வாக்காளர் பட்டியல் சிறப்பு தீவிரத் திருத்தம் SIR குறித்து அரசியல் கட்சிகள் தேவையற்ற குழப்பங்களை ஏற்படுத்துவதாக உச்சநீதிமன்றத்தில் இந்திய தேர்தல் ஆணையம் குற்றம்சாட்டியுள்ளது.
SIR-க்கு எதிராக உச்சநீதிமன்றத்தில் திமுக, மதிமுக, காங்கிரஸ் மற்றும் கேரளா- மேற்கு வங்க மாநில அரசுகள் வழக்கு தொடர்ந்துள்ளன. இம்மனுக்களை தலைமை நீதிபதி சூர்யகாந்த், ஜோய்மால்யா பக்சி ஆகியோர் அடங்கிய அமர்வு நேற்று நவம்பர் 26-ந் தேதி விசாரித்தது.
திமுக சார்பில் மூத்த வழக்கறிஞர்கள் என்.ஆர். இளங்கோ, கபில் சிபல் மற்றும் அமித் ஆனந்த் ஆஜராகினர். சிபிஎம் சார்பில் மூத்த வழக்கறிஞர் ராஜீவ் ராமச்சந்திரன், தேர்தல் ஆணையத்தின் சார்பில் ராகேஷ் துவேதியும் ஆஜராகி வாதங்களை முன்வைத்தனர்.
இந்த விசாரணையின் போது, SIR குறித்து சில அரசியல் கட்சிகள் தேவையற்ற குழப்பங்களை ஏற்படுத்துகின்றன என தேர்தல் ஆணையத்தின் வழக்கறிஞர் ராகேஷ் துவேதி குற்றம்சாட்டினார்.
அனைத்து தரப்பு வாதங்களையும் கேட்ட தலைமை நீதிபதி சூர்யகாந்த் பெஞ்ச்,
- வாக்காளர் பெயர் பட்டியலை சரிபார்க்க தேர்தல் ஆணையத்துக்கு உரிமை உண்டு
- ஆதார் என்பது குடியுரிமை ஆவணம் இல்லை; ஆனால் தேர்தல் ஆணையம் கேட்கும் ஆவணங்களில் ஒன்று.
- ஒருவரது பெயர் ரேஷன் கார்டில் இருந்தால் வாக்காளராகிவிட முடியுமா?
என கேள்விகளை எழுப்பி
- கேரளா மாநில அரசின் மனு மீதான விசாரணையை டிசம்பர் 2-ந் தேதிக்கும்
- தமிழக அரசியல் கட்சிகள் மனு மீதான விசாரணையை டிசம்பர் 9-ந் தேதிக்கும் ஒத்தி வைத்தனர்.