கோவையில் கல்லூரி மாணவி பாலியல் வன்கொடுமை செய்யப்பட்ட வழக்கில் சுட்டு பிடிக்கப்பட்ட குற்றவாளிகளை ஒரு நாள் காவலில் எடுத்து விசாரிக்க நீதிமன்றம் அனுமதி வழங்கி உள்ளது.
கோவையில் விமான நிலையத்தின் பின்புறத்தில் உள்ள பிருந்தாவன் நகர் பகுதியில் கடந்த நவம்பர் இரண்டாம் தேதி ஆண் நண்பருடன் பேசிக் கொண்டிருந்த கல்லூரி மாணவியை ஒரு கும்பல் பாலியல் வன்கொடுமை செய்த சம்பவம் பெரும் பரபரப்பை ஏற்படுத்தியது.
இதை அடுத்து குற்றத்தில் ஈடுபட்ட குணா என்ற தவசி, சதீஷ் என்ற கருப்பசாமி, கார்த்தி என்ற காளிஸ்வரன் ஆகிய 3 பேரை சம்பவம் நடந்த 24 மணி நேரத்திற்குள் தனிப்படை போலீசார் சுட்டு பிடித்தனர்.
இதைத்தொடர்ந்து கோவை அரசு மருத்துவக் கல்லூரி மருத்துவமனையில் குற்றவாளிகளுக்கு சிகிச்சை அளிக்கப்பட்டது. சிகிச்சைக்கு பின்னர் மூன்று பேரும் கோவை மத்திய சிறைக்கு மாற்றப்பட்டனர்.
இந்த வழக்கில் ஒரு மாதத்திற்குள் காவல்துறையினர் குற்றப்பத்திரிக்கை தாக்கல் செய்ய தமிழக முதல்வர் அறிவுறுத்தி இருந்த நிலையில் அடையாள அணிவகுப்பு நடத்தப்பட்டது.
இதைத்தொடரந்து காவல்துறையினர் குற்றம் சாட்டப்பட்டுள்ள மூன்று பேரையும் காவலில் எடுத்து விசாரணை நடத்த மூன்று நாட்கள் அனுமதி கேட்டு நீதிமன்றத்தில் மனு தாக்கல் செய்தனர்.
இது குறித்த மனு இன்று (நவம்பர் 27) கோவை கூடுதல் மகளிர் நீதிமன்றத்தில் விசாரணைக்கு வந்தது. இந்த வழக்கில் ஆஜராக குற்றவாளிகளை சக்கர நாற்காலிகள் மற்றும் ஸ்ட்ரெச்சரில் அழைத்து வந்தனர். குற்றம் சாட்டப்பட்ட மூன்று பேரிடமும் நீதிபதி சிந்து நேரில் விசாரணை நடத்தினார்.
பின்னர் மனுவை விசாரித்த நீதிபதி ஒரு நாள் காவலில் எடுத்து விசாரிக்க அனுமதி அளித்தார். முன்னதாக குற்றவாளிகள் ஸ்ட்ரெச்சர் மற்றும் சர்க்கரை நாற்காலியில் அழைத்து வரப்பட்ட போது நீதிமன்ற வளாகத்தில் பரபரப்பான சூழல் நிலவியது.