அதிமுகவில் மூத்த தலைவராக இருந்த செங்கோட்டையன், நடிகர் விஜய் தலைமையிலான தமிழக வெற்றிக் கழகத்தில் இணைந்த கையோடு, மெரினா கடற்கரையில் உள்ள அண்ணா, எம்.ஜி.ஆர். மற்றும் ஜெயலலிதா நினைவிடங்களில் மலர்தூவி மரியாதை செலுத்தியுள்ளார்.
முன்னாள் முதல்வரும் அதிமுக நிறுவனருமான எம்.ஜி.ஆர். காலம் தொட்டே அதிமுகவில் பல்வேறு முக்கிய பதவிகளை வகித்து வந்த முன்னாள் அமைச்சர் செங்கோட்டையன், அதிமுகவில் இருந்து நீக்கப்பட்டார்.
இந்தசூழலில் நேற்று தனது எம்.எல்.ஏ. பதவியை ராஜினாமா செய்தார். இதனைத் தொடர்ந்து, இன்று தமிழக வெற்றிக் கழகத்தின் அலுவலகத்தில் நடிகர் விஜய் முன்னிலையில் தன்னை தமிழக வெற்றிக் கழகத்தில் இணைத்துக்கொண்டார்.
கட்சியில் இணைந்த உடனேயே, செங்கோட்டையன், த.வெ.க. நிர்வாகிகளான புஸ்ஸி ஆனந்த், ஆதவ் அர்ஜுனா, அருண் ராஜ், உள்ளிட்டோருடன் சென்னை மெரினா கடற்கரைக்குச் சென்றார்.
அங்கு, முதலில் அண்ணா நினைவிடத்திலும், அதனைத் தொடர்ந்து எம்.ஜி.ஆர். நினைவிடத்திலும், பின்னர் மறைந்த முதலமைச்சர் ஜெயலலிதா நினைவிடத்திலும் மலர்தூவி மரியாதை செலுத்தினார்.
இந்த அஞ்சலி செலுத்தும் நிகழ்வு, அ.தி.மு.க.வின் பாரம்பரிய அரசியலுடன் இணைந்த ஒரு முக்கிய அடையாளமாகப் பார்க்கப்படுகிறது.
தவெகவில் இணைந்தாலும் செங்கோட்டையன தனது சட்டைப்பையில் முன்னாள் முதல்வர் ஜெயலலிதாவின் புகைப்படத்தை வைத்து இருக்கிறார்.
இது தொடர்பாக செய்தியாளர்கள் எழுப்பிய கேள்விக்கு, ‘ இது ஜனநாயக கட்சி. யாரை வேண்டுமானாலும் தங்கள் விருப்பத்தின் அடிப்படையில் புகைப்படத்தை வைத்துக் கொள்வதற்கு ஆட்சேபனை கிடையாது. நான் இந்த புகைப்படத்தை மாற்றி இருந்தால் ஒரே நாளிலேயே மாறிவிட்டார், டபுள் அடிக்கிறார். நிமிஷத்துக்கு நிமிஷம் மாறுகிறார். இவர் எல்லாம் என்ன கொள்கை பிடிப்பு உள்ளவர் என்பீர்கள். இந்த வேஷ்டியை கூட கேஸ் போட்டு விடுவார்கள் என்பதற்காக தான் மாற்றி அணிந்து கொண்டு வந்தேன். படத்தை மாற்ற வேண்டுமென்று அவர்கள் சொல்லவில்லை. இன்று புரட்சித்தலைவர் படமும் அண்ணா படமும் அவர்களது வண்டியில் எப்படி அலங்கரித்து வரப்படுகிறது என்பதை நீங்கள் பார்த்திருப்பீர்கள்” என்று பதிலளித்தார் என்பது குறிப்பிடத்தக்கது.