தினமும் 30 நிமிடங்கள் நடப்பதால் (Walking) உடலில் ஏற்படும் நன்மைகள் குறித்து விரிவாக காணலாம்.
நாம் உடலுழைப்பு செலுத்துவதை விட அதிகளவில் அலுவலகப் பணிகளுக்கு செல்லத் தொடங்கிவிட்டோம். குறிப்பாக அலுவலங்களில் நீண்ட நேரம் அமர்ந்து பணியாற்ற வேண்டிய சூழலில் உள்ளோம். அதேபோல உடலுழைப்பு செலுத்துவது குறைந்ததோடு உணவுப் பழக்கங்களும் மிக மோசமாக மாறிவிட்டன. இதனால் 40 வயதிலேயே சர்க்கரை நோய், ரத்த அழுத்தப் பிரச்சனைகள் ஏற்படுவதை காண முடிகிறது.
எந்த உடலுழைப்பும் செலுத்த முடியாவிட்டாலும் தினமும் 30 நிமிடங்கள் நடைபயிற்சி (Daily Walking) செய்ய வேண்டும் என்று மருத்துவர்கள் கூறுகிறார்கள். 30 நிமிடங்களுக்கு மேல் நடைபயிற்சி செய்தாலும் மேலும் அதிக பலன்களைத் தரும். தினமும் நடைபயிற்சி செய்வதால் ஏற்படும் நன்மைகள் குறித்து விரிவாக பார்க்கலாம்.
இதய ஆரோக்கியம்:
தினமும் நடைபயிற்சி செய்வது இதய நோய் அபாயத்தைக் குறைக்கிறது. இது எண்டோடெலியல் செயல்பாட்டை மேம்படுத்த உதவுகிறது. எண்டோடெலியல் செல்கள் (Endothelial cells) ரத்த நாளங்களின் உள் மேற்பரப்பில் உள்ளன மற்றும் வாஸ்குலர் தொனி, இரத்த அழுத்தம் மற்றும் பிளேட்லெட் திரட்டலை பராமரிப்பதில் குறிப்பிடத்தக்க பங்கை வகிக்கின்றன. நடைபயிற்சி ஒட்டுமொத்த இதய செயல்பாடு மற்றும் இதயத் துடிப்புக்கு சிறந்ததாக உள்ளது.
நுரையீரல் செயல்பாடு:
விறுவிறுப்பான நடைபயிற்சி நுரையீரல் செயல்பாடுகளை (Lung function improves) அதிகரிக்கிறது. நடைபயிற்சி உடலின் ஆக்ஸிஜன் தேவையை அதிகரிக்கிறது, இந்த தேவையை பூர்த்தி செய்ய நுரையீரல் மற்றும் உதரவிதானம் மிகவும் சுறுசுறுப்பாக வேலை செய்கிறது.
இரத்த ஓட்டம் மேம்படுகிறது:
நடைபயிற்சி செய்வதன் மூலம் உடல் முழுவதும் ரத்த ஓட்டம் (Blood Circulation improvement) மேம்படுகிறது. 30 நிமிட நடைபயிற்சி பெண்களுக்கு பக்கவாதம் ஏற்படும் அபாயத்தை 20 சதவீதம் குறைக்கிறது. வேகத்தை அதிகரிப்பது ஆபத்தை 40 சதவீதம் குறைக்கிறது.
எடையை குறைக்க உதவுகிறது:
உங்கள் எடையை சரியாக பராமரிக்க விரும்பினால், நடைப்பயணத்தை ஒருபோதும் புறக்கணிக்கக் கூடாது. உங்கள் எடை இழப்பு (Weight Loss) திட்டத்தில் இதைச் சேர்த்துக் கொள்ள வேண்டும். 30 நிமிட விறுவிறுப்பான நடைபயிற்சி 200 கலோரிகளை எரிக்கிறது, இது கலோரி பற்றாக்குறையை அடைவதற்கு மிகவும் உதவியாக இருக்கும்.
எலும்புகள் மற்றும் மூட்டுகளை வலுப்படுத்துகிறது:
பெரும்பாலான மூட்டுகளில் உள்ள குருத்தெலும்பு நேரடி இரத்த விநியோகத்தைப் பெறுவதில்லை. எனவே, அது மூட்டு திரவத்திலிருந்து ஊட்டச்சத்து மற்றும் ஆக்ஸிஜனைப் பெற வேண்டும். நடைபயிற்சியின்போது குருத்தெலும்புக்கு (Strengthens bones and joints) இவை வழங்கப்படுகிறது. நடைபயிற்சி எலும்பு இழப்பைக் குறைத்து எலும்பு வலிமையைப் பராமரிக்கிறது.
தூக்கம் மேம்படும்:
30 நிமிடங்கள் விறுவிறுப்பான நடைபயிற்சி உங்கள் மனநிலை, மன ஆரோக்கியம் மற்றும் தூக்கத்தின் தரத்தை (Sleep Quality) மேம்படுத்துகிறது. உங்கள் ஒட்டுமொத்த ஆரோக்கியத்தையும் மேம்படுத்துகிறது. எவ்வளவு தூரம் நடக்கிறீர்கள் என்பதை தெரிந்துகொள்ள கூகுள் பிட் போன்ற செயலிகளை கூகுள் ப்ளே ஸ்டோரில் தரவிரக்கம் செய்து அளவிடலாம்.