கோவை மாநகராட்சி மன்ற கூட்டத்தில் கோவை மெட்ரோ விவகாரம் தொடர்பாக கடுமையான வாக்குவாதத்தில் ஈடுபட்ட அதிமுக கவுன்சிலர் பிரபாகரனை மாநகராட்சி மேயர் ரங்கநாயகி சஸ்பெண்ட் செய்து உத்தரவிட்டார்.
கோவை மாநகராட்சி சாதாரண கூட்டம் இன்று (நவம்பர் 28) நடைபெற்றது. மாநகராட்சி கூட்ட அரங்கில் நடைபெற்ற இந்த கூட்டத்தில் கோவைக்கு மெட்ரோ ரயில் திட்டத்தை வரவிடாமல் திமுக தவறான தகவல்களை கொடுத்து இருப்பதாக கூறி அதிமுக கவுன்சிலர்கள் தரையில் அமர்ந்து ஆர்ப்பாட்டத்தில் ஈடுபட்டனர். இதைத்தொடர்ந்து மெட்ரோ ரயில் திட்டத்திற்கு அனுமதி அளிக்காத மத்திய மோடி அரசை கண்டித்து திமுக மற்றும் கூட்டணி கட்சி கவுன்சிலர்கள் போராட்டத்தில் ஈடுபட்டனர்.
திட்டமிட்டு மெட்ரோ ரயில் திட்டத்தை மோடி அரசு புறக்கணித்து விட்டதாக திமுக கூட்டணி கட்சியினர் முழக்கங்களை எழுப்பினர். மாநகராட்சி வளாகம் முன்பு இருதரப்பு கவுன்சிலர்களும் மாறி மாறி முழக்கங்களை எழுப்பி போராட்டத்தில் ஈடுபட்டதால் அப்பகுதியில் பரபரப்பான சூழல் நிலைவியது.
இதைத்தொடர்ந்து மேயர் ரங்கநாயகி தலைமையில் மாநகராட்சி கூட்டம் துவங்கியது. அப்போது மெட்ரோ ரயில் திட்டத்தை நிராகரித்த மோடி அரசுக்கு கண்டனம் தெரிவிப்பதாக மாநகராட்சி மேயர் அறிவித்தார். இதைத்தொடர்ந்து திமுக மற்றும் காங்கிரஸ் கவுன்சிலர்கள் மத்திய அரசை கண்டித்து மாமன்றத்தில் தீர்மானம் நிறைவேற்ற வலியுறுத்தினர்.
அப்போது அதிமுக கவுன்சிலர் பிரபாகரன் எழுந்து திமுக அரசு ரயில் திட்ட அறிக்கையை முறையாக தயாரித்து சமர்ப்பிக்காமல் போனதால் திட்டம் பறிபோனது என்று தெரிவித்தார். இது தொடர்பான வாசகங்கள் அடங்கிய பதாகைகளுடன் நின்றிருந்தார். இதற்கு எதிர்ப்பு தெரிவித்து திமுக கூட்டணி கவுன்சிலர்கள் பிரபாகரன் மற்றும் ரமேஷ் ஆகியோரை சூழ்ந்து முழக்கங்களை எழுப்பினர்.
இதை தொடர்ந்து அதிமுக மற்றும் திமுக கவுன்சிலர்கள் இடையே வாக்குவாதம் ஏற்பட்டது. அதிமுக கவுன்சிலர்கள் வைத்திருந்த பதாகைகளை திமுக கவுன்சிலர்கள் பிடுங்கி கிழித்து எறிந்தனர். இதை தொடர்ந்து பிரபாகரன் மற்றும் ரமேஷ் ஆகிய இருவரும் கூட்டு அரங்கில் இருந்து வெளிநடப்பு செய்தனர்.
பின்னர் நடைபெற்ற மாமன்ற கூட்டத்தில் மெட்ரோ ரயில் திட்டத்தை நிராகரித்த மத்திய அரசை கண்டித்து தீர்மானம் நிறைவேற்றப்படுவதாக மேயர் ரங்க நாயகி தெரிவித்தார். மேலும் மாமன்ற கூட்டத்தில் ரகளையில் ஈடுபட்ட அதிமுக கவுன்சிலர் பிரபாகரனை இரண்டு மாதங்களுக்கு சஸ்பெண்ட் செய்வதாகவும் அறிவித்தார்.
இதைத்தொடர்ந்து நடந்த கூட்டத்தின் போது தனது வார்டில் முறையாக பணிகள் நடப்பதில்லை என கவுன்சிலர் பேபி சுதா என்பவர் மேயருடன் வாக்குவாதத்தில் ஈடுபட்டார். இருவருக்கும் இடையே கடுமையான வாக்குவாதம் நிலவியது. இதனை தொடர்ந்து மற்ற திமுக கவுன்சர்கள் தலை இட்டு அமைதிப்படுத்தினர். வாக்குவாதத்தின் போது மேயர் நீ உட்காரு , சும்மா பேசாத என ஒருமையில் பேசியதற்கு எதிர்ப்பு எழுந்துள்ளது.