வங்கக்கடலில் உருவான டித்வா புயல் காரணமாக இலங்கையில் கடந்த சில நாட்களாகக் கடுமையான மழை பெய்தது. இதனால் ஏற்பட்ட வெள்ளம் மற்றும் நிலச்சரிவுகளால் 50க்கும் மேற்பட்டோர் உயிரிழந்துள்ளனர். பதுளை மாவட்டத்தில் மட்டும் 19 பேர் உட்பட நாடு முழுவதும் 40க்கும் மேற்பட்டோர் உயிரிழந்ததாக ஆரம்பகட்ட தகவல்கள் வந்தன.
தற்போது இந்த எண்ணிக்கை 50-ஐ தாண்டியுள்ளதாக அந்நாட்டின் பேரிடர் மேலாண்மை மையம் அறிவித்துள்ளது. நிலச்சரிவு மற்றும் வெள்ளப் பாதிப்பு பகுதிகளில் 20க்கும் மேற்பட்டோர் மாயமாகி இருப்பதாகவும் அஞ்சப்படுகிறது.
இந்நிலையில் நிலச்சரிவால் பாதிக்கப்பட்ட இலங்கைக்கு இந்தியா முதல் நாடாக உதவிக்கரம் நீட்டியுள்ளது.
அதாவது அண்டை நாடான இலங்கைக்கு இந்தியா தனது “அயலகத்துக்கு முதலிடம்”கொள்கையின் கீழ் மனிதநேய உதவிகளை வழங்கியிருக்கிறது.
பிரதமர் மோடி, “சாகர் பந்து” திட்டத்தின் கீழ் இலங்கைக்குத் தேவையான அவசர நிவாரணப் பொருட்கள், மனிதாபிமான உதவிகள் மற்றும் பேரிடர் நிவாரணங்களை உடனடியாக அனுப்பி வைத்துள்ளார்.
இந்தியக் கடற்படையின் ஐ.என்.எஸ் விக்ராந்த் மற்றும் ஐ.என்.எஸ் உதயகிரி ஆகிய இரு போர்க்கப்பல்கள் நிவாரணப் பொருட்களுடன் கொழும்புத் துறைமுகத்தை வந்தடைந்துள்ளன.
இதுதொடர்பாக பிரதமர் மோடி தமிழில் தனது எக்ஸ் பக்கத்தில் பதிவிட்டுள்ளார். அதில், “டித்வா புயலில் தமது அன்புக்குரிய உறவுகளை இழந்த இலங்கை மக்களுக்கு எனது இதயபூர்வமான அனுதாபங்கள். பாதிக்கப்பட்ட குடும்பங்களின் பாதுகாப்பு, ஆறுதல் மற்றும் துரித மீட்சிக்காக நான் பிரார்த்திக்கின்றேன். கடல்மார்க்கமாக மிகவும் நெருங்கிய அயலுறவுடன் எமது கூட்டொருமைப்பாட்டினை காண்பிக்கும் முகமாக சாகர் பந்து நடவடிக்கையின் கீழ் முக்கிய HADR உதவி மற்றும் நிவாரணப் பொருட்களை இந்தியா உடனடி அவசர உதவியாக அனுப்பி வைத்துள்ளது. எவ்வாறான சூழலிலும் தேவையான மேலதிக ஆதரவு மற்றும் உதவிகளை வழங்க நாம் தயாராக உள்ளோம். இந்தியாவின் அயலுறவுக்கு முதலிடம் கொள்கை மற்றும் மஹாசாகர் தொலைநோக்கு ஆகியவற்றின் வழிகாட்டலுடன், உதவிகள் தேவைப்படும் எந்நேரத்திலும் இந்தியா இலங்கையுடன் தொடர்ந்து துணைநிற்கும்” என்று தெரிவித்துள்ளார்.
தற்போது டித்வா புயல் வட தமிழ்நாட்டை நோக்கி நகர்ந்து வருகிறது என்பது குறிப்பிடத்தக்கது.