வங்க கடலில் மீண்டும் புதிய புயல் உருவாகக் கூடும் என வானிலை ஆய்வாளர்கள் தெரிவித்துள்ளனர்.
தென் மேற்கு வங்க கடல், தென்கிழக்கு இலங்கை- இந்திய பெருங்கடல் பகுதியில் காற்றழுத்த தாழ்வு பகுதி உருவாகி இருந்தது. இது ஆழ்ந்த காற்றழுத்த தாழ்வு மண்டலமாகி உள்ளது.
இந்த ஆழ்ந்த காற்றழுத்த தாழ்வு மண்டலமானது, தென் இலங்கை மற்றும் தென் மேற்கு வங்க கடலில் கடந்த சில மணிநேரங்களாக நிலை கொண்டிருக்கிறது. இது வடக்கு-வடமேற்கு திசையில் நகர்ந்து வடதமிழகம், புதுவை கடலோரப் பகுதிகளை நோக்கி நகரக் கூடும் என்கின்றனர் வானிலை ஆய்வாளர்கள்.
இதனிடையே காற்றழுத்த தாழ்வு மண்டலம் உருவான நிலையில் தமிழகத்தில் 7 துறைமுகங்களில் 1-ம் எண் புயல் முன்னெச்சரிக்கை கூண்டுகள் ஏற்றப்பட்டுள்ளன. சென்னை, கடலூர், நாகப்பட்டினம், எண்ணூர், காட்டுப்பள்ளி, புதுவை, காரைக்கால் ஆகிய துறைமுகங்களில் 1-ம் எண் புயல் முன்னெச்சரிக்கை கூண்டு ஏற்றப்பட்டுள்ளது.
கடந்த நவம்பர் 22-ந் தேதி தென்கிழக்கு வங்கக் கடலில்உருவான காற்றழுத்தத் தாழ்வுப் பகுதி வலுவடைந்து ‘சென்யார்’ புயலாக உருவெடுத்தது. இது மலேசியாவின் மலாக்கா ஜலசந்தியில் இருந்து மேற்கு-வடமேற்கு திசையில் நகர்ந்து, நவம்பர் 26-ந் தேதி இந்தோனேசியாவில் கரையை கடந்தது.
தமிழகத்தில் இருந்து 2600 கிலோமீட்டர் தொலைவில் இப்புயல் இருந்ததால், தமிழகத்துக்கு நேரடி பாதிப்பு ஏற்படவில்லை.
இந்த நிலையில் வங்க கடலில் மீண்டும் புதிய புயல் உருவாகிக் கொண்டிருக்கிறது.
ஸ்டாலின் ஆலோசனை
தமிழ்நாட்டில் பல மாவட்டங்களுக்கு கனமழை எச்சரிக்கை விடுக்கப்பட்டுள்ள நிலையில், புயல்- மழை முன்னெச்சரிக்கை நடவடிக்கைகள் தொடர்பாக முதல்வர் ஸ்டாலின் இன்று ஆலோசனை நடத்த உள்ளார்.
தமிழ்நாட்டில் இன்று மிக கனமழைக்கு வாய்ப்புள்ள மாவட்டங்கள்
- விழுப்புரம்
- கடலூர்
- மயிலாடுதுறை
- திருவாரூர்
- நாகப்பட்டினம்
- புதுச்சேரி
- காரைக்கால்
- திருவள்ளூர்
- சென்னை
- ராணிப்பேட்டை
- காஞ்சிபுரம்
கனமழைக்கு வாய்ப்புள்ள மாவட்டங்கள்:
- செங்கல்பட்டு
- திருவண்ணாமலை
- கள்ளக்குறிச்சி
- பெரம்பலூர்
- அரியலூர்
- தஞ்சாவூர்
- கன்னியாகுமரி
- திருநெல்வேலி
- தூத்துக்குடி
- தென்காசி
- இராமநாதபுரம்
- புதுக்கோட்டை