சென்னையில் இருந்து கோவை வந்த தமிழக வெற்றி கழகத்தின் நிர்வாக குழு தலைமை ஒருங்கிணைப்பாளர் செங்கோட்டையன் பயணித்த இண்டிகோ விமானம் மோசமான வானிலை காரணமாக பெங்களூரு சென்றது. வானிலை சரியான பிறகு பின்னர் மீண்டும் பெங்களூருவில் இருந்து விமானம் கோவை வந்தடைந்து.
சென்னையில் இருந்து இன்று (நவம்பர் 28) பிற்பகல் 12.30 மணிக்கு இன்டிகோ விமானம் கோவை கிளம்பியது. இந்த இண்டிகோ விமானத்தில் நேற்று நடிகர் விஜயின் தமிழக வெற்றிக் கழகத்தில் இணைந்த முன்னாள் அமைச்சர் செங்கோட்டையன் உட்பட நூற்றுக்கு மேற்பட்ட பயணிகள் இருந்தனர்.
விமானம் 1.40 மணிக்கு கோவை வரும் என தெரிவிக்கப்பட்ட நிலையில் ஆயிரக்கணக்கான தமிழக வெற்றிக் கழகத் தொண்டர்கள் செங்கோட்டையனை வரவேற்பதற்காக திரண்டிருந்தனர்.
இந்நிலையில் கோவை வந்த இன்டிகோ விமானம் மோசமான வானிலை காரணமாக பெங்களூர் திருப்பி விடப்பட்டது. இதையடுத்து மீண்டும் வானிலை சரியான பிறகு விமானம் பெங்களூரில் இருந்து புறப்பட்டு கோவை வந்தது. கோவை வந்த செங்கோட்டையனுக்கு தமிழக வெற்றிக் கழக தொண்டர்கள் உற்சாக வரவேற்பு அளித்தனர்.
கோவை வந்த செங்கோட்டையன் செய்தியாளர்களிடம் பேசுகையில் , “2026 இல் முதலமைச்சராக அமர்வதை மக்களே முழு மனதாக ஏற்றுக்கொண்டு மக்கள் சக்தியாக அவர் அரியணையில் அமர்வார்.
அப்படி அமர்வதற்கு இங்கு இருக்கின்ற உணர்ச்சி பூர்வமான அவரது இயக்கத்தைச் சார்ந்தவர்கள் ஏறத்தாழ 4 மணி நேரம் இங்கு காத்திருந்து , ஒரு சாதாரண தொண்டரான என்னை வரவேற்க காத்திருக்கின்றனர்.
வெற்றி என்பது உறுதி செய்யப்பட்ட ஒன்று. அது மக்கள் சக்தியாக மாறி இருக்கின்றது. மக்கள் சக்தி மூலமாக தமிழகத்தில் ஒரு மாற்றத்தை புதிய சமுதாயத்தை உருவாக்க ஒரு நேர்மையான ஆட்சியை தமிழகத்தில் உருவாக்க புறப்பட்டு இருக்கிறார்.” என தெரிவித்தார்.