீங்கள்… இந்த பணியை ஆற்றியதற்கு பாராட்டு தெரிவிக்கிறேன் என்றார்.
அப்போதெல்லாம் எதிர்க்கட்சியை சேர்ந்தவர்கள், இந்த கட்சி 100 நாள் கூட தாங்காது. 100 நாள் படத்தைப் போல மறைந்து விடும் என்றார்கள். ஆனால் மூன்று முறை முதல்வர் இருக்கையில் அமர்ந்தார் எம்.ஜி.ஆர். அண்ணாவால் பாராட்டை பெற்றவர். பத்தாயிரம் மைல்களுக்கு அப்பால் சிகிச்சை பெற்று மீண்டும் தமிழகத்தில் கால் வைக்கும் போது தமிழ்நாட்டின் நிரந்தர முதலமைச்சர் என்ற வரலாற்றைப் படைத்தார்.
அவர் மறைந்த பிறகு இயக்கம் இரண்டு கூறுகளாக பிரிந்த போது, 1987ல் முன்னாள் முதல்வர் ஜெயலலிதா வழியில் பயணத்தை மேற்கொண்டேன்.
ஜெயலலிதா என்னுடைய திருமணத்தில் மட்டுமல்ல திருச்சியில் நடைபெற்ற நிகழ்ச்சியிலும் கூட பாராட்டினார்.
ஆனால் இன்றைக்கு இருக்கக்கூடிய சூழ்நிலைகள் வேறு.
அம்மாவின் மறைவிற்குப் பிறகு ஆட்சி நடத்தினோம். எனினும் அந்த இயக்கம் மூன்று கூறுகளாக பிரிந்தது. நாங்கள் எல்லோரும் ஒன்றிணைைய வேண்டும் என்பதற்காகத்தான் அந்த கருத்துக்களை வலியுறுத்தினோம்.
ஆனால் அந்த கருத்துக்கள் பரிமாறப்பட்டதே தவிர செயல்படுத்தப்படவில்லை. இப்போது ஒன்றை சொல்ல விரும்புகிறேன், நான் என்று ஒருவன் நினைத்தால் தான் என்று ஆண்டவன் கண்டித்து விடுவார்.
இதுதான் இன்றைய சூழ்நிலை. இறைவன் எல்லோருக்கும் மேல் இருக்கிறான். நம் எல்லோரையும் கண்காணித்துக் கொண்டிருக்கிறான்.
எல்லோரிடமும் பேச வேண்டும் என்றுதான் தேவர் நிகழ்ச்சிக்கு நான் சென்றேன். சென்று வந்த இரண்டு நாட்களிலேயே உறுப்பினர் பதவியை கூட எடுத்து விட்டார்கள்.
50 ஆண்டு கால வரலாற்றில், இந்த இயக்கத்திற்காக ஏற்றத்தாழ்வுகளை சந்தித்த எனக்கு கிடைத்த பரிசு தான் இது.
மகேஷ் என்பவர் வீட்டுக்கு நான் துக்கத்துக்கு சென்றதால் அவரது உறுப்பினர் பதவியை கூட பறித்து விட்டார்கள்.
இதன் பிறகு தெளிவான முடிவெடுத்து, நேற்றைய தினம் சட்டமன்ற உறுப்பினர் பதவியை ராஜினாமா செய்து விட்டு இன்று தமிழக வெற்றிக் கழகத்தில் இணைந்துள்ளேன்.
திமுகவும் அதிமுகவும் வேறல்ல. இருவரும் ஒன்றாக இணைந்து தான் செயல்படுகிறார்கள் என்று நாடறியும். ஊடகத்துக்கு இது எல்லாம் நன்றாக தெரியும்.
தூய்மையான ஆட்சி தமிழகத்தில் வளர்வதற்கு, தமிழக வெற்றிக் கழகத்தின் தலைவர் விஜய் வெற்றி பயணத்தை மேற்கொண்டு இருக்கிறார்.
அவர் ஒரு மாபெரும் இயக்கத்தை உருவாக்கி மக்கள் மனதில் இடம் பெற்றுள்ளார்.
பள்ளிக்குச் செல்லும் குழந்தைகளும் கல்லூரிக்கு செல்லும் குழந்தைகளும் தங்களது பெற்றோர்களிடம் இந்த முறை விஜய்க்கு வாக்களியுங்கள் என்று கூறி வருகிறார்கள்.
என்ன காரணம் என்றால், தமிழகத்துக்கு மாற்றம் வேண்டும். புதிதாக ஒருவர் வரவேண்டும் என்று மக்கள் நினைக்கிறார்கள்.
தூய்மையான ஆட்சியை நடத்துவதற்கு ஒருவர் தேவை என்ற எண்ணம் மக்கள் மனதில் நிறைந்து இருக்கிறது. .
எல்லா மாநிலங்களிலும் மாற்றங்கள் உருவாகிக்கொண்டிருக்கிறது. டெல்லியில் ஆம் ஆத்மி வந்தது. பஞ்சாபிலும் ஆட்சிக்கு வந்தது.
