இலங்கையில் ஈழத் தமிழரின் தாயகப் பகுதியான வட மாகாணத்துக்குள் நுழைந்து வட தமிழ்நாடு நோக்கி டிட்வா புயல் நகரக் கூடும் என கணிக்கப்பட்டுள்ளது. இலங்கை நிலப் பகுதிக்குள் நுழைந்து தமிழ்நாட்டு கடலோரத்தை நோக்கி புயல் நகருவது என்பது இதுவே வரலாற்றில் முதல் முறை என கூறப்படுகிறது.
வங்க கடலில் உருவான டிட்வா புயல் இன்று அதிகாலை 4.30 மணி நிலவரப்படி
- இலங்கை திருகோணமலைக்கு தெற்கே 50 கி.மீ தொலைவில்
- இலங்கை மட்டக்களப்புக்கு வடமேற்கில் 70 கிலோ மீட்டர் தொலைவில்
- இலங்கை அம்பந்தோட்டா துறைமுகத்தின் வடக்கில் 220 கி.மீ தொலைவில்
- இந்தியாவின் புதுச்சேரியின் தெற்கு- தென்மேற்கில் 460 கி.மீ தொலைவில்
- தமிழ்நாட்டின் சென்னையின் தெற்கு- தென்மேற்கில் 560 கி.மீ. தொலைவில்
மையம் கொண்டுள்ளது; இது மணிக்கு 7 கி.மீ வேகத்தில் நகர்ந்து வருகிறது.
டிட்வா புயலால் இலங்கையில் மணிக்கு 50 முதல் 60 கி.மீ. வேகத்தில் பலத்த சூறாவளி காற்று வீசுகிறது.
டிட்வா புயலானது வட தமிழகத்தை நோக்கி நகரும் என கணிக்கப்பட்டுள்ளது. தற்போதைய நிலையில் இலங்கையில் ஈழத் தமிழரின் தாயக நிலப் பகுதியான வட மாகாணத்துக்குள் நுழைந்து- அதாவது முழுமையாக நிலப் பகுதியை கடந்துதான் தமிழ்நாட்டை நோக்கி டிட்வா புயல் நகரக் கூடிய நிலையில் இருக்கிறது என்கின்றன இலங்கை தமிழர் ஊடகங்கள்.
வங்க கடலின் புயல் இலங்கையின் வடக்கு நிலப்பகுதிக்குள் முழுமையாக நுழைந்து இந்தியாவை நோக்கி நகரக் கூடும் என்பதுதான் டிட்வா புயலின் நகரும் பாதையாக இருக்கக் கூடும் என்கின்றனர் வானிலை ஆய்வாளர்கள். இப்படியான, நிலப்பகுதிக்குள் நுழைந்து இந்தியாவை நோக்கி புயல் நகரக் கூடிய நிகழ்வு என்பது வரலாற்றில் முதல் முறை எனவும் கூறப்படுகிறது.
டிட்வா புயலினால் இலங்கையின் அனைத்து பகுதிகளிலும் பெருமழை கொட்டி வருகிறது. மலை மாவட்டங்களில் நிலச்சரிவு ஏற்பட்டு உயிரிழப்புகள் அதிகரித்து வருகின்றன. தற்போது தமிழ்நாட்டை ஒட்டிய இலங்கை வடக்கு மாகாணத்தையும் டிட்வா புயல் மிக மோசமாக; பேரழிவுடன் தாக்கக் கூடும் என்கிற அச்சம் ஏற்பட்டுள்ளது.