தமிழ் திரையுலகம் மட்டுமல்லாது, உலகெங்கும் உள்ள தமிழர்களின் இசை ஆர்வத்தைத் தூண்டிவரும் ZEE5 சரிகமப சீனியர்ஸ் சீசன் 5, தற்போது அதன் உச்சகட்டத்தை எட்டியுள்ளது. மே 24, 2025 அன்று ஜீ தமிழ் மற்றும் ZEE5 இல் தொடங்கிய இந்த சீசன், ஒவ்வொரு வாரமும் சனிக்கிழமை மற்றும் ஞாயிற்றுக்கிழமைகளில் இரவு 7 மணிக்கு ஒலிபரப்பாகி, பட்டிதொட்டி எங்கும் பரவசத்தை ஏற்படுத்தி வருகிறது. தற்போது, இறுதிச் சுற்றுக்கான தகுதி பெற்ற போட்டியாளர்களின் பெயர்கள் வெளியாகி, ரசிகர்களிடையே பெரும் எதிர்பார்ப்பை கிளப்பியுள்ளது.
கவர்ந்த குரல்கள்: இறுதிச் சுற்றின் முதல் மூன்று நட்சத்திரங்கள்!
ZEE5 சரிகமப சீனியர்ஸ் சீசன் 5 நிகழ்ச்சியின் தீவிரமான சுற்றுகளுக்குப் பிறகு, தனது அசாதாரண திறமையால் நடுவர்களையும், ரசிகர்களையும் கவர்ந்து, இறுதிப் போட்டிக்குத் தகுதி பெற்ற முதல் மூன்று திறமையான போட்டியாளர்கள் யார் என்று தெரிந்துகொள்வோம்:
சஷோதிகா: ஆரம்பத்திலிருந்தே தனது சக்திவாய்ந்த குரலாலும், உணர்வுபூர்வமான பாடல்களாலும் ரசிகர்களைக் கவர்ந்த சஷோதிகா, இறுதிச் சுற்றுக்குத் தகுதி பெற்ற முதல் போட்டியாளர் என்ற பெருமையைப் பெற்றுள்ளார். கேப்டன் ரவுண்ட் மற்றும் இன்ட்ரோடக்ஷன் ரவுண்ட் என அனைத்து சுற்றுகளிலும் இவரது அர்ப்பணிப்பு மிக்க வெளிப்பாடுகள் அனைவராலும் பாராட்டப்பட்டன.
ஸ்ரீஹரி: தனது மெல்லிய குரலாலும், ஆழமான உணர்வுப்பூர்வமான வெளிப்பாடுகளாலும், சீரான இசைத் திறமையாலும் அனைவரையும் ஈர்த்த ஸ்ரீஹரி, இறுதிச் சுற்றில் தனது இடத்தைப் பிடித்துள்ளார். மேடையில் அவரது தோற்றமும், பாடல்களுடனான அவரது இணைப்பும் மறக்க முடியாதது.
சபேசன்: தனித்துவமான குரல் வளம், துணிச்சலான முயற்சிகள் மற்றும் கமல்ஹாசன் தோற்றத்தில் அவர் பாடிய மறக்க முடியாத பாடல் என தனது திறமையால் ரசிகர்களை அசத்தி, இறுதிச் சுற்றுக்கு முன்னேறியுள்ளார் சபேசன். அவரது அசலான மற்றும் தைரியமான அணுகுமுறை, நடுவர்கள் மற்றும் பார்வையாளர்கள் மத்தியில் பெரும் வரவேற்பைப் பெற்றது.
மீதமுள்ள இடங்களுக்காகத் தீவிரப் போட்டி!
இறுதிச் சுற்றில் மீதமுள்ள இடங்களுக்காக, ஏழு திறமையான போட்டியாளர்கள் ‘டிக்கெட் டு ஃபினாலே’ சுற்றில் தீவிரமாகப் போட்டியிட்டு வருகின்றனர். அவர்களில் சில முக்கியப் போட்டியாளர்கள்:
பிரதிபா: கர்நாடக சங்கீதத்தில் தனித்துவம் பெற்று, தனது பாரம்பரிய இசைத் திறனால் ரசிகர்களைக் கவர்ந்து வருகிறார்.