2026 தேர்தலில் மக்களால் வரவேற்கப்படுகிற, மக்களால் ஏற்றுக் கொள்ளப்படுகிற மக்களால் உருவாக்கப்படுகிற புனித ஆட்சி உருவாவதற்கு இளவல் விஜய் வெற்றி பெறுவார்” என்றார்.
தொடர்ந்து அவரிடம் அதிமுகவை ஒன்றிணைக்க வேண்டும் என்று எடப்பாடிக்கு கெடு விதித்து விட்டு இன்று விஜய் கட்சியில் இணைவதற்கு என்ன காரணம் என்று செய்தியாளர்கள் கேள்வி எழுப்பினர்.
இதற்கு அவர், “ஒன்றிணைக்க வேண்டும் என்று நான் கெடு விதிக்கவில்லை. நீங்களாகவே 5 நாட்கள் தான் டெட்லைன் கொடுத்திருக்கிறார் என்று போட்டு விட்டீர்கள். ஒரு செய்தியாளர் ஐந்து நாட்களிலேயே முடிக்க வேண்டுமா என்று கேட்டார். அதற்கு நான் இல்லை பேச்சுவார்த்தையை தொடங்க வேண்டும். ஒரு மாதமோ ஒன்றரை மாதமோ எடுத்துக் கொள்ளுங்கள். இதில் யாரை சேர்க்கலாம் சேர்க்க வேண்டாம் என்று பொதுச் செயலாளர் முடிவு எடுக்கட்டும் என்று தான் தெளிவாகச் சொல்லி இருக்கிறேன். ஆனால் கெடு என்று சொன்னதே அவர்கள் தான். தெளிவாக காய் நகர்த்தி என்னை வெளியேற்றி விட்டார்கள். இதுதான் உண்மை” என்றார்.
மேலும் அவர், ஜெயலலிதா மற்றும் எம்ஜிஆர் ஆட்சி புனிதமான ஆட்சி இல்லை என்று நான் சொன்னேனா. நீங்களாக ஒரு கேள்வி கேட்டு, அதற்கான பதிலை திரித்து போட்டு என்னை டேமேஜ் செய்யாதீர்கள் என்று செய்தியாளர்களை பார்த்து கையெடுத்து கும்பிட்டார் செங்கோட்டையன்.
திமுகவில் இருந்து உங்களுக்கு அழைப்பு வந்ததா என்ற கேள்விக்கு, “திராவிட முன்னேற்றக் கழகத்தில் இருந்தோ அல்லது தேசிய கட்சியிலிருந்தோ என்னை யாரும் சந்திக்கவில்லை. நானும் சேகர் பாபுவும் சந்தித்தது தொடர்பான புகைப்படம் உங்களிடம் இருக்கிறதா. இருந்தால் காட்டுங்கள் பதில் சொல்கிறேன்” என்றார்.
செங்கோட்டையன் சட்டை பையில் ஜெயலலிதா படம் இருந்தது தொடர்பாகவும் கேள்வி எழுப்பப்பட்டது.
இதற்கு பதில் அளித்த செங்கோட்டையன், “இது ஜனநாயக கட்சி. யாரை வேண்டுமானாலும் தங்கள் விருப்பத்தின் அடிப்படையில் புகைப்படத்தை வைத்துக் கொள்வதற்கு ஆட்சேபனை கிடையாது. நான் இந்த புகைப்படத்தை மாற்றி இருந்தால் ஒரே நாளிலேயே மாறிவிட்டார், டபுள் அடிக்கிறார். நிமிஷத்துக்கு நிமிஷம் மாறுகிறார். இவர் எல்லாம் என்ன கொள்கை பிடிப்பு உள்ளவர் என்பீர்கள். இந்த வேஷ்டியை கூட கேஸ் போட்டு விடுவார்கள் என்பதற்காக தான் மாற்றி அணிந்து கொண்டு வந்தேன். படத்தை மாற்ற வேண்டுமென்று அவர்கள் சொல்லவில்லை. இன்று புரட்சித்தலைவர் படமும் அண்ணா படமும் அவர்களது வண்டியில் எப்படி அலங்கரித்து வரப்படுகிறது என்பதை நீங்கள் பார்த்திருப்பீர்கள்” என்று பதிலளித்தார்.
இன்னொரு கட்சியில் இணைய மனதளவில் நீங்கள் தயாரானீர்களா என்ற கேள்விக்கு, “அடிக்கடி நான் கட்சி மாறி இருக்கிறேனா. இன்று நான் வந்ததற்கு காரணம் ஒரு புதிய மாற்றம் வேண்டும். ஒரு டிவி சேனல், விஜய்யை ஒரு கோடி பேர் பார்க்கிறார்கள் என்று சொல்கிறது. அதனால் பத்து சேனல் போட்டு அவர் இறங்கும் இடத்திலும் ஏறும் இடத்திலும் எடுக்கிறோம் என்கிறார்கள். அவரை சுற்றி சுற்றி எதற்காக எடுக்கிறீர்கள். மக்கள் அவரை வரவேற்கிறார்கள் என்ற நோக்கம் தானே அது” என்று பதிலளித்தார் செங்கோட்டையன்.