கோவையில் பகீர் : சாலையில் வீசப்பட்ட பச்சிளங்குழந்தையின் உடல்!

Published On:

| By Pandeeswari Gurusamy

Body of a baby thrown on the road in Coimbatore!

கோவை மாவட்டம் கோவில் பாளையம் அருகே பச்சிளங்குழந்தையின் உடல் சாலையில் வீசப்பட்ட சம்பவம் பெரும் அதிர்ச்சியை ஏற்படுத்தி உள்ளது.

கோவை மாவட்டம் கோவில்பாளையம் காவல் எல்லைக்குட்பட்ட காளப்பட்டி – வீரியம்பாளையம் சாலை ஓரத்தில் பிறந்த குழந்தையின் உடல் கிடப்பதாக காவல்துறையினருக்கு தகவல் கிடைத்தது.

உடனடியாக கோவில்பாளையம் போலீசார் சம்பவ இடத்திற்கு விரைந்தனர். அங்கு சென்று பார்த்தபோது பிறந்த குழந்தை உடலின் கீழ் பகுதி தெரு நாய்களால் கடித்து குதறப்பட்டிருந்தது. இரண்டு கால்களும் துண்டு துண்டாக வீசப்பட்டு கிடந்தது. இதைப்பார்த்து அதிர்ச்சியடைந்த போலீசார் குழந்தையின் சடலத்தை மீட்டு பிரேத பரிசோதனைக்காக கோவை அரசு மருத்துவமனைக்கு அனுப்பி வைத்தனர்.

இதைத்தொடர்ந்து காவல்துறையினர் நடத்திய விசாரணையில் உயிரிழந்த குழந்தை பிறந்து சில மணி நேரமே ஆன குழந்தை என்பது தெரிய வந்துள்ளது. அதே சமயம் குழந்தையின் உடல் பாகங்களை நாய் கடித்திருந்ததால் அது ஆணா பெண்ணா என்பது குறித்து தெரியவில்லை. குழந்தை சாலையில் வீசப்பட்டபோது உயிரோடு இருந்ததா? குழந்தையை வீசிச் சென்றது யார்? உயிரோடு இருந்த குழந்தை நாய் கடித்து இறந்ததா என்பது குறித்த தகவல்கள் தெரியவில்லை.

ADVERTISEMENT

இச்சம்பவம் குறித்து 2 தனிப்படை அமைத்து காவல்துறையினர் குற்றவாளிகளை தேடி வருகின்றனர். குழந்தை வீசப்பட்ட பகுதியில் உள்ள சிசிடிவி காட்சிகளை வைத்து போலீசார் விசாரணையை துவக்கி உள்ளனர்.

கோவையில் பட்டப்பகலில் பச்சிளங்குழந்தை சாலையோரம் வீசப்பட்டுள்ள சம்பவம் பெரும் பதற்றத்தை ஏற்படுத்தி உள்ளது.

ADVERTISEMENT
செய்திகளை உடனுக்குடன் பெற மின்னம்பலம் வாட்ஸ் ஆப் சேனலில் இணையுங்கள்!
Join Our Channel
Share