இனியா ராஜகுமாரன்: தனது இனிமையான குரலாலும், பார்வையாளர்களுடன் ஏற்படும் அணுக்க தொடர்பாலும் ஒரு வலுவான போட்டியாளராக வலம் வருகிறார்.
அருண் ராஜேந்திரன்: தனது குரல் வீச்சாலும், தொழில்நுட்ப ரீதியிலான துல்லியத்தாலும் நடுவர்களை வியக்க வைக்கிறார்.
ஹரிஷ் ராகவ்: தனது தரமான பாடல்களாலும், வலுவான ரசிகர் பட்டாளத்தாலும் அனைவரின் கவனத்தையும் ஈர்த்து வருகிறார்.
ஷிவானி: தனது உணர்வுபூர்வமான பாடல் வெளிப்பாடுகளால் தனித்துத் தெரிகிறார்.
பவித்ரா: சரிகமப மேடையில் பவித்ரா பாடிய ஒவ்வொரு பாடலும், அவரது தனிப்பட்ட வாழ்க்கையின் பிரதிபலிப்பாகவே அமைந்திருக்கிறது. சமீபத்தில் நடந்த ‘நாட்டுப்புறப் பாடல் சுற்றில்’, சைந்தவி பாடிய புகழ்பெற்ற ‘எள்ளு வய பூக்கலையே’ பாடலை பவித்ரா தன் பாணியில் பாடினார். இந்தப் பாடல், சில ஆண்டுகளுக்கு முன்பு எதிர்பாராத விபத்தில் காலமான தனது கணவருக்கு அவர் சமர்ப்பித்த உணர்வுபூர்வமான அஞ்சலியாக அமைந்தது. இவரின் தனித்துவமான பாணியை நடுவர் சரண் வெகுவாகப் பாராட்டினார். பவித்ராவின் கண்ணீர் நிறைந்த இந்த உணர்வுபூர்வமான தருணத்தில், நடுவர் சைந்தவி மேடைக்கு வந்து அவரை ஆரத்தழுவி ஆறுதல் கூறினார். “உன் வாழ்க்கை முடிந்துவிடவில்லை, உனக்காகக் காத்திருக்கும் ரசிகர்கள் அதிகம். இது ஒரு புதிய ஆரம்பம்” என்று கூறி தைரியமூட்டினார்.
முன்னதாக, ‘அர்ப்பணிப்புச் சுற்றில்’ அவர் பாடிய ‘அஞ்சு வண்ணப் பூவே’ பாடல், பார்வையாளர்கள் மற்றும் நடுவர்களை உலுக்கியது. “அவர் பாடிய ஒவ்வொரு வரியும் எங்களது இதயத்தை சல்லடை போட்டு துளைத்தது” என்று நடுவர் ஸ்ரீனிவாஸ் பாராட்ட, இசையமைப்பாளர் தேவா பவித்ராவின் வாழ்க்கைப் போராட்டங்களைப் பற்றிப் பேசி மேடையிலேயே கண்கலங்கினார். கணவரின் கனவை நிறைவேற்றவே இந்த மேடைக்கு வந்ததாக பவித்ரா குறிப்பிட்டது பலரது நெஞ்சைத் தொட்டது.
நிகழ்ச்சியின் வெற்றிக்குக் காரணமானவர்கள்!
இந்த சீசனையும், அதன் முந்தைய சீசன்களையும் (Sa Re Ga Ma Pa Tamil Li’l Champs) வெற்றிகரமாக வழிநடத்திய ஆங்கர் அர்ச்சனா சந்தோக், தனது கலகலப்பான பேச்சால் நிகழ்ச்சியை உயிர்ப்புடன் வைத்துள்ளார். நடுவர்களாகப் பணியாற்றும் இசை ஜாம்பவான்களான ஸ்ரீநிவாஸ், விஜய் பிரகாஷ், சைந்தவி, ஸ்வேதா மோகன், எஸ்.பி.பி சரண், மற்றும் கார்த்திக் ஆகியோர், போட்டியாளர்களின் திறமைகளை மெருகேற்றி, சரியான வழிகாட்டுதலை வழங்கி வருகின்றனர்.
ZEE5 சரிகமப சீனியர்ஸ் சீசன் 5 இறுதிச் சுற்றுக்கான அடியெடுத்து வைத்துள்ளது. யார் இறுதிப் பட்டத்தை வெல்வார்கள் என்ற எதிர்பார்ப்பு எகிறி உள்ளது.