இலங்கையை சூறையாடிய டிட்வா புயலால் ஏற்பட்ட பெருமழை வெள்ளம் மற்றும் நிலச்சரிவுகளில் சிக்கி 193 பேர் பலியாகி உள்ளனர். மேலும் 228 பேரின் நிலைமை என்ன என்பது தெரியவில்லை.
இலங்கையின் கிழக்கு மாகாண கடற்பரப்பில் டிட்வா புயல் உருவானது. கடலில் மையம் கொண்டு நகர்ந்த டிட்வா புயல் வழக்கத்துக்கு மாறாக இலங்கையின் மையப் பகுதியான வட மாகாண நிலப்பரப்புக்குள் ஊடறுத்து நகர்ந்தது. இதனால் இலங்கையின் பெரும்பாலான மாவட்டங்களில் பெருமழை கொட்டி வெள்ளம் பெருக்கெடுத்து ஓடியது. மலையக மாவட்டங்களில் தொடர்ந்து நிலச்சரிவுகள் ஏற்பட்டு வருகின்றன.
தற்போது இலங்கையை விட்டு வெளியேறி தமிழ்நாடு மற்றும் புதுச்சேரி கடற்கரையை நெருங்குகிறது டிட்வா புயல். இந்த புயல் கடலிலேயே வலுவடைந்த நிலையில் காற்றழுத்த தாழ்வு மண்டலமாக மாறி இருக்கிறது. இதனால் டிட்வா புயல் தமிழகம்- புதுவை கடற்கரையை கடக்காது; கடற்கரயை ஒட்டியே நகர்ந்து செல்லும் எனவும் கூறப்படுகிறது.
இலங்கையில் பெருவெள்ளம் மழையால் பாதிக்கப்பட்டுள்ள மக்களை மீட்கும் பணியில் இந்திய பேரிடர் மீட்பு படையினர் ஈடுபட்டுள்ளனர். இந்திய அரசும் நிவாரணப் பொருட்களை அனுப்பி வைத்துள்ளது.
இலங்கை விமான நிலையத்தில் தத்தளித்த 177 தமிழர்களை தமிழ்நாடு அரசு பாதுகாப்பாக மீட்டு அழைத்து வந்துள்ளது.
இதனிடையே இலங்கையை புரட்டிப் போட்ட இந்த பெருமழை வெள்ளத்தால் பலியானோர் எண்ணிக்கை 193 ஆக அதிகரித்துள்ளது. மேலும் 228 பேரின் நிலைமை என்ன என்பதும் தெரியவில்லை.
இன்று காலை நிலவரப்படி இலங்கையில், 2,66,114 குடும்பங்களைச் சேர்ந்த 9,68,304 பேர் கடுமையாக பாதிக்கப்பட்டுள்ளனர்.
இலங்கையின் கண்டி மாவட்டத்தில் 52 பேர்; மாத்தளையில் 20 பேர்; குருநாகலில் 15 பேர் பலியாகி உள்ளனர். கண்டியில் மட்டும் 105 பேர் காணாமல் போயுள்ளனர். பதுளை மாவட்டத்தில் 53; குருநாகல் மாவட்டத்தில் 27;கேகாலை மாவட்டத்தில் 24 பேர் காணாமல் போயுள்ளனர்.