கோவையில் இரண்டு தொழிலதிபர்களை மிரட்டி பணம் பறித்ததாக எழுந்த குற்றச்சாட்டில் இன்ஸ்பெக்டர் உள்ளிட்ட 2 பேர் மீது வழக்கு பதிவு செய்து காவல்துறையினர் விசாரணையை துவக்கி உள்ள சம்பவம் பெரும் பரபரப்பை ஏற்படுத்தி உள்ளது.
கோவை சிவானந்தா காலனி பகுதியைச் சேர்ந்தவர் சோமசுந்தரம். இவர் கட்டுமான தொழிலில் ஈடுபட்டு வருகிறார். கடந்தாண்டு செப்டம்பர் மாதம் 17ஆம் தேதி சோமசுந்தரம் வீட்டில் இருந்தபோது திடீரென செல்வபுரம் போலீஸ் இன்ஸ்பெக்டர் செல்வராஜ் மற்றும் போலீசார் வீட்டிற்கு வந்தனர். அப்போது முத்துக்குமாரிடம் 1 கிலோ 250 கிராம் நகையை வாங்கி மோசடி செய்தது தொடர்பாக விசாரிக்க வேண்டும் என்று செல்வராஜ் தெரிவித்தார்.
இதைக் கேட்டு அதிர்ச்சி அடைந்த சோமசுந்தரம் தனக்கு முத்துக்குமார் யார் என்று தெரியாது என தெரிவித்தார். அதை ஏற்க மறுத்த இன்ஸ்பெக்டர் செல்வராஜ் அவர் நகையை திருப்பிக் கொடுக்க விட்டால் கடுமையான நடவடிக்கை எடுக்கப்படும் என்று எச்சரித்தார்.
சோமசுந்தரம் வேறு வழியின்றி தனது உதவியாளரிடம் தெரிவித்து ஒரு கிலோ 250 கிராம் தங்க நகையை வாங்கி இன்ஸ்பெக்டர் மற்றும் காவல் துறையினரிடம் ஒப்படைத்தார். இச்சம்பவம் குறித்து சென்னை உயர் நீதி மன்றத்தில் சோமசுந்தரம் மனுதாக்கல் செய்திருந்தார். மனுவை விசாரித்த நீதிமன்றம் சோமசுந்தரம் கொடுத்த புகாரின் அடிப்படையில் விசாரிக்க மாநகர குற்றப்பிரிவு காவல் துறையினருக்கு உத்தரவிட்டது.
இதை அடுத்து காவல்துறையினர் இன்ஸ்பெக்டர் செல்வராஜ் மற்றும் முத்துக்குமார் மீது வழக்குப்பதிவு செய்துள்ளனர்.
இதேபோல் இடையர்பாளையம் பகுதியில் வசித்து வருபவர் நகைக்கடை அதிபர் பால வெங்கடேஷ். இவர் நகைக்கடை வியாபாரியான முத்துக்குமாரிடம் நகைச்சீட்டு போட்டிருந்தார். அதன் மூலம் ஒன்பது கிலோ தங்கத்தை முத்துக்குமார் பால வெங்கடேசுக்கு கொடுக்க வேண்டி இருந்தது.
ஆனால் முத்துக்குமார் உரிய முறையில் நகையை தர மறுத்ததால் பால வெங்கடேஷ் கடந்த ஏப்ரல் 25ஆம் தேதி கோவை மாநகர குற்ற பிரிவு காவல் துறையில் புகார் அளித்தார். இந்நிலையில் மே மாதம் 24 ஆம் தேதி செல்வபுரம் இன்ஸ்பெக்டர் செல்வராஜ் மற்றும் போலீசார் பால வெங்கடேஷ் வீட்டிற்கு சென்றனர். அப்போது முத்துக்குமாரிடம் மோசடியில் ஈடுபட்டதாக கூறி அவரது வீடு மற்றும் கடைகளில் சோதனை நடத்தினர். சோதனைக்கு பின்னர் 3 கிலோ 600 கிராம் தங்கத்தை பறிமுதல் செய்து சென்றனர்.
பால வெங்கடேஷ் 7 கிலோ 400 கிராம் அளவுள்ள நகைகளை முத்துக்குமாரிடம் வாங்கிவிட்டு மூன்று ஆண்டுகளில் இரண்டு மடங்காக திருப்பித் தருவதாக கூறி ஏமாற்றி விட்டதாக முத்துக்குமார் புகார் அளித்ததாக தெரிவித்தனர்.
மேலும் பறிமுதல் செய்தது போக மீதமுள்ள நகையை திருப்பி கொடுக்காவிட்டால் கைது நடவடிக்கை எடுக்கப்படும் என மிரட்டினர். இதை அடுத்து பால வெங்கடேஷ் தனக்கு சொந்தமான 500 ஏக்கர் நிலத்தின் பத்திரத்தை கொடுத்த பின்னர் அவரை திருப்பி அனுப்பி உள்ளனர்.
இதனால் கடும் மன உலைச்சலுக்கு ஆளான பால வெங்கடேஷ் கோவை மாநகர குற்றப்பிரிவு போலீசாரிடம் புகார் அளித்துள்ளார்.
இந்த இரண்டு சம்பவத்திலும் காவல்துறையினர் இன்ஸ்பெக்டர் செல்வராஜ் முத்துக்குமார் உள்ளிட்ட சிலர் மீது, மோசடி ஏற்படுத்தும் நோக்கில் ஆவணங்களை தயார் செய்தல், மிரட்டி பணம் பறித்தல் உள்ளிட்ட மூன்று பிரிவுகளின் கீழ் வழக்குப்பதிவு செய்துள்ளனர். மேலும் இன்ஸ்பெக்டர் செல்வராஜ் உள்ளிட்டோர் வேறு யாரிடமும் இது போன்ற மோசடி சம்பவங்களில் ஈடுபட்டுள்ளனரா என்பது குறித்தும் விசாரணை மேற்கொண்டு வருகின்றனர்.
கோவையில் போலீஸ் இன்ஸ்பெக்டரே தொழிலதிபர்களிடம் மிரட்டி நகைகளை பறித்த சம்பவம் பெரும் பரபரப்பை ஏற்படுத்தி உள்ளது